Read Mizo_Old_version Josua 13 Bible Online

Josua 13 - Mizo_Old_version bible

Josua 13

¹Tin, Josua chu a lo upa a, a lo tar ta hle mai a; tin, LALPA chuan a hnênah, “I lo upain i lo tar ta hle a, ram lah chu lâk tûr a la tam mai si a.

²Hêng ramte hi a ni la lâk loh chu: Philistia ram zawng zawng leh Gesur-ho ram zawng zawng,

³Aigupta ram bula awm Sihor aṭanga hmâr lampanga Ekron ramri thlengin (chu chu Kanaan mite rama ngaih a ni); Philistia-ho lal panga - Gaza mite, Asdod mite, Askelon mite, Git mite leh Ekron mite chu; chhim lama Avim ram pawh;

⁴Kanaan mite ram zawng zawng leh Zidon mite rama Meara, Amor-ho ramri Aphek khaw thlengin;

⁵Gebal mite ram leh ni chhuahna lam Lebanon ram zawng zawng, Hermon tlâng hnuai Baal-gad aṭanga Hamath khaw luhna thlengin;

⁶Lebanon aṭanga Misrephoth-maim hmun thlengin, tlâng rama chêng zawng zawng, Zidon mi zawng zawngte chu - anni chu Israela thlahte hmaah hian ka hnawt chhuak ang a; thu ka pêk che ang khân Israel-hote rochanah siamsak phawt mai ang che.

⁷Chutichuan, he ram hi hnam kuate leh Manase hnam zâtvete rochanah semsak ang che,” a ti a.

⁸Amah nên Reuben chite leh Gad-hote chuan, Jordan chhak lampangah khân an chanpual tûr Mosian a pêk chu an lo dawng tawh a, LALPA chhiahhlawh Mosia ngeiin a lo pêk tawh ang khân:

⁹Arnon ruam sîra awm Aroer khua aṭang leh ruam lai taka khawpui leh, Medeba phai ram zawng zawng, Dibon thlengin;

¹⁰Amor-ho lal Sihona, Hesbon khuaa lala ṭhua khawpui zawng zawng, Amona thlahte ramri thlengin;

¹¹Gilead ram leh, Gesur-ho leh Maakath-ho ramri chin leh Hermon tlâng zawng zawng leh Basan ram zawng zawng, Saleka khaw thlengin;

¹²Astaroth leh Edrei khuaa lala ṭhu Basan ram lal Oga ram zawng zawng nên (chûng chu Rephaim hnam la awm chhunte an ni); chûngho chu Mosian a bei a, a lo hnawt chhuak tawh a ni.

¹³Amaherawhchu, Gesur-hote leh Maakath-hote chu Israela thlahte chuan an hnawt chhuak lo; Gesur-ho leh Maakath-ho zawng tûn thleng hian Israel-hote zîngah an la chêng ta reng zâwk a ni.

¹⁴Levi hnamte chauh a ni rochan tûr a pêk ve loh ni; a hnêna a lo sawi tawh ang khân, LALPA, Israel-te Pathian tâna meia thilhlante chu an rochan a ni zâwk si a.

¹⁵Tin, Reubena thlahte hnam chu an chhûngkaw zir zêlin Mosian ram a lo pe tawh a.

¹⁶Tin, an ramri chu Arnon ruam sîra awm Aroer khua aṭanga ruam lai taka khawpui leh Medeba phai ram zawng zawng;

¹⁷Hesbon leh chumi phai rama khawpui zawng zawng: Dibon te, Bamoth-baal te, Bethbaal-meon te;

¹⁸Jahaz khua te, Kedemoth te, Mephaath te;

¹⁹Kiriathaim te, Sibma te, ruam tlânga Zereth-sahar te;

²⁰Beth-peor te, Pisga âwih pangpêr te, Beth-jesimoth te;

²¹phai ram khawpui zawng zawng te, Hesbona rorêl, Amor-ho lal Sihona mi lianho, Midian-hote lala awm Evia te, Rekema te, Zura te, Hura te, Reba te, an awmna ram chawpa Mosian a lo tihboral tâkte nên khân a ni.

²²Beora fapa Balaama, aienthiam pawh Israela thlahten mi dang an thahte zîngah chuan khandaihin an that tel a.

²³Tin, Reubena thlahte ram chin chu Jordan leh a kam zawng chu a ni. Hêng ram leh khawpuite leh khuate hi a ni, Reubena thlahte tâna an chhûngkaw zir zêla rochana an ruat chu.

²⁴Tin, Mosian Gad chi, Gada thlahte chu an chhûngkaw zir zêlin ram a pe a.

²⁵Tin, an ramri chu Jazer khua leh Gilead ram khawpui zawng zawng leh Amona thlahte ram zâtve, Raba khaw depa awm Aroer thlengin;

²⁶Hesbon aṭanga Ramath-mizpe leh Betonim thlengin; Mahanaim aṭanga Debir ramri thlengin;

²⁷tin, ruamah chuan Beth-haram te, Beth-nimra te, Sukkoth te, Zaphon te, Hezbon lal Sihona ram dang te, Jordan leh a kam te, Jordan râl chhak lampanga Kinereth dîl tâwp rak thlengin a ni.

²⁸Hêngte hi a ni Gada thlahte tâna an chhûngkaw zir zêla an rochana ruat chu, a khawpuite leh khuate chu.

²⁹Mosian Manase hnam zâtvete chu ram a pe a; Manase chi zâtvete tân a ni an chhûngkaw zir zêla a pêk ni.

³⁰An ramri chu Mahanaim aṭangin Basan ram zawng zawng, Basan ram lal Oga ram zawng zawng leh Basan rama Jair khawpui zawng zawngte nên, chu chu khaw sawmruk a ni;

³¹Gilead ram zâtve leh Basan ram lal Oga rama Astaroth te, Edrei khuate nên; chûng chu Manasea fa Makira thlah, Makira thlah zâtvete tân, an chhûngkaw zir zêla ruat a ni.

³²Hêng Moab phai, Jeriko zâwn, Jordan râl, chhak lampang te hi a ni Mosian an rochan tûra a lo sem chu.

³³Levi chite erawh chu Mosian rochan tûr a pe ve lo; an hnêna a lo sawi tawh ang khân, LALPA, Israel-te Pathian chu an rochan a ni zâwk.