Read Mizo_Old_version Josua 14 Bible Online

Josua 14 - Mizo_Old_version bible

Josua 14

¹Hêngte hi a ni Israela thlahten Kanaan rama an lâk, puithiam Eleazara te, Nuna fapa Josua te, Israela thlahte hnam chhûngkaw puipaten an rochan atâna an lo sem tâkte chu,

²hnam kuate leh hnam zâtvete chanpual atâna LALPAN Mosia hmanga thu a lo pêk tâk ang khân.

³Mosia chuan hnam hnih leh hnam zâtvete kha Jordan râlah khân an rochan tûr a lo pe ta si a; Levi chite erawh chu an zîngah rochan tûr a pe ve lo.

⁴Josefa thlahte chu hnam hnih an ni - Manase leh Ephraim chu. Levi chiteho chu chumi ramah chuan chanpual an pe lo, an awmna tûr khawpuite leh a daivêl ran tlatna tûr hmun leh an in lo khuarna ngawt lo chu.

⁵LALPAN Mosia thu a pêk ang khân Israela thlahte chuan an ti a, ram chu an sem a.

⁶Chutichuan, Juda thlahte chu Gilgal khuaah Josua hnênah an va kal a. Keniz mi Jephunea fapa Kaleba chuan a hnênah, “Kadesh-barnea hmuna Pathian mi Mosia hnêna LALPAN ka chungchâng leh i chungchâng thua a sawi kha i hria a.

⁷LALPA chhiahhlawh Mosian Kadesh-barnea hmun aṭanga ram va enthla tûra mi tirh lai khân kum sawmli mi ka ni tawh a; tin, ka rilrua awm ang chiah chu a hnênah ka thlen leh a.

⁸Amaherawhchu, ka unau ka hnêna kal vete khân mipuite thinlung an tihtuisak a; kei erawh chuan LALPA ka Pathian chu ka pawm tlat a.

⁹Tichuan, Mosian chumi ni chuan, ‘LALPA ka Pathian hi i pawm tlat avângin, i kein a lo rah tâk ram chu kumkhuain nangmah leh i thlahte rochan tûr a ni ngei ngei ang,’ tiin chhia a chham a.

¹⁰Tichuan, ngai teh, LALPAN Mosia hnêna chûng thu chu a sawi achin Israel-hote thlalêra an vah chhûng zawngte khân, LALPAN a sawi tawh angin kum sawmli leh kum nga zet chu mi damtîr a; tichuan, ngai teh, tûnah hian kum sawmriat leh kum nga ka lo ni ta a.

¹¹Chuti chung pawhin tûn thleng pawh hian Mosia mi tirh lai ang mai bawk khân ka la chak reng a, hmâna indo leh chhuahvah nân thahrui ka nei ang bawk khân tûnah pawh hian ka la nei reng asin.

¹²Chutichuan, he tlâng, LALPAN khami nia a lo sawi tawh kha mi pe ta che; khatia Anak-hote an awma, an khawpuite pawh a ropuiin, kulha hung khup a ni tih khami ni khân i hriat kha. LALPA chuan mi awmpuiin, anmahni chu ka hnawt chhuak thei mahna, LALPAN a lo sawi tawh ang khân,” a ti a.

¹³Chutichuan, Josua chuan mal a sâwm a; tin, Jephunea fapa Kaleba chu a rochan atân Hebron khua chu a pe ta a.

¹⁴Tichuan, Hebron khua chu tûn thleng hian Keniz mi, Jephunea fapa Kaleba rochan a lo ni ta a ni; LALPA, Israel-te Pathian chu a pawm tlat avângin.

¹⁵Tin, Hebron khaw hming chu a hma chuan Kiriath-arba a ni; Arba chu Anak-ho zînga mi lian ber a ni. Tichuan, ram chu râlmuangin a awm ta rih a.