Read Mizo_Old_version Josua 15 Bible Online

Josua 15 - Mizo_Old_version bible

Josua 15

¹Tin, Juda thlahte hnam an chhûngkaw zir zêla an chanpuala ruat chu Edom ramri chin chhim lampang, Zin thlalêr thleng hialin, chhim tâwp thleng rakin a ni.

²Tin, chhim lampanga an ramri chin chu Tuifinriat Al tâwp rak, chhim chhawng litengsâwl aṭangin a ni;

³tin, Akrabim chhohna chhim lam panin a kal zêl a, Zin a va thleng a; tin, Kadesh-barnea chhim lamah a chho va, Hezron a va thleng a; tin, Adar-ah a chho va, Karka a kualkhung a.

⁴Azmon-ah a kal zêl a, Aigupta luiah a chhuak a; tichuan, tuifinriat chu ramri tâwp chin chu a ni. Chu chu chhim lampanga in ramri chin tûr chu a ni ang.

⁵Chhak lampang ramri chu tui Tuifinriat Al, Jordan chhuah tak chu a ni. Tin, Hmâr lampang ramri chu tuifinriat litengsâwl, Jordan chhuah aṭangin a ni a.

⁶Ramri chu Beth-hogla-ah a chho va. Beth-araba hmârah a kal zêl a; tin, ramri chu Reubena fapa Bohana lungah a chho zêl a.

⁷Tin, ramri chu Akor ruam aṭangin Debir-ah a chho zêl a, lui chhim lama awm Adumim-a chhohna depa Gilgal lam panin hmâr lamah a kal zêl a. Ramri chu En-semes tuiahte chuan a kal zêl a, En-rogel-ah a chhuak a ni.

⁸Tin, ramri chu Hinoma fapa ruamah Jebus-ho ram sîr chhim lam (chu chu Jerusalem a ni) thlengin a chho va; tin, ramri chu Hinom thlang lampang ruam bula awm tlâng chhîpah a chho va, chu chu Rephaim hmâr lampang ruam tâwp rak a ni.

⁹Tin, ramri chu tlâng chhîp aṭangin Nephtoa lui tuite thlengin an kaltîr a, Ephron tlânga khawpuiahte a kal zêl a; tin, ramri chu Baala-ah (chu chu Kiriath-jearim a ni) an kaltîr a.

¹⁰Tin, ramri chu Baala aṭangin thlang lampangah Seir tlâng thlengin a insawh kual thla leh a, hmâr lampangah Jearim (chu chu Kesalon a ni) tlâng hrûlah a kal zêl a, Beth-semes-ah a chhuk a, Timna lamah a kal zêl a.

¹¹Tin, ramri chu hmâr lampang Ekron hrûlah a kal chhuak a; tin, ramri chu Sikron-ah an kaltîr a; tin, Baala tlângah a kal zêl a, Jabneel-ah a chhuak a; tichuan, ramri chu tuifinriatah a va tâwp a ni.

¹²Tin, thlang lampang ramri chu tuifinriat zau tak leh a kam chin zawng chu a ni. Chûng ramri chin zawng chu a ni, Juda thlahte tâna an chhûngkaw zir zêla ruat chu.

¹³Tin, Jephunea fapa Kaleba chu LALPAN Josua thu a pêk angin, Juda thlahte zîngah chuan chanpual a siamsak ve a, chu chu Kiriath-arba a ni a, Arba chu Anaka pa a ni (chu chu Hebron an ti bawk).

¹⁴Tin, Kaleba chuan chu khua ata chu Anaka fapate pathum - Sesaia te, Ahimana te, Talmaia te, Anaka fate chu a hnawt chhuak a.

¹⁵Tin, chuta ṭang chuan Debir khuaa mite a han rûn a; a hma chuan Debir khaw hming chu Kiriath-sepher a ni.

¹⁶Tin, Kaleban, “Tu pawh Kiriath-sepher han beia, han la thei apiang chu ka fanu Aksi nupuiah ka neihtîr ang,” a ti a.

¹⁷Tin, Kaleba unau Kenaza fapa Othnielan a han la a; tichuan, a fanu Aksi chu nupuiah a neihtîr ta a.

¹⁸Tin, a pasal hnên a va thlen chuan a pa ram dîl tûrin a lo fuih a. Tin, sabengtung ata a chhuk a, Kaleba chuan a hnênah, “Eng nge i duh le?” a lo ti a.

¹⁹Ani chuan, “Eng emaw dîl che ka duh a ni; chhim lam ram ro takah mi awmtîr ta si a, tuikhur mi pe tel bawk tûrin ka ngên a che,” a ti a. Tichuan, tuikhur chhakta leh thlangta chu a pe ta a.

²⁰Chûng chu a ni Juda thlahte hnam an chhûngkaw zir zêla an rochan chu.

²¹Tin, chhima Edom ramri va deptu Juda thlahte hnam khawpui hmâwrtawngte chu Kabzeel te, Eder te, Jagur te,

²²Kina te, Dimona te, Adada te,

²³Kedes te, Hazor te, Ithnan te,

²⁴Ziph te, Telem te, Bealoth te,

²⁵Hazor-hadatta te, Kerioth-hezron (chu chu Hazor a ni) te,

²⁶Amam te, Sema te, Molada te,

²⁷Hazar-gadda te, Heshmon te, Beth-pelet te,

²⁸Hazar-sual te, Beer-sheba te, Biz-iothia te,

²⁹Baala te, Iim te, Ezem te,

³⁰Eltolad te, Kesil te, Horma te,

³¹Ziglag te, Madmana te, Sansanna te,

³²Lebaoth te, Shilhim te, Ain te, Rimon te a ni: khawpui zawng zawngte chu a khawperte nên khaw sawmhnih leh khaw kua a ni.

³³Tin, phai ram lamah chuan Eshtaol te, Zora te, Ashna te,

³⁴Zanoa te, En-ganim te, Tapua te, Enam te,

³⁵Jarmuth te, Adulam te, Soko te, Azeka te,

³⁶Shaaraim te, Adithaim te, Gedera te, Gederothaim te: khawpuite chu a khawperte nên khaw sâwm leh khaw li a ni.

³⁷Zenan te, Hadasha te, Migdal-gad te,

³⁸Dilean te, Mizpe te, Joktheel te,

³⁹Lakis te, Boz-kath te, Eglon te,

⁴⁰Kabbon te, Lahmas te, Kithlis te,

⁴¹Gederoth te, Beth-dagon te, Naama te, Makkeda te: khawpuite chu a khawperte nên khaw sâwm leh khaw ruk a ni.

⁴²Libna te, Ether te, Ashan te,

⁴³Iphta te, Ashna te, Nezib te,

⁴⁴Keila te, Akzib te, Maresa te: khawpuite chu a khawperte nên khaw kua a ni.

⁴⁵Ekron leh a chhehvêl khuate leh a khawperte chu:

⁴⁶Ekron aṭanga tuifinriat thleng hialin Asdod hrûla awm zawng zawng a khawperte nên.

⁴⁷Asdod leh a chhehvêl khuate leh a khawperte chu, Gaza leh a chhehvêl khuate leh a khawperte chu - Aigupta lui leh tuifinriat zau leh a kam chin thlengin.

⁴⁸Tin, tlâng ram lamah chuan Samir te, Jatir te, Soko te,

⁴⁹Danna te, Kiriath-sanna (chu chu Debir a ni) te,

⁵⁰Anab te, Eshtemo te, Anim te,

⁵¹Gosen te, Holon te, Gilo te: khawpuite chu a khawperte nên khaw sâwm leh khaw khat a ni.

⁵²Arab te, Duma te, Eshan te,

⁵³Janim te, Beth-tappua te, Apheka te,

⁵⁴Humta te, Kiriath-arba (chu chu Hebron a ni) te, Zior te: khawpuite chu a khawperte nên khaw kua a ni.

⁵⁵Maon te, Karmel te, Ziph te, Juta te,

⁵⁶Jezreel te, Jokdeam te, Zanoa te,

⁵⁷Kain te, Gibea te, Timna te: khawpuite chu khawperte nên khaw sâwm a ni.

⁵⁸Halhul te, Beth-zur te, Gedor te,

⁵⁹Maarath te, Beth-anoth te, Eltekon te: khawpuite chu a khawperte nên khaw ruk a ni.

⁶⁰Kiriath-baal te (chu chu Kiriath-jearim a ni), Raba te: khawpuite chu a khawperte nên khaw hnih a ni.

⁶¹Thlalêr lamah chuan Beth-araba te, Middin te, Sekaka te,

⁶²Nibshan te, Chi Khawpui te, En-gedi te: khawpuite chu a khawperte nên khaw ruk a ni.

⁶³Jerusalem khuaa mi Jebus-ho erawh chu Juda thlahten an hnawt chhuak thei lo va; chutichuan, Jebus-hote chu Juda thlahte nên tûn thleng hian Jerusalem-ah an la chêng za ta reng a ni.