Read Mizo_Old_version Josua 16 Bible Online

Josua 16 - Mizo_Old_version bible

Josua 16

¹Josefa thlahte chanpual chu, Jeriko zâwn Jordan aṭangin thlalêr kiang, chhak lampanga Jeriko tuiahte chuan a chhuak a, Jeriko aṭang chuan tlâng ramah Bethel thlengin a chho zêl a;

²tin, Bethel aṭangin Luz-ah a chhuak a, Ark-ho ramria Ataroth thlengin a kal zêl a;

³tin, thlang lampangah Japhlet-ho ramri Beth-horon thlangta zâwk ramri, Gezer thlengin a chhuk zêl a, chu chu tuifinriatah a chhuak a.

⁴Tichuan, Josefa thlahte Manase leh Ephraim chite chuan chanpualah an nei ta a.

⁵An chhûngkaw zir zêla Ephraima thlahte ramri chu hetiang hi a ni: chhak lampanga an chanpual ramri chu Ataroth-adar a ni a, Beth-horon chhakta thlengin.

⁶Tin, ramri chu Mikmethath hmârah thlang lampangah a chhuak a; tin, ramri chu chhak lampangah Taanath-silo thlengin a lêt leh a, Janoa chhak lamah a kal zêl a.

⁷Tin, Janoa aṭang chuan Ataroth-ah te, Naara-ah te a chhuk zêl a, Jeriko a thleng a, Jordan-ah a chhuak a.

⁸Tapua aṭangin ramri chu thlang lampangah Kana luitê thlengin a kal a, chu chu tuifinriatah a chhuak a. Chûng chu a ni Ephraima thlahte hnam an chhûngkaw zir zêla an chanpual chu.

⁹Manasea thlahte chanpual zînga Ephraima thlahte tâna khawpui ruat hransakte nên, a khawpui zawng zawngte leh a khawperte pawh.

¹⁰Tin, Gezer-a awm Kanaan-hote chu an hnawt chhuak lo va; Kanaan mite chu Ephraim-hote zîngah tûn thleng hian an la awm a, hnathawka rawih atân chhiahhlawhah an awm ta zâwk a ni.