Read Mizo_Old_version Josua 17 Bible Online

Josua 17 - Mizo_Old_version bible

Josua 17

¹Tin, Manasea thlahte chanpual chu hêng hi a ni, ani chu Josefa fa tîr kha a ni a: Gileada pa, Manasea fa tîr Makira erawh chu indo mi a nih avângin Gilead leh Basan ram chu a nei a.

²Tin, chanpual chu Manasea thlahte dang zawng zawng tân an chhûngkaw zir zêlin a ni: Abiezera thlahte tân te, Heleka thlahte tân te, Asriela thlahte tân te, Sekema thlahte tân te, Hephera thlahte tân te, Semida thlahte tân te; chûngte chu an chhûngkaw zir zêla Josefa fapa Manasea thlah mipate chu an ni.

³Manasea fa Makira, chu mi fa Gileada, chu mi fa Hephera, chu mi fa Zelophehada erawh chuan fapa nei lovin fanu hlîr a nei a ni. Chûng a fanu hmingte chu Malai te, Novai te, Hoglai te, Milkai te, Tirzai te an ni.

⁴Tin, puithiam Eleazara hmaah leh Nuna fapa Josua hmaah leh mi lianhote hmaah an va kal a, “Kan unaute zîngah hian chanpual min pe ve tûrin LALPAN Mosia kha thu a pe a ni,” tiin an sawi a. Chutichuan, LALPA thupêk angin an pa unaute zîngah chuan chanpual a pe ve ta a.

⁵Jordan râla mi Gilead leh Basan ram tiam lovin, Manasea chanpualah hmun sâwm a tlu a,

⁶Manasea fanute chuan a fapate zîngah chanpual an neih ve avâng a ni; tin, Gilead ram chu Manasea fapa dangte chuan an chang a.

⁷Tin, Manasea ramri chu Sekem chhak lama awm Aser aṭanga Mikmethath thlengin a ni; tin, ramri chu ding lampangah En-tapua mite awmna thlengin a kal a.

⁸Tapua ram chu Manasea ta a ni a, Manasea ramri depa Tapua erawh chu Ephraima thlahte ta a ni.

⁹Tin, ramri chu Kana luitêah, luitê chhim lampangah chuan a chhuk thla a. Chûng khawpuite chu Manasea khawpuite zînga mi, Ephraima ta a ni. Manasea ramri chu luite hmâr lampangah a ni a; tin, tuifinriatah a chhuak a.

¹⁰Chhim lampang chu Ephraima ta a ni a, hmâr lampang chu Manasea ta a ni a, tuifinriat chu a ramri a ni. Hmâr lamah chuan Aser thlengin a va ni a, chhak lamah chuan Isakar thlengin a han ni a.

¹¹Isakar leh Aser ramah chuan Manasean Beth-san leh a chhehvêl khuate, Ibleam leh a chhehvel khuate, Dor-a awmte leh a chhehvêl khuate, Endor-a awmte leh a chhehvêl khuate, Taanak-a awmte leh a chhehvêl khuate, Megiddo-a awmte leh a chhehvêl khuate, zo khawsâng pathumte chu a nei a.

¹²Nimahsela, Manasea thlahte chuan chûng khawpuia awmte chu an hnawt chhuak thei lo va; Kanaan mite chu chûng ramah chuan an awm lui tlat mai a.

¹³Tin, heti hi a ni a, Israela thlahte chu an lo chak tâk tial tial chinah chuan, Kanaan-hote chu hnathawka rawih atân an awmtîr a, an hnawt chhuak fai vek ta lo.

¹⁴Tin, Josefa thlahten Josua hnênah, “Engtizia nge maw ni rochun tûr chanpual hmun khat chan khat chauh min pêk bîk ni le, kan tam tehlul nên, LALPA lahin tûn thlengin mal min sâwm nasa hle mai si nên?” tiin an sawi a.

¹⁵Tin, Josuan an hnênah, “In tam ahnu, Periz-hote leh Rephaim-ho ramngawte khi in awm nân han ṭhiat ta che u; Ephraim tlâng ram hi in tân a chêp luattuk si chuan,” a ti a.

¹⁶Tin, Josefa thlahte chuan, “Tlâng ram hi kan tân a tâwk lo a ni; phai rama Kanaan-ho chêng zawng zawng, Beth-san leh a khawpuia awmte leh Jezreel ruama awmte hian thîrtawlailîr an nei ṭheuh bîk a,” an ti a.

¹⁷Tin, Josuan Josefa chhûngte, Ephraima leh Manasea thlahte hnênah chuan, “In tam hle a, chak pawh in chak bawk a; chutichuan, chan khat chauh zawng in nei lo vang chu;

¹⁸tlâng ram khi in tân ni ang hmiang. Ramngaw mah ni sela, in ṭhiat ang a, a ram chin zawng chu in ta a ni dâwn nia; Kanaan-hote chuan thîrtawlailîrte neiin, chak hle mah sela, in la hnawt chhuak dâwn a ni,” tiin a sawi a.