Read Mizo_Old_version Josua 18 Bible Online

Josua 18 - Mizo_Old_version bible

Josua 18

¹Tin, Israela thlah mipuiho zawng zawng chu Silo khuaah an inkhâwm chiam a, chutah chuan inbiakna puan in an zâr a. Ram chu an thuhnuaiah a lo awm ta a.

²Tin, Israela thlahte zîngah chuan an chanpual la sem ve loh hnam sarih an la awm a.

³Tichuan, Josuan Israela thlahte hnênah chuan, “LALPA in thlahtute Pathianin a lo pêk tawh che u ram hi eng chen nge luah lova in la muan dâwn le?

⁴Hnam hrang ṭheuhva mi, mi pathum zêl inthlang chhuak ula, anni chu ka lo tîr ang a; anni chu an thawk ang a, ram chu an va fang ang a, an chanpual tâwk tûr ang ṭheuh zêlin an va ziak ang a; tin, ka hnênah an lo kîr leh ang.

⁵Tin, hmun sarihah an ṭhen phawt ang a. Juda-ho chu chhim lamah an chanpualah an awm ang a; tin, Josefa chhûngte chu hmâr lamah an chanpualah an awm ang.

⁶Ram chu hmun sarihah va ṭhen ula, chumi ziak chu mi rawn pe ang che u; tichuan, hetah hian LALPA kan Pathian hmaah ṭhum ka lo vâwrsak ang che u.

⁷Levi-ho hi zawngin in zîngah hian chanvo an nei ve lo va, LALPA puithiam hna hi an chanpual a ni si a. Tin, Gad-ho te, Reuben-ho te leh Manase hnam zâtvete kha zawngin Jordan râl chhak lamah khân, an chanpual chu LALPA chhiahhlawh Mosian a lo pêk kha an lo chang tawh a,” a ti a.

⁸Tichuan, chung mite chu an thawk chhuak ta a; tin, ram chanchin va ziak chhuak tûrte chu Josuan, “Ram chu va fang ta ula, rawn ziak chhuak ula, ka hnênah rawn thlen leh ula, hetah Silo khuaah hian LALPA hmaah ṭhum ka lo vâwrsak ang che u,” tiin thu a pe a.

⁹Tin, mite chu an kal a, ram chu an va fang a, hmun sarihah an ṭhen a, lehkhabuah a khuain an ziak chhuak a; riahhmun Silo-ah chuan Josua hnênah an kal leh a.

¹⁰Tin, Josuan Silo-ah chuan LALPA hmaah ṭhum a lo vâwrsak a, chutah chuan Josuan Israela thlahte chu an inṭhen dân ang zêl chuan ram chu a sem ta a.

¹¹Tin, ṭhumvâwr chu Benjamina thlahte hnam an chhûngkaw zir zêlin an chungah a tlu ta a; tin, an ramri chin chu Juda thlahte leh Josefa thlahte inkâr a ni.

¹²Hmâr lampanga an ramri chin chu Jordan aṭangin a ni; ramri chu Jeriko sîrah hmâr lampangah a chho zêl a; tin, thlang lampangan tlâng ramah a chho zêl a; ramri tâwpna chu Beth-aven thlalêrah a ni.

¹³Ramri chu chuta ṭang chuan Luz lamah, Luz (chu chu Bethel a ni) sîrah, chhim lampangah a kal zêl a; tin, ramri chu Beth-horon thlangta chhim lampanga tlâng hrûlah, Ataroth-adar-ah a chhuk a.

¹⁴Tin, ramri chu a kal zêl a, Beth-horon chhim lampanga tlâng bul aṭang chuan thlang lama chhim lampangah a kual phei a; chu chu Kiriath-baal (chu chu Kiriath-jearim a ni), Juda thlahte khawpuiah a tâwp a. Chu chu thlang lampang ram chu a ni.

¹⁵Tin, chhim lampanga ram chu Kiriath-jearim tâwp aṭangin a ni; tin, ramri chu thlang lamah a chhuak a, Nephtoa lui tuiahte chuan a kal zêl a.

¹⁶Tin, ramri chu Rephaim hmâr lampang ruama Hinoma fapa ruam bula tlâng hmâwrah chuan a chhuk a, Jebus-ho sîrah, chhim lampangah Hinom ruamah a chhuk a, En-rogel-ah a chhuk a.

¹⁷Tin, hmâr lam zâwngin a kal a, En-semes-ah a kal a, Adumim chhohna dep Geliloth-ah a kal a; tin, Reubena fapa Bohana lungah a chhuk a.

¹⁸Tin, Araba sîr hmâr lampangah a kal zêl a, Araba-ah a chhuk a.

¹⁹Tin, ramri chu Beth-hogla sîr, hmâr lampangah a kal zêl a; tin, ramri tâwpna chu Jordan chhim tâwp, Tuifinriat Al hmâr litengsâwlah a ni. Chu chu chhim lam ramri a ni. Jordan chu chhak lampanga ramri chin a ni.

²⁰Chu chu a ni, Benjamina thlahte an chhûngkaw zîr zêla an chanpual ramin a hual chhûng chu.

²¹Tichuan, Benjamina thlahte an chhûngkaw zir ang zêla an khawpuite chu Jeriko te, Beth-hogla te, Emek-keziz te,

²²Beth-araba te, Zemaraim te, Bethel te,

²³Avim te, Para te, Ophra te,

²⁴Kephar-amoni te, Ophni te, Geba te: khawpui sâwm leh pahnih a khawperte nên;

²⁵Gibeon te, Rama te, Beeroth te,

²⁶Mizpe te, Kephira te, Moza te,

²⁷Rekem te, Irpeel te, Tarala te,

²⁸Zela te, Eleph te, Jebus te (chu chu Jerusalem a ni), Gibeath te, Kiriath te a ni: khawpui sâwm leh pali, a khawperte nên. Chu chu a ni, Benjamina thlahte an chhûngkaw zir zêla an chanpuala ruat chu.