Read Mizo_Old_version Josua 2 Bible Online

Josua 2 - Mizo_Old_version bible

Josua 2

¹Tin, Nuna fapa Josua chuan, “A ram leh Jeriko khuate chu va en vêl teh u,” tiin mi pahnih, Sitim hmun aṭangin a rûk tein enthlatu atân a tîr a. Tin, an va kal a, nawhchizuar pakhat, a hming Rahabi inah an va lût a, chutah chuan an thleng ta a.

²Tin, miin, “Ngai teh, zâninah hian ram en thlîthlai tûrin Israela thlahte an lo kal e,” tiin Jeriko khaw lal chu an hrilh a.

³Tin, Jeriko khaw lal chuan, “I ina lo thleng mikhualte kha han hruai rawh, ram pum pui en thlîthlai tûra lo kal an ni e,” tia hrilh tûrin Rahabi hnênah mi a tîr a.

⁴Tichuan, hmeichhia chuan mi pahnihte chu a hruai a, a thukru a; tin, an hnênah, “Ni, mite chu ka hnênah chuan an lo kal ngei mai a; nimahsela, khawi aṭanga lo kal nge an nih zawng ka hre lo.

⁵Tin, heti hi a ni a, khaw thim, kulh kawngka khâr hun dâwn lai vêl khân chu mite chu an chhuak leh ta a. Khawi lamah nge an kal tâk pawh ka hre lo; ûm thuai ula, in la ûmpha ang e,” a ti a.

⁶Nimahsela, in chungah a hruai chho va, in chungah a ziza kûng tian khâwm zîngah a thukru a ni a.

⁷Tin, mite chuan Jordan lui lamah, kai thlengin an ûm ta a; tin, a ûmtute chu an chhuah veleh kulh kawngka chu an khâr ta a.

⁸Tin, an mut hmain in chungah an hnênah chuan a han kal a,

⁹chu mite hnênah chuan, “He ram hi LALPAN a pe tawh che u a.

¹⁰Aigupta ram ata in lo chhuah khân LALPAN Tuifinriat Sen kha a tihkangsak che u a, Jordan lui râla Amor-ho lal pahnih, Sihona leh Oga-te in tihboral tâk hlauh dân te kan lo hria a.

¹¹Chu chu kan lo hriat veleh kan hlau va; mi tinin an hlau che u a, an zâm zo ta, nangmahni avang hian zâm lo rêng an awm lo, LALPA in Pathian chu chung lam vânah leh hnuai lam leiah Pathian a ni si a.

¹²Chutichuan, hei in chungah hian ka khawngaihzia che u ka lo lantîr ta a ni a, nangni pawhin ka pa chhûngte chungah in khawngaihna chu rawn lantîr ve ula,

¹³ka nu leh ka pa te, ka nuṭate, ka laizâwnte leh an neih apiangte chu zuah ula, thihna lak ata kan nunna hi min chhanhimsak tûrin, LALPA hming chhâlin khawngaih takin ka hnênah chhia chham ula, chhinchhiahna takmeuh mi siamsak rawh u khai,” a ti a.

¹⁴Tin, mite chuan a hnênah, “Kan thiltih hi i sawi chhuah dâwn loh chuan in thih ai kan thi ang; tichuan, heti hi a ni ang a, LALPAN ram hi min pêk hunah kan khawngaih chein, i chungah rinawm takin kan ti ang e,” an ti a.

¹⁵Chutichuan, tukverhah hruizênin a thlâk thla ta a, a in chu khawpui kulh tlânga awm a ni si a; kulh chungah chuan a awm a ni.

¹⁶Tin, an hnênah chuan, “Tlâng lam panin kal tawh u khai; chuti lo chuan, a ûmtute che u khân an hmu hlauh dah ang che u. Chutah chuan ni thum va biru ang che u, a rawn ûmtu che u an kîr leh hma loh chuan. Chumi zawhah erawh chuan in kal leh dâwn nia,” a ti a.

¹⁷Tin, mite chuan a hnênah, “I chhe min chhamtîr ngawt hi zawngin thiam loh min chantîr dâwn mai hauh lo a nia.

¹⁸Ngai teh, he rama kan lo luh hian he la sen hi i mi thlâkna tukverhah hian lo ṭâwn bet ang che; tin, in chhûngah i hnênah i pa te, i nu te, i nuṭate leh i pa chhûngte zawng zawng chu hruai lût vek ang che.

¹⁹Tin, heti hi a ni ang a, tu pawh i in kawngka aṭanga khawlaia chhuak apiang chu ama lu chungah a thisen chu a awm ang a, keini zawng thiam loh changin kan awm lo vang. Tin, tu pawh in chhûnga i hnêna awm apiangte chu an chunga kut an thlâk chuan, kan lu chungah thisen chu a awm ang.

²⁰Amaherawhchu, kan thiltih hi i sawi chhuah chuan chhia min chhamtîrnaah hian thiam loh changin kan awm lo vang,” an ti a.

²¹Ani chuan, “In thu ang zêl chuan ni ang hmiang,” a ti a. Tichuan, anni chu a kaltîr ta a, an kal ta a. Tin, tukverhah chuan la sen chu a ṭâwn bet a.

²²Tichuan, an kal ta a, tlâng chu an va thleng a, chutah chuan ni thum, a ûmtute chu an kîr leh hma loh chu an va awm a. A ûmtute chuan kawng tluanin an zawng a; nimahsela, an hmu zo lo va.

²³Chutichuan, mi pahnihte chu an kîr leh a, tlâng ata chu an chhuk a, an kân a, Nuna fapa Josua hnên chu an va thleng a; an chunga thil thleng zawng zawng chu an hrilh a.

²⁴Tin, Josua hnênah chuan, “LALPAN a ram pum pui chu kan kutah a lo pe takmeuh mai; chu chang a ni lo va, chumi rama chêng zawng zawng chu kan hmaah an tui zêl mai a ni,” an ti a.