Read Mizo_Old_version Josua 20 Bible Online

Josua 20 - Mizo_Old_version bible

Josua 20

¹Tin, LALPAN Josua chu a bia a,

²“Israela thlahte hnênah hian, ‘Inhumhimna khuate siam rawh u khai, Mosia hmanga in hnêna ka sawi tawh kha:

³tu pawh hre lova mi lo that palhtu chu, chutah chuan a tlân lût thei dâwn nia; tichuan, thisen phuba latu lakah chuan in tân inhumhimna a ni ang.

⁴Chûng khawpuite zînga a engah emaw chuan a tlân ang a, khawpui kulh kawngka luhnaah a va ding ang a, chumi khaw upaho beng hriatah a chanchin chu a va thlen ang a; tin, anni chuan khaw chhûngah an hnênah an hruai lût ang a, an zînga a chên ve theihna tûrin awmna tûr chu an ruatsak ang.

⁵Tin, thisen phuba latuin a rawn ûm chuan, a thattu chu a kutah an lo pe tûr a ni lo; a ṭhenawm chu hre lovin a that a ni a, tûn hmain huatna a nei si lo va.

⁶Mipui hmaa rorêlsak tûra a din hma leh, chûnglaia puithiam lala awma chu a thih hma loh chuan chumi khuaah chuan a awm reng tûr a ni; tin, chumi hunah chuan mi thattu chu ama khaw chhûng ngei, a tlan chhuahsan khua, ama in chhûngah ngei chuan a lût leh tûr a ni,’ tiin sawi ang che,” tiin.

⁷Tichuan, Naphtali tlâng rama Galili-a Kadesh khua te, Ephraim tlâng rama Sekem khua te, Judai tlâng rama Kiriath-arba khua (chu chu Hebron a ni) te chu an ruat ta a.

⁸Tin, chhak lamah Jordan râlah Jeriko-ah chuan Reuben hnam rama thlalêr phaizâwla Bezer khua te, Gad hnam rama Gilead rama Ramoth khua te, Manase hnam rama Basan rama Golan khua te an ruat a.

⁹Chûng khuate chu a ni, Israela thlahte zawng zawng leh an zînga hnam dang awmte tâna ruat chu: tu pawh mi that palhtu chu chutah chuan a tlân luha, mipuite hmaa a din zet hma loh chuan thisen phuba latu kuta a thih lohna tûrin.