Read Mizo_Old_version Josua 21 Bible Online

Josua 21 - Mizo_Old_version bible

Josua 21

¹Tichuan, Levi chi chhûngkaw puipate chu puithiam Eleazara hnênah leh Nuna fapa Josua hnênah leh Israela thlahte hnam chhûngkaw puipate hnênah te chuan an va kal a;

²Kanaan rama Silo khuaah chuan, “LALPAN Mosia hmangin kan awmna tûr khawpuite, kan ran tlatna tûr a daivêlte nên min pe tûrin thu a lo pe tawh asin,” tiin an sawi a.

³Chutichuan, Israela thlahte chuan LALPA thupêk angin an chanpual ata chûng khawpuite chu a daivêlte nên Levi chite an pe a.

⁴Tin, ṭhumvâwr chu Kohath mite hnam chungah a tlu ta a; tichuan, puithiam Arona thlah Levi chia mite chuan Juda hnam chanpuala mi te, Simeon hnam chanpuala mi te, Benjamin hnam chanpuala mi te khawpui sâwm leh pathum ṭhumvâwrin an chang ve a ni.

⁵Tin, Kohatha thlah dangte chuan Ephraim hnam thlahte chanpuala mi te, Dan hnam chanpuala mi te, Manase hnam zâtvete chanpuala mi te khawpui sâwm ṭhumvâwrin an chang ve a ni.

⁶Tin, Gersona thlahte chuan Isakar hnam thlahte chanpuala mi te, Aser hnam chanpuala mi te, Naphtali hnam chanpuala mi te, Basan rama Manase hnam zâtvete chanpuala mi te, khawpui sâwm leh pathum ṭhumvâwrin an chang ve a.

⁷Meraria thlahte chuan an chhûngkaw zir zêlin Reuben hnam chanpuala mi te, Gad hnam chanpuala mi te, Zebulun hnam chanpuala mite khawpui sâwm leh pahnih an chang ve a.

⁸Tin, Israela thlahte chuan LALPAN Mosia hmanga thu a pêk ang khân, Levi mite chu khawpuite leh a daivêlte chu ṭhumvâwrin an pe a.

⁹Tin, Juda thlahte hnam chanpuala mi te, Simeona thlahte hnam chanpuala mi te chu an pe a, hêng khawpui a hming lamte hi:

¹⁰chûng chu Levia thlah, Kohath-ho hnam te, Arona thlahteho ta tûr a ni; ṭhumvâwr chu an chungah a tlu hmasa ber rêng a.

¹¹Tin, Judai tlâng rama Kiriath-arba khua chu a daivêlte nên an pe a, chu Arba chu Anaka pa a ni a (chu chu Hebron a ni).

¹²Khawpui chhehvêlte leh a khawperte erawh chu Jephunea fapa Kaleba chanpual atân an pe a.

¹³Tin, puithiam Arona thlahte chu Hebron, mi thattute inhumhimna khawpui chu a daivêlte nên, Libna khua a daivêlte nên,

¹⁴Jatir khua a daivêlte nên, Estemoa khua a daivêlte nên,

¹⁵Holon khua a daivêlte nên, Debir khua a daivêlte nên,

¹⁶Ain khua a daivêlte nên, Juta khua a daivêlte nên, Beth-semes khua a daivêlte nên: chûng hnam hnihte chanpuala mi khawpui pakuate chu an pe a.

¹⁷Tin, Benjamin hnam chanpuala mi chu Gibeon khua a daivêlte nên, Geba khua a daivêlte nên,

¹⁸Anathoth khua a daivêlte nên, Almon khua a daivêlte nên: khawpui pali an pe bawk a.

¹⁹Arona thlah, puithiamho khawpui zawng zawng chu khawpui sâwm leh pathum a ni, a daivêlte nên.

²⁰Tin, Kohatha thlahte chhûngkua, Levi-ho, Kohatha thlah dangte pawh chuan an chanpual khawpuite chu Ephraim hnam chanpuala mi a ni an neih ni.

²¹Tin, mi thattute inhumhimna khawpui Ephraim tlâng rama Sekem chu a daivêlte nên, Gezer khua a daivêlte nên,

²²Kibzaim khua a daivêlte nên, Beth-horon khua a daivêlte nên: khawpui pali an pe a.

²³Tin, Dan hnam chanpuala mi Elteke khua a daivêlte nên, Gibethon khua a daivêlte nên,

²⁴Aijalon khua a daivêlte nên, Gath-rimon khua a daivêlte nên: khawpui pali.

²⁵Tin, Manase hnam zâtvete chanpuala mi Taanak khua a daivêlte nên, Gath-rimon khua a daivêlte nên: khawpui pahnih.

²⁶Kohatha thlah dangte hnam khawpui zawng zawng chu khaw sâwm a ni, a daivêlte nên.

²⁷Tin, Gersona thlahteho, Levi hnamte chu Manase hnam zâtvete chanpuala mi, mi thattute inhumhimna khawpui, Basan rama Golan chu a daivêlte nên, Be-estara khua a daivêlte nên: khawpui pahnih an pe a.

²⁸Tin, Isakar hnam chanpuala mi Kision khua a daivêlte nên, Daberath khua a daivêlte nên,

²⁹Jarmuth khua a daivêlte nên, En-ganim khua a daivêlte nên: khawpui pali.

³⁰Tin, Aser hnam chanpuala mi Misal khua a daivêlte nên, Abdon khua a daivêlte nên,

³¹Helkath khua a daivêlte nên, Rehob khua a daivêlte nên: khawpui pali.

³²Tin, Naphtali hnam chanpuala mi, mi thattute inhumhimna khawpui, Galili rama Kadesh chu a daivêlte nên, Hamoth-dor khua a daivêlte nên, Kartan khua a daivêlte nên: khawpui pathum.

³³Gerson-ho an chhûngkaw zir zêla an chanpual khawpui zawng zawng chu khawpui sâwm leh pathum a ni, a daivêlte nên.

³⁴Tin, Meraria thlahteho chhûngkua, Levi-ho dangte chu Zebulun hnam chanpuala mi Jokneam khua a daivêlte nên, Karta khua a daivêlte nên,

³⁵Dimna khua a daivêlte nên, Nahalal khua a daivêlte nên: khawpui pali.

³⁶Tin, Reuben hnam chanpuala mi Bezer khua a daivêlte nên, Jahaz khua a daivêlte nên,

³⁷Kedemoth khua a daivêlte nên, Mephaath khua a daivêlte nên: khawpui pali.

³⁸Tin, Gad hnam chanpuala mi, mi thattute inhumhimna khawpui, Gilead rama Ramoth a daivêlte nên, Mahanaim khua a daivêlte nên,

³⁹Hesbon khua a daivêlte nên, Jazer khua a daivêlte nên: a vaiin khawpui pali.

⁴⁰Chûng zawng zawng chu Levi-ho chhûngkaw dang, Meraria thlahteho an chhûngkaw zir zêla an khawpuite chu a ni; tichuan, an chanpual chu khawpui sâwm leh pahnih a ni.

⁴¹Israela thlahteho chanpuala mi Levi-ho khawpui zawng zawng chu khawpui sawmli leh pariat a ni, a daivêlte nên.

⁴²Chûng khawpuite chuan daivêl a nei ṭheuh a ni; chûng khawpui zawng zawng chu chutiang vek chu a ni.

⁴³Chutichuan, LALPAN an thlahtute chhechhama pêk a lo tiam tâk ram zawng zawng chu Israel-te chu a pe a; tichuan, ram chu an luah a, awmhmun an khuar ta a.

⁴⁴Tin, LALPAN an thlahtute hnêna chhechhama a lo tiam tawh ang ngei khân hmun tinah muanna a pe a. An hmêlma zawng zawngte chu tu mah an hmaa ṭang thei rêng rêng an awm lo; LALPAN an hmêlma zawng zawngte chu an kutah a pe vek a.

⁴⁵LALPAN Israela chhûngte hnêna a ṭha lam thu a lo sawi zawng zawng kha thlâwn rêng rêng a awm lo va, a lo thleng vek a ni.