Read Mizo_Old_version Josua 22 Bible Online

Josua 22 - Mizo_Old_version bible

Josua 22

¹Chutichuan, Josuan Reuben-hote, Gad-hote, Manase hnam zâtvete chu a ko va,

²an hnênah, “LALPA chhiahhlawh Mosian thu a pêk apiang che u in pawm zêl a, thu ka pêk apiang che u pawh in pawm zêl a.

³Hei leh chen hi vawiin thlengin in unauteho chu in thlahthlam lo va, LALPA in Pathianin tih tûra thu a pêk che u in zâwm ṭhîn a.

⁴Tichuan, LALPA in Pathianin an hnêna a lo sawi tawh ang khân in unaute hi muanna a lo pêk tâk hi; chuvângin, LALPA chhiahhlawh Mosian Jordan râla in chanpual atâna ram a lo pêk tâk che uah khân, in puan in lamah te chuan haw leh tawh u.

⁵LALPA chhiahhlawh Mosian LALPA in Pathian chu hmangaiha, a kawng zawng zawng chu zawha, a thupêkte chu pawma, amah chu vuan tlata, in thinlung zawng zawng leh in thlarau zawng zawnga a rawngbâwl tlat tûra thu a lo pêk che u kha, chu thupêk leh dânte chu fîmkhur takin vawn ṭhat tum phawt mai ang che u,” a ti a.

⁶Chutichuan, Josuan anmahni chu mal a sâwm a, a kaltîr ta a; tichuan, an puan in lamahte an haw ta a.

⁷Tin, Manase hnam zâtvete kha Mosian Basan ramah chanpual a pe a; a zâtve dangte kha erawh chu Josuan thlang lampang Jordan râlah an unaute zîngan chanpual a pe zâwk a. Tin, Josuan an in lama a hâwtîr dâwn lai khân mal a sâwm a,

⁸an hnênah, “In puan in lamahte chuan hausa takin haw ta ula, ran tam tak nên, tangkarua te nên, rangkachak te nên, dâr te nên, thîr te nên, silhfên tam tak te nên. In hmêlmate laka in râllâkte kha in unaute nên insem tlâng rawh u,” tiin a sawi a.

⁹Tin, Reubena thlahte leh Gada thlahte leh Manase hnam zâtvete chu an kîr leh a, Kanaan ram Silo khua ata chu Israela thlahte hnên aṭang chuan Gilead ram, LALPAN Mosia hmanga thu a lo pêk tâk ang khân, an chanpual rênga lo ruat tawh rama kal tûrin an chhuak ta a.

¹⁰Tin, Kanaan rama Jordan bial an va thlen chuan Reubena thlahte leh, Gada thlahte leh, Manase hnam zâtvete chuan Jordan lui kamah chuan maichâm lian pui, langsâr tak an siam ta a.

¹¹Tin, Israela thlahte chuan, “Ngai teh u, Reubena thlahte leh Gada thlahte leh, Manase hnam zâtvete khân Kanaan ram bul tak, Jordan bial, Israela thlahte ram lampangah maichâm an siam e,” tia mi sawi an hria a.

¹²Tin, chu chu Israela thlahte chuan an lo hriatin, Israela thlah mipuiho zawng zawng chu anmahni han do tumin Silo khuaah an inkhâwm ta chiam a.

¹³Tin, Israela thlahte chuan Gilead rama Reubena thlahte leh, Gada thlahte leh, Manase hnam zâtvete hnênah chuan puithiam Eleazara fapa Phinehasa an tîr a,

¹⁴a hnênah mi lian sâwm, Israel-ho hnam zînga chhûngkaw puipa ber pakhat zêl nên; chûngte chu Israel-ho hnam zinga an chhûngkaw puipa bêr zêlte an ni.

¹⁵Tin, Reubena thlahte leh, Gada thlahte leh, Manase hnam zâtvete hnênah Gilead ramah chuan an kal ta a, an hnênah,

¹⁶“LALPA mipuiho zawng zawngin, ‘Israel-te Pathian chungah eng nge maw in tihsual le, LALPA chungah vawiinah hian hel tuma maichâm siamin vawiinah hian LALPA chu in hawisan le?

¹⁷Peor hmuna bawhchhiatna te kha kan tân tê luaah ngaih theih em ni? Tûn thleng pawh hian khâng kan sualte kha kan la intlêng fai zo lo a ni a, LALPA mipuiho zîngah khân hri kha a lêng nachungin,

¹⁸vawiinah hian LALPA chu hawisan in tum chu le? Tichuan, vawiina LALPA chunga in lo hel ta mai hi, naktûkah zawng Israel mipuiho zawng zawng chungah a thinrim ngei dâwn mai.

¹⁹Amaherawhchu, in ram luah hi a bawlhhlawh chuan, LALPA ram chhûng, LALPA biakbûk awmna hmunah lo kal ve mai ula, kan zîngah chêng ve ta mai che u; amaherawhchu, LALPA kan Pathian maichâm tih loh maichâm dang siam zâwngin LALPA chungah hel suh ula, kan chungah pawh hian hel ma ta che u.

²⁰Zera fapa Akana khân hluihlâwn thilah khân thil a tisual a, Israel mipuiho zawng zawng chungah khân thinurna a tla a ni lâwm ni kha? Kha mi kha ama bawhchhiatnaah amah ngawtin a boral bîk loh kha,’ an ti asin,” tiin an sawi a.

²¹Chutichuan, Reubena thlahte leh, Gada thlahte leh, Manase hnam zâtvete chuan Israel-ho hnam puipate chu an chhâng a, an hnênah,

²²“LALPA, pathiante Pathian, LALPA, pathiante Pathian chuan a hria a, Israel-ho pawhin an hria ang; kan maichâm siam hi LALPA hawisan tuma, hel tumna emaw, thil tihsual tumna emawa siam kan nih chuan (vawiinah pawh hian min zuah lo mai rawh), hâlral thilhlan nân emaw, ei tûr thilhlan nân emaw, remna thilhlan nân emaw a nih chuan, amah LALPA ngeiin rawn ngaihtuah ang hmiang.

²⁴Nakin hnuah hian in thlahten kan thlahte hnênah hian, ‘Nangnin LALPA, Israel-te Pathian hi enga in hman phâk vena nge maw awm ni?

²⁵Nangni Reubena thlahte leh Gada thlahte u, LALPAN keini leh nangni tân Jordan hi ramri china a siam asin ni. LALPAah hian chanpual in nei ve hlei nêm,’ an la rawn ti hlauh dah ang e, tia fîmkhur avânga tih chhan nei taka ti kan ni asin. In thlahtehovin kan thlahte chu LALPA ṭih nachâng hre lovin an la siam mai thei asin.

²⁶Chuvângin, ‘Hawh u, maichâm i siam teh ang u, hâlral thilhlan nân leh inthawi nân erawh chu ni lovin;

²⁷keini leh, nangni leh, kan hnua kan thlahteho kârah hriatna a ni ang a; tichuan, kan hâlral thilhlante leh kan inthawinate leh, kan remna thilhlante hian LALPA rawng kan bâwl theih nân leh, an thlahte pawhin nakinah kan thlahte hnênah chuan, LALPAah chanpual in nei ve lo ve, an la tih loh nân,’ kan ti a ni.

²⁸Chuvângin, ‘Heti hi a ni ang a, nakin hnuah te kan hnênah emaw, kan thlahte hnênah emaw chutianga an la rawn tih huna keinin, “En ta che u, kan thlahtuten LALPA maichâm awm dân an siam hi, hâlral thilhlanna tûr leh inthawina tûr a ni lo ve; keini leh nangni kârah hriatna a ni zâwk e,” kan la tih atân,’ kan ti asin.

²⁹LALPA chungah chuan helin, vawiinah hian LALPA hawisana, LALPA kan Pathian maichâm, a biakbûk bula maichâm ngawt lo hi hâlral thilhlan nân emaw, ei tûr thilhlan nân emaw, inthawi nân emawa maichâm siam kan nih lohzia mai chu,” an ti a.

³⁰Tin, puithiam Phinehasa leh a hnêna awm mipuiho mi lian, Israel-ho hnam puipate chu, Reubena thlahte leh Gada thlahte leh Manasea thlahte thusawi an hriat chuan a tilâwm ta hle a.

³¹Tin, puithiam Eleazara fapa Phinehasa chuan Reubena thlahte leh Gada thlahte leh Manasea thlahte hnênah chuan, “LALPA chungah thil in tihsual loh avângin, tûnah zawng LALPA chu kan zîngah a awm ngei a ni tih kan hre ta alâwm. Tichuan, Israela thlahte hi LALPA kut ata in chhanchhuak ta a nih hi,” a ti a.

³²Chutichuan, puithiam Eleazara fapa Phinehasa leh mi lianho chu Reubena thlahte leh Gada thlahte hnên aṭang chuan, Gilead ram ata chu Kanaan ram lamah Israela thlahte hnên lamah chuan an haw leh ta a, thu chu an va thlen leh a.

³³Tin, chûng thu chuan Israela thlahte chu a tilâwm hle a, Israela thlahte chuan Pathian chu an fak ta a; Reubena thlahte leh Gada thlahte chu han dova, an awmna ram han tihchhiatsak thu te chu an sawi leh ta lo va.

³⁴Reubena thlahte leh Gada thlahte chuan chu maichâm chu Ed an ti a, “LALPA chu Pathian a lo ni ngei mai tih kan kârah hian hriatna a nih hi,” an ti a ni.