Read Mizo_Old_version Josua 23 Bible Online

Josua 23 - Mizo_Old_version bible

Josua 23

¹Tin, heti hi a ni a, kum eng emaw zât a lo vei hnua, LALPAN Israel-hote chu an kiang vêla hmêlma zawng zawngte laka muanna a pêk hnu chuan, Josua pawh chu a lo upain a lo tar ta hle a.

²Tichuan, Josuan Israel-ho zawng zawngte, an upate leh an puipate, an rorêltute leh an hotute chu a kohtîr a, an hnênah, “Kei zawng ka lo upain ka lo tar ta.

³LALPA in Pathianin nangmahni avânga hêng hnam zawng zawngte chunga a tih dân hi in hmu a; LALPA in Pathianin, amah ngeiin a ni dosak che u ni.

⁴Ngai teh u, hêng hnam a la awmate hi hêng hnam ka tihbo tâkho zawng zawng ramte nên hian, Jordan aṭanga ni tlâkna lam Tuifinriat Zau thleng rakin in chite rochanah ka ruatsak a che u.

⁵Tin, LALPA in Pathianin in hmaah hian a hnawt chhuak ang a, in hmuh phâk lohvah a hnawt bo vek ang a; tichuan, LALPA in Pathianin in hnêna a sawi tawh ang khân an ram chu in nei dâwn nia.

⁶Chuvângin, Mosia dân lehkhabua ziak zawng zawngte hi ding lamah emaw, vei lamah emaw in pênsan hauh loh nân huai takin pawm ula, ti rawh u;

⁷hêng hnam in zînga la awmate nên hian inchiahpiah lova, an pathiante hming pawh lam lova, an hming chhâla chhia chham lova, an rawng pawh bâwl lova, kûna chibai in bûk hek loh nân, vawiin thlenga in la tih cheu ṭhin ang hian,

⁸LALPA in Pathian chu vuan tlat zawk ṭhîn ang che u.

⁹LALPAN in hmaah chi ropui tak leh chak takte chu a hnawh chhuah tâk vek hi; nangni hmaah zawng vawiin thlengin tu mah ṭang thei rêng rêng an awm loh hi.

¹⁰In zînga mi pakhatin mi sângkhat a ûm ang; in hnêna a lo sawi tawh angin, LALPA in Pathian hian a ni, dosak ṭhîn che u ni.

¹¹Chutichuan, LALPA in Pathian chu hmangaih tûrin fîmkhur ṭha hle rawh u.

¹²Chuti lo chuan, in hawisan hlauhva, hêng hnam, la awmho in zînga la chêng rengte hi in kûngkaiha, anmahni nêna nupui pasala in inneiha, anmahni chu in pâwla, anni pawhin an pâwl vaih che u zawngin,

¹³LALPA in Pathianin hêng hnamte hi in mit hmuhah chuan a hnawh chhuahsak dâwn tawh tawp lo che u a. LALPA in Pathianin ram ṭha tak a pêk che u ata hi in boral vek hma loh chuan, anmahni chu in tân thang leh fal leh, in nâk atâna vuakna tiang leh, in mit atâna hlîng an lo ni zâwk ang tih chiang takin hre rawh u.

¹⁴“Tin, ngai teh u, tûnah hian leilung zawng zawng dân angin ka kal ve dâwn ta a ni. LALPA in Pathianin in chungchâng a ṭha lam a lo sawi tawh zawng zawngte kha thlâwn pakhat mah a awm lo tih chu in thinlung zawng zawng leh in rilru zawng zawngin in hria e; in chungah a lo thleng ta vek a, pakhat mah thlâwn a awm lo ve.

¹⁵Tin, heti hi a ni ang a, LALPA in Pathianin thil ṭha in hnêna a sawi zawng zawngte kha in chunga a lo thleng ta vek ang bawk hian, LALPA in Pathianin he ram ṭha tak a pêk che u ata hi a tihboral vek hma loh che u chuan, LALPAN thil ṭha lote in chungah a la rawn thlentîr ve ang.

¹⁶LALPA in Pathian thuthlung, pawm tûra a pêk che u hi in bawhchhiata, pathian dangte rawng in bâwla, kûna chibai in bûk chuan, LALPA thinurna chu in chungah a ling ang a, ram ṭha tak a pêk che u ata hi in boral thuai mai ang,” a ti a.