Read Mizo_Old_version Josua 4 Bible Online

Josua 4 - Mizo_Old_version bible

Josua 4

¹Tin, heti hi a ni a, a hnam pum pui chuan Jordan lui an kai fai vek hnuin LALPAN Josua hnênah chuan,

²“Mipuite zînga mi hi mi sâwm leh pahnih, hnam tina mi pakhat zêl thlang chhuak langin,

³an hnênah, ‘Jordan lui lai, puithiamhote dinna lai taka mi saw lung sâwm leh pahnih la ula, pu phei ula, riahhmun, zânina in riahna tûrah dah ang che u,’ tiin thu pe ang che,” tiin a sawi a.

⁴Chutichuan, Josua chuan Israela thlahte zînga mi sâwm leh pahnih, hnam tina mi a thlan chhuahte chu a ko va;

⁵tin, Josua chuan an hnênah, “LALPA in Pathian bâwm hmaah khân Jordan lui laiah kai ula, Israela thlahte a hnam zât zêlin, mi tinin lung pakhat ṭheuh pu ang che u.

⁶Tichuan, hêng hi in zîngah chhinchhiahna a la ni dâwn nia, nakinah in faten, ‘Hêng lungte hi eng in tihna nge ni le?’ tia an la rawn zawh hunah chuan,

⁷nangnin an hnênah, ‘LALPA thuthlung bâwm hmaah Jordan tuite a lo chah tâk vâng a ni; Jordan a kân laiin, Jordan tuite chu a lo chat ta a ni. Tichuan, hêng lungte hi Israela thlahten kumkhuaa an hriat rengna tûr a nih hi,’ in la ti dâwn nia,” a ti a.

⁸Tin, Israela thlahte chuan Josuan thu a pêk ang chuan an ti a, Israela thlahte a hnam zât zêlin, Jordan lui laia mi lung sâwm leh pahnih an la a; tin, an riahna hmunah an pu phei a, chutah chuan an dah a.

⁹Tin, thuthlung bâwm zâwntu puithiamho dinna lai tak, Jordan lui laiah chuan Josuan lung sâwm leh pahnih a phun a; chûng chu tûn thlengin a la awm reng a ni.

¹⁰Mosian Josua thu a lo pêk tâk zawng zawng anga LALPAN mipuite hnêna ti tûra Josua thu a pêk chu an tih zawh vek hma loh chuan, bâwm zâwntu puithiamte chu Jordan lui laiah chuan an ding reng mai a; tichuan, mipuite chu an intihmanhmawh a, an kai ta a.

¹¹Tin, heti hi a ni a, mipui zawng zawng chu an kai fai vek hnu chuan, LALPA bâwm leh puithiamte chu mipuite mit hmuhah chuan an kai ve ta a.

¹²Tin, Reubena thlahte, Gada thlahte leh, Manase hnam zâtvete chu, Mosian an hnêna a lo sawi tawh ang khân, Israela thlahte hmaah chuan inrâlthuamin an kai a.

¹³Râlthuama inthuam diam mi sîngli lai indo tûrin Jeriko phaiahte chuan LALPA hmaah an kai a ni.

¹⁴Chumi ni chuan LALPAN Josua chu Israel-ho zawng zawng mit hmuhah a chawimawi a; Mosia an ṭih ang bawk khân a dam chhûng zawng chuan an ṭih ta a.

¹⁵Tin, LALPAN Josua hnênah chuan, “Puithiamho, thuhriattîrna bâwm zâwntute kha Jordan lui ata lo chhuah thu pe rawh,” tiin a sawi a.

¹⁷Chutichuan, Josuan puithiamhote chu, “Jordan lui ata kha lo chhuak tawh rawh u,” tiin thu a pe a.

¹⁸Tin, heti hi a ni a, puithiamho, LALPA thuthlung bâwm zâwntute chu Jordan lui lai ata an lo chhuaha, puithiam kete chuan khawmual a rah veleh, Jordan tuite chu a luan pângngaiin a lo luang leh a, a hma ang bawk khân a kuang zawng zawngah chuan a luang liam leh ta dûl dûl a.

¹⁹Tin, mipuite chu thla khatna, ni sâwm niah Jordan lui ata chu an chhuak a, Jeriko chhak lampang, Gilgal-ah awmhmun an khuar ta a.

²⁰Tin, chûng lung sâwm leh pahnih, Jordan lui ata an put chhuah chu Josuan Gilgal-ah chuan a phun a.

²¹Tin, Israela thlahte hnênah chuan, “Nakin hnua in thlahten an pate, ‘Hêng lungte hi eng tihna nge ni le?’ tia an la rawn zawh hunah chuan,

²²‘Israel-hote chuan Jordan lui hi lei chârah an kal kai a ni,’ tiin in thlahte chu in la hriattîr dâwn zuk nia.

²³LALPA in Pathianin hmânah Tuifinriat Sen chu kan kai hma lohva kan hmaa a lo tikang chat ta ang khân, LALPA in Pathianin Jordan tuite hi in kai hma loh chuan in hmaah a tikang chat ta a nih hi;

²⁴leilunga hnam tinrêngin LALPA kut hi a lo chak a ni tih an hriat theiha, LALPA in Pathian chu kumkhuaa an ṭih theih nân,” tiin a sawi a.