Read Mizo_Old_version Josua 6 Bible Online

Josua 6 - Mizo_Old_version bible

Josua 6

¹(Jeriko khua chu Israel-te an luh theih loh nân an khâr tlat a; tu mah an chhuak lo va, tu mah an lût hek lo.)

²Tin, LALPAN Josua hnênah, “En teh, Jeriko leh an lal leh mi chak huaisente hi i kutah ka pe tawh e.

³Tin, râl kâp mi zawng zawng hian khawpui hi vêlin vawi khat chu in han vêl chhuak phawt ang a. Chutiang chuan ni ruk in ti tûr a ni.

⁴Tin, puithiam pasarihin bâwm hma lamah berâmpa ki tawtawrâwt pasarih an keng ang a; tin, a ni sarih ni chuan khawpui chu vawi sarih in vêl chhuak ang a; tin, puithiamten tawtawrâwtte chu an hâm ang.

⁵Tin, heti hi a ni ang a, berâmpa ki an ham rîk ruai ruai huna tawtawrâwt ri in hriat chuan, mipui zawng zawng chu ring takin au dur dur rawh se; tichuan, khawpui kulh chu a chim rup ang a, mipui chu mahni hma zâwn ṭheuhvah chuan an chho vang,” a ti a.

⁶Tin, Nuna fapa Josua chuan puithiamhote chu a ko va, an hnênah, “Thuthlung bâwm hi zâwn ula, puithiam pasarihin LALPA bâwm hma lamah chuan berâmpa ki tawtawrâwt pasarih keng rawh se,” a ti a.

⁷Tin, ani chuan mipuihote hnênah chuan, “Kal zêl ula, khawpui chu vêl chhuak rawh u; tin, inrâlthuamho kha LALPA bâwm hma lamah chuan kal zêl rawh se,” a ti a.

⁸Tin, chutiang chu a lo ni ta a, Josuan mipuihote hnêna thu a sawi zawh chuan LALPA hmaa berâmpa ki tawtawrâwt pasarih keng puithiam pasarihte chu an kal zêl a, tawtawrâwt chu an hâm a; tin, LALPA thuthlung bâwm chuan a zui a.

⁹Tin, inrâlthuamho chu tawtawrâwt hâm puithiamte hmaah chuan an kal a; tin, hnudâltute chuan bâwm chu an chhawm a, puithiamho chuan kal pahin tawtawrâwt an hâm zêl a.

¹⁰Tin, Josuan mipuite chu, “Au suh ula, in aw pawh hriat ni suh sela, au tûra thu ka pêk ni che u a thlen hma loh chuan in kâ aṭangin thu rêng rêng chhuak hek suh se. Chumi hunah chuan au vang che u,” tiin thu a pe a.

¹¹Chutichuan, LALPA bâwm chu khawpui vawi khat vêlin a han vêl chhuahtîr a; tin, riahhmunah chuan an kal a, riahhmunah chuan an riak leh ta a.

¹²Tin, Josua chu zîng takah a tho va, puithiamte chuan LALPA bâwm chu an zâwn a.

¹³Tin, LALPA bâwm hmaa berâmpa ki tawtawrâwt pasarih keng puithiam pasarihte kha an kal zêl a, tawtawrâwt an hâm a. Tin, inrâlthuamte chu an hmaah an kal a; tin, hnudâltute chuan LALPA bâwm an chhawm a, puithiamte chuan an kal pahin tawtawrâwt an hâm zêl a.

¹⁴Tin, a ni hnih ni chuan khawpui chu vawi khat an han vêl chhuak leh a, riahhmunah chuan an kîr leh a. Chutiang chuan ni ruk an ti a.

¹⁵Tin, heti hi a ni a, a ni sarih ni chuan zîng tak, vârṭianah an tho va, an tih dân pângngaiin vawi sarih an vêl chhuak a. Chumi ni chauh chuan khawpui chu vawi sarih an vêl chhuak a.

¹⁶Tin, heti hi a ni a, a vawi sarihnaa puithiamhoten tawtawrâwt an han ham chuan Josuan mipuiho hnênah, “Au rawh u khai, LALPAN khawpui hi a pe tawh che u asin.

¹⁷Khawpui hi a chhûnga thil awm zawng zawng chawp hian LALPA tâna hluihlâwn vek tûr a ni. Rahabi, nawhchizuar chauh, amah leh in chhûnga a hnêna awm zawng zawng erawh chu, kan mi tirhte kha a lo thuhrûk avângin zuah tûr a ni.

¹⁸Nangni chu, chu thil hluihlâwn lakah chuan inthiarfihlîm hlauh rawh u; chuti lo chuan, in hluihlâwn tawh hnu chuan thil hluihlâwn chu in la dah ang e. Israel-ho riahhmun hi thil hluihlâwnah in siam mai ang a, manganna in thlen dah ang e.

¹⁹Tangkarua te, rangkachak te, dâr leh thîr bungbêlte erawh chu LALPA pual a ni vek a; LALPA sum ina dah tûr a ni ang,” a ti a.

²⁰Chutichuan, mipuite chu an au va, puithiamten tawtawrâwt an hâm a. Tin, heti hi a ni a, mipuiten tawtawrâwt ri an han hriat veleh chuan mipuiho chu an au ta dur dur a, kulh chu a chim ta rup a; tichuan, mipuite chu mahni hma zâwn ṭheuhvah chuan an chho va, khawpuiah chuan an lût a, khawpui chu an la ta a.

²¹Tin, khawpui chhûnga mi zawng zawng, a hmei a pa, a pui a pangin, bâwngpa te, berâm te, sabengtungte nên khandaihin an tihlum fai vek a.

²²Tin, Josuan mi pahnih, ram va enthlatute hnênah khân, “Nawhchizuar inah sâwn va lût ula, a hnêna chhia in lo chham tawh ang khân chu hmeichhia chu a neih zawng zawng nên va hruai chhuak rawh u,” a ti a.

²³Tin, enthlatu tlangvâlte chu an va lût a, Rahabi nên, a nu nên, a nuṭate nên, a neih zawng zawng nên chuan an va hruai chhuak a, a laichîn unaute zawng zawng pawh an va hruai chhuak a; Israel-ho riahhmun pâwn lamah an awmtîr ta a.

²⁴Tin, khawpui chu a chhûnga thil awm zawng zawng nên meiin an hâl vek a. Tangkarua te, rangkachak te, dâr leh thîr bungbêlte chauh chu LALPA sum inah an dah a.

²⁵Amaherawhchu, Rahabi, nawhchizuar leh a neih zawng zawng leh a pa chhûngte chu Josuan a zuah vek a. Tichuan, Israel-hote zîngah chuan tûn thlengin a la tel ta reng a ni; Josuan Jeriko khua enthla tûra a mi tirhte kha a lo thuhrûk avângin.

²⁶Tin, chumi lai chuan Josuan, “He Jeriko khawpui hi rawn din apiang chu LALPA hmaah ânchhe dawngin awm rawh se; a fa tîr chânin a lungphûm chu a phûm ang a, a fa tlum ber chânin a kulh kawngkâte chu a din ang,” tiin anni chu a vau va.

²⁷Chutichuan, LALPA chu Josua hnênah a awm a; tin, a ram pum puiah chuan a hming a lo thang ta a.