Read Mizo_Old_version Josua 7 Bible Online

Josua 7 - Mizo_Old_version bible

Josua 7

¹Amaherawhchu, Israela thlahte chuan thil hluihlâwnah chuan thil an lo tisual ta a, Juda hnama mi Zera fa Zabdia, chu mi fapa Karmia, chu mi fapa Akana chuan thil hluihlâwn a lo la a; tichuan, Israela thlahte chungah chuan LALPA thin a lo rim ta a.

²Tin, Josuan Jeriko khua aṭangin Bethel chhak lam Beth-aven dep Ai khuaah chuan mi a tîr a, an hnênah, “Han kal ta ula, ram han enthla teh u,” tiin a sawi a. Tin, mite chu an han kal a, Ai khua chu an han enthla a.

³Tin, Josua hnênah an kîr leh a, a hnênah, “Mi zawng zawng chu han kal kher suh se; mi sânghnih emaw, sângthum emaw vêl han kal sela, Ai khua bei rawh se. Mi zawng zawng han tihhah kher tûr a ni lo ve, tlêm te chauh an ni si a,” an ti a.

⁴Chutichuan, mipui zînga mi, mi sângthum emaw chutah chuan an han kal a; tin, Ai-ho hmaah chuan an tlânchhe ta a.

⁵Tin, Ai-hote chuan mi sawmthum leh paruk emaw lai an lo that a, kulh kawngka bul aṭangin Sebarim thleng hialin an rawn ûm a, an liam thlâknaah chuan an that hlawm a; tin, mite thinlung chu a tui zo va, tui ang mai an lo ni ta a.

⁶Tin, Josua chuan a puante a pawt thlêr a, LALPA bâwm hmaah amah leh Israel-ho upate chu an hmaia lei siin tlai thlengin an bawkkhup a; tin, an luah vaivut an phul a.

⁷Tin, Josua chuan, “E khai aw, eng atân nge aw LALPA PATHIAN, keini mipuiho hi tihboral tûra Amor-ho kuta pêk atân Jordan lui hi min hruai kai tehlul ni? Jordan lui râlah khân lungawi taka awm hle hle tâk zâwk tûr aw!

⁸Aw LALPA, hetia hmêlmate ûma Israel-ho an tlânchhe ta mai hi engtin nge ka tih tâk ang le?

⁹Kanaan-hote leh hênglai rama chêng zawng zawng hian an hria ang a, min rawn hual ang a, lei ata hi kan hming an tiboral daih dâwn a nih hi. I hming ropui tak hi engtin nge i tih tâk ang le?” a ti a.

¹⁰Tin, LALPA chuan Josua hnênah, “Tho rawh, engati nge khatia i bawhkhuh reng ni?

¹¹Israel-ho hian thil an tisual a ni e; a ni, ka thuthlung pawm tûra thu ka pêk kha an bawhchhia a nih hi; a ni, thil hluihlâwna mi pawh kha an la bawk a ni; an ru bawk a, an zêp ru bawk a, an bungraw zîngah ngei an thukru a ni.

¹²Chu vâng chuan alâwm, Israela thlahten an hmêlmate an ngam theih loh, hluihlâwn thil an lo nih tâk avângin alâwm hmêlmate ûma an tlânchhiat ni; thil hluihlâwn chu in zîng ata in tihboral phawt loh zawngin in hnênah hian ka awm dâwn tawh lo a ni.

¹³Tho la, mipuiho hi tithianghlim phawt mai rawh; tin, an hnênah, ‘Naktûk atân intithianghlim rawh u khai; LALPA, Israel-te Pathianin, “Aw Israel-te u, in zîngah hian hluihlâwn thil a awm a ni e; in zîng ata hluihlâwn thil hi in lâk bo hma loh zawng in hmêlmate in hneh thei lo vang.

¹⁴Chutichuan, zîngah a chi chia rawn inlantîr tûr in ni. Tin, heti hi a ni ang a, LALPAN chu mi chi a lo mana chu a hnam hnamin in rawn inlan leh tûr a ni; tin, LALPAN chu mi hnam a lo mana chu a chhûng chhûngin in rawn inlan leh tûr a ni; tin, LALPAN chu mi chhûng a lo mana chu a mal malin in rawn inlan leh tûr a ni.

¹⁵Tin, heti hi a ni ang a, tu pawh hluihlâwn thil lo la apiang chu amah leh a neih zawng zawng meiin hâl vek tûr a ni ang; LALPA thuthlung a bawhchhiat avâng leh, Israel-hote zînga thil sual âtthlâk tak a tih avângin,” a ti a ni,’ ti ang che,” a ti a.

¹⁶Chutichuan, Josua chu zîng takah a tho va, Israel-hote chu a chi chiin a rawn inlantîr a; tin, Juda chite chu man an lo ni ta a.

¹⁷Tin, Juda hnamte chu a rawn inlantîr leh a, Zer hnamte chu a lo man a; tin, Zer-ho chhûngte chu a mal malin a rawn inlantîr leh a, Zabdia chu man a lo ni a.

¹⁸Tin, a chhûngteho chu a mal malin a rawn inlantîr leh a; tichuan, Juda chia mi Zera fapa Zabdia, chu mi fapa Karmia, chu mi fapa Akana chu man a lo ni ta a.

¹⁹Tin, Josuan Akana hnênah chuan, “Ka fapa, LALPA, Israel-te Pathian chu fak rawh aw, a hnênah chuan inpuang rawh khai, i thiltih chu mi han hrilh teh; ka lakah chuan zêp suh khai,” a ti a.

²⁰Tin, Akana chuan Josua chu a chhâng a, a hnênah, “LALPA, Israel-te Pathian chungah chuan thil ka lo tisual ta ngei mai, hetiang hian a ni ka lo tih tâk ni:

²¹râllâk zînga mi Babulon ram puan ṭha tak leh, tangkarua sekel zahnih leh rangkachak tlang sekel sawmnga bûk ka hmu a, ka awt ta êm a, ka la ta mai a ni. Tin, ngai teh, ka puan in chhûngah leiah thuhrûk a ni a, tangkarua chu chumi hnuaiah chuan a awm,” a ti a.

²²Chutichuan, Josua chuan mite a tîr a, puan in chhûngah chuan an va tlân a; tin, ngai teh, a puan inah chuan thuhrûk a lo ni ngei a, a hnuaiah chuan tangkarua chu a awm.

²³Tichuan, puan in chhûng ata chu an la a, Josua leh Israela thlahteho zawng zawng hnênah chuan an rawn la a; tin, anni chuan LALPA hmaah an dah a.

²⁴Tin, Josua leh Israel-ho zawng zawng chuan Zera fapa Akana chu tangkarua te, puan te, rangkachak tlang te, a fapa te, a fanu te, a bâwngpa te, a sabengtung te, a berâm te, a puan in te leh a neih zawng zawng nên chuan an hruai a, Akor ruamah an chhohpui a.

²⁵Tin, Josuan, “Engati nge min tihmangan le? LALPAN vawiinah hian nang pawh a timangang ve dâwn che a nih hi,” a ti a. Tichuan, Israel-ho zawng zawng chuan ani chu lungin an dêng a; tin, anni chu meiin an hâl a, lungin an dêng a.

²⁶Tin, a chungah chuan lung an tiang vûm thûr a, tûn thleng hian a la awm; tin, LALPAN a thinrimna nasa tak chu a lamlêt ta a. Chutichuan, chumi hmun hmingah chuan tûn thleng hian Akor ruam an la ti reng a.