Read Mizo_Old_version Josua 9 Bible Online

Josua 9 - Mizo_Old_version bible

Josua 9

¹Tin, heti hi a ni a, Jordan râla lalho zawng zawng - tlânga mi te, phaia mi te, tuifinriat zau tak kam tluana Lebanon thlenga awm zawng zawng - Hit-hote, Amor-hote, Kanaan mite, Periz-hote, Hiv-hote, Jebus-hoten an lo hriat chuan,

²Josua leh Israel-ho chu thu khat vuaa beih rawn tumin an pung khâwm chiam a.

³Nimahsela, Gibeon khuaa awmte chuan Josuan Jeriko khua leh Ai khua a tih dân an lo hriat chuan,

⁴fin vervêkin an che ve ta thung a, palai angin an insiam a, ip hlui tak tak an sabengtung an phurhtîr a, uain peng hlui tak, a chhe thawm tawhte nên;

⁵pheikhawk hlui tak tak bel ṭup hi an bun a, puan hlui tak an inbel a; an ei tûra an rawn ken chhangte chu ro hul, hmuar un a ni a.

⁶Josua hnênah Gilgal-a an riahhmunah chuan an va kal a, a hnênah leh Israel-hote hnênah chuan, “Ram hla tak aṭanga lo kal kan ni a; chutichuan, kan hnênah hian thu thlung rawh u,” an ti a.

⁷Tin, Israel-hote chuan Hiv-hote hnênah chuan, “Kan zînga chêng ve hi in lo ni reng ang e; engtin nge in hnênah thu kan thlun theih ang?” an ti a.

⁸Tin, anni chuan Josua hnênah, “I chhiahhlawhte kan nih hi,” an ti a. Tin, Josua chuan an hnênah, “Tute nge maw in nih le? Khawi lam aṭanga lo kal nge in nih?” a ti a.

⁹Tin, anni chuan a hnênah, “LALPA i Pathian hming avângin i chhiahhlawhte hi ram hla tak aṭanga lo kal kan ni e; a hmingthanzia te, Aigupta rama a thiltih zawng zawng te,

¹⁰Jordan lui râla Amor-ho lalte pahnih - Hesbon ram lal Sihona te, Basan ram lal Astaroth khuaa awm Oga te chunga a thiltih zawng zawngte kha kan lo hre si a.

¹¹Tin, kan upate leh kan rama chêngho zawng zawngten kan hnênah, ‘Kalkawng atân ei tûrte keng ula, anmahni va be rawh u; tin, an hnênah, “In chhiahhlawh kan nih hi; kan hnênah thu thlung ang che u,” ti ang che u,’ tiin an sawi a.

¹²Hêng kan ei atâna kan chhangte hi in hnêna lo kal tûra kan lo chhuah niin kan in aṭanga a luma kan rawn ken a ni a; nimahsela, tûnah zawng en teh mah u, a ro hul tawh a, a hmuar un tawh hi.

¹³Tin, hêng uain peng kan thunnate pawh hi a thar a ni a, en teh mah u, a pawh vek tawh hi; tin, hêng kan puante leh kan pheikhawkte pawh hi kan lo kalna a thui khawp a, a hlui vek tawh hi,” an ti a.

¹⁴Tin, Israel-hote chuan an ei tûr han ken chu an la a; LALPA kamchâng rêng an ngai lo va.

¹⁵Tichuan, Josua chuan anmahni nên inremna a siam a, anmahni chu zuah tûrin an hnênah thu a thlung ta a; tin, pung khâwmho mi liante pawh chuan an hnênah chhia an chham a.

¹⁶Tin, heti hi a ni a, an hnênah thu an thlun achin ni thum hnuah chuan, an khaw ṭhenawm, anmahni zînga lo awm ve reng an ni tih an hre chhuak ta a.

¹⁷Tin, Israela thlahte chu an kal zêl a, a ni thum niah khawpuite chu an va thleng a. An khawpuite chu Gibeon te, Kephira te, Beeroth te, Kiriath-jearim te a ni.

¹⁸Pungkhâwmho mi liante chuan LALPA, Israel-te Pathian chhâla an hnêna chhia an lo chham tawh avângin, Israela thlahte chuan an khawih lo. Tichuan, pung khâwmho zawng zawngte chu mi lianho chungah chuan an phunnawi ta a.

¹⁹Nimahsela, mi lianho zawng zawngte chuan pung khâwmho zawng zawngte hnênah chuan, “LALPA, Israel-te Pathian chhâlin an hnênah chhia kan lo chham tawh si a; chuvângin, anmahni chu kan dek thiang lo a ni.

²⁰Hetiang hian an chungah ti ila, i zuah mai ang u; chuti lo zawng, an hnênah chhia kan lo chham tawh si avângin kan chungah hian thinurna a lo thleng mai ang asin,” an ti a.

²¹Tin, mi lianho vêk chuan an hnênah, “Zuahin awm rawh se,” an ti a. Chutichuan, pung khâwmho zawng zawng thing fawmtuah leh tui chawituah an lo awm ta a, mi lianhoten an hrilh ang chuan.

²²Tichuan, Josuan anmahni chu a kohtîr a, an hnênah, “Engati nge, ‘Ram hla tak aṭanga lo kal kan ni e,’ tia min bum mai le? Kan zînga chêng ve in lo ni reng mai si a.

²³Chuvângin, ânchhedawng in lo nih tâk hi. Eng lai pawhin in zînga mi ṭhenkhat hi bawih an ni reng ang a, ka Pathian in atâna thing fawmtuah leh tui chawituah an awm fo vang,” tiin a sawi a.

²⁴Josua chu an chhâng a, “LALPA in Pathian chuan he ram hi a chhiahhlawh Mosia chu a pe a, a chhûnga chêngte zawng zawng tihlum vek tûrin thu a pe ngei tih kan ring a; tichuan, hma in rawn sâwn zêl dân kan hriatin min thah kan hlau va, hetiang hian kan rawn ti ta mai a ni.

²⁵Tûnah hian ngai teh, i kuta awm kan ni a; i ngaiha ṭha leh dika i hriat ang ang chuan kan chungah hian ti zêl mai ang che,” an ti a.

²⁶Chutichuan, an chungah chutiang chuan a ti ta a, Israela thlahte lak ata chu a chhanchhuak a, anmahni chu an that ta lo va.

²⁷Tin, Josuan chumi ni chuan a ruatna apiangah, pung khâwmhote leh LALPA maichâm atân thing fawmtuah leh tui chawituah a ruat a, tûn thleng hian.