Read Mizo_Old_version KHUAA MITE HNENA TIRHKOH PAULA LEHKHATHAWN PAHNIHNA THESSALONIKA 2 Bible Online

KHUAA MITE HNENA TIRHKOH PAULA LEHKHATHAWN PAHNIHNA THESSALONIKA 2 - Mizo_Old_version bible

KHUAA MITE HNENA TIRHKOH PAULA LEHKHATHAWN PAHNIHNA THESSALONIKA 2

¹Nimahsela, unaute u, kan Lalpa Isua Krista lo kalna leh a hnêna kan han inkhâwmna tûr thu-ah chuan,

²“Lalpa Ni chu a thleng reng tawh,” tihna thlarau avângin emaw, thu avângin emaw, kan hnên aṭanga lehkhathawn ang avângin emaw, in rilru nghîn thuai lohna tûr leh in buai hek lohna tûrin kan ngên a che u.

³Tu mân eng mahin tihder che u suh se; tlûksanna chu a lo thlen hmasak zeta, Dân Bawhchhepa, boral fapa chu a lo lan loh chuan chumi ni chu a thleng dâwn si lo va.

⁴Ani chuan Pathiana an vuah apiang leh sakhua zawng zawng dovin, an chunga awm tumin a inchawimawi ang; chutichuan, Pathian biak ina ṭhuin Pathian ang hialin a intâr chhuak ang.

⁵In hnêna ka lo awm lai khân chûng thu chu ka hrilh ṭhîn che u tih in hre reng lo vem ni?

⁶Ama hun tê chauhva a lo lan theihna tûrin engin nge khap tûnah in hria e.

⁷Dân bawhchhiatna thurûk chuan tûnah pawh a thawk mêk a ni si a; nimahsela, lâk bova a awm hma loh chuan tûnah hian a khaptu a awm.

⁸Chumi lâk bo hunah chuan Dân Bawhchhepa chu a lo lang tawh ang, Lalpa Isuan ani chu a kâa thawin a tihlum ang a, a lo kala inlârnain a tiboral ang.

⁹Chu Dân Bawhchhepa chu Setana chakna nên a lo kal ang a, thiltihtheihna tinrêng te, chhinchhiahna tinrêng te, dâwt thil mak tinrêng te nên a lo thawk ang.

¹⁰Boral mêkte tân fel lohna bumna tinrêng nên a ni ang; chhandama an awm theihna tûrin thutak hmangaihna chu an pawm loh vâng a ni.

¹¹Chu vâng chuan dâwt thu chu an awihna tûrin Pathianin sual hna thawhna an hnênah a thlentîr ang,

¹²thutak awih lova fel lohnaa lâwm zâwkte chuan thiam loh an chan vek theih nân.

¹³Unau, Lalpa duh takte u, Thlarau tihthianghlim leh thutak awiha chhandama awm tûrin a tîr ata Pathianin a thlan che u avângin, in chungthuah hian Pathian hnênah lâwm thu hril fo tûr rêng kan ni.

¹⁴Chutiang atân chuan ani chuan kan Chanchin Ṭha hianin a koh che u kha, kan Lalpa Isua Krista ropuina nei tûrin.

¹⁵Chutichuan, unaute u, ding nghet ula, thurochhiahte chu thusawiin emaw, kan lehkhathawnin emaw kan zirtîr che u kha pawm tlat rawh u.

¹⁶Tichuan, kan Lalpa Isua Krista ngei leh Pathian kan Pa, min hmangaihtu leh khawngaihna avânga chatuana thlamuanna leh beiseina ṭha min petu chuan,

¹⁷in thinlungte chu tithlamuangin, thil tihṭhat leh thusawi ṭhat tinrêngah tinghet rawh se.