Read Mizo_Old_version HNENA TIRHKOH PAULA LEHKHATHAWN PAKHATNA TIMOTHEA 1 Bible Online

HNENA TIRHKOH PAULA LEHKHATHAWN PAKHATNA TIMOTHEA 1 - Mizo_Old_version bible

HNENA TIRHKOH PAULA LEHKHATHAWN PAKHATNA TIMOTHEA 1

¹Paula - Pathian, min Chhandamtu leh Krista Isua, kan Beiseina ruat anga Krista Isua tirhkoh chuan,

²Rinnaa ka fa tak tak Timothea hnênah: Pathian kan Pa leh Krista Isua kan Lalpa hnên ata khawngaihna te, zahngaihna te, remna te lo awm rawh se.

³Makedonia ram ka pan dâwn laia ka ngen che ang khân, tûnah pawh Ephesi khuaa awm reng tûrin ka ngên a che. Chuta mi ṭhenkhat chuan zirtîrna dik lo an theh darh a, ti tawh lo tûrin hrilh rawh.

⁴Thawnthu mai mai leh thlahtute hming chhui sên loh chhui bânsan rawh se; chûng chuan rinnaa Pathian lama intihsâwtna thlen lovin, inhnialna mai mai a thlen zâwk si a.

⁵Thinlung thianghlim leh chhia leh ṭha hriatna thiang leh rinna dik tak aṭanga lo chhuak, hmangaihna neih theih nân chu chu ti ka ni.

⁶Mi ṭhenkhatte an kal kawi avângin chu chu an pênsan a, thu lawilo sawina lamah an kal ta a;

⁷an thusawi awmzia leh paukhauh taka an thuhril chanchin chu hre si lovin, Dân zirtîrtute nih an duh ṭhîn a ni.

⁸Dân chu a ṭha a ni tih kan hre si, miin a hman ṭhat phawt chuan.

⁹Hêng hi hria sela: Dân hi mi fel tak tâna siam a ni lo va, dân pawisa loho leh dân bawhchheho tân te, Pathian ngaihsak loho leh mi sualho tân te, mi thianghlim loho leh Pathian zah loho tân te, pate thattuho leh nute thattuho tân te, mihring thattuho tân te,

¹⁰inngaih hmangho tân te, mawngkawhurho tân te, mihring rûk hmangho tân te, dawtheiho tân te, chhechham derho tân te leh, fak tlâk Pathian Chanchin Ṭha ropui zirtîrna dik ka hnêna kawltîr ang ni lova, thil dang rêng awm apiangte tân pawh chuan siam a ni zâwk e.

¹²Mi tichaktu Krista Isua kan Lalpa hnênah chuan lâwm thu ka sawi a ni, hmânah sawichhetu leh tiduhdahtu leh sawisatu ni mah ila, rinawma mi ngaiha, a rawngbâwltua mi ruat tâk avâng hian; nimahsela, ring lo chunga hre lova ti ka nih avângin a ni, zahngaihna ka lo hmuh ni;

¹⁴tin, kan Lalpa khawngaihna chu, rinna leh Krista Isuaa hmangaihnain nasa takin a liam ta.

¹⁵“Krista Isua chu mi sualte chhandam tûrin khawvêlah hian a lo kal,” tih hi a rinawmin a pawm tlâk êm êm a ni; an zînga mi sual ber ka nih hi.

¹⁶Nimahsela, hemi avâng hian a ni zahngaihna ka hmuh ni, Isua Krista chuan mi sual ber keimahah hian a dawhtheihzia zawng zawng a lantîr theih nân; tûn achina chatuana nunna hmu tûra amah la ring tûrte kawhhmuhna tûrin.

¹⁷Lalber, chatuana awm, chhe thei lo, hmuh theih loh, Pathian taka chauh chu, chatuana chawimawi leh ropuiin awm rawh se. Amen.

¹⁸Ka fa Timothe, hmâna i chanchin an hrilh lâwk thute ang khân, chu zilhna thu chu ka kawltîr a che, chûng chuan indona ṭha chu i do theih nân;

¹⁹rinna leh chhia leh ṭha hriatna thiang tak pawm tlatin; mi ṭhenkhatten chûng chu paih thlain rinna kawngah chuan lawng keh angin an keh chhe ta.

²⁰Chûng zîngah chuan Humenaia leh Alexandra an tel a; Pathian sawichhiat loh an zir theih nân anni chu Setana ka pe a ni.