Read Mizo_Old_version HNENA TIRHKOH PAULA LEHKHATHAWN PAKHATNA TIMOTHEA 2 Bible Online

HNENA TIRHKOH PAULA LEHKHATHAWN PAKHATNA TIMOTHEA 2 - Mizo_Old_version bible

HNENA TIRHKOH PAULA LEHKHATHAWN PAKHATNA TIMOTHEA 2

¹Chutichuan, a tîr berin thil dîl ṭawngṭaina te, ṭawngṭaina hrim hrim te, ṭawngṭaisakna te, lâwm thu sawina te mi zawng zawng tân siamsak tûrin ka fuih a che;

²lalte leh thuneitute zawng zawng tân pawh; Pathian ngaihsak leh zahawm taka inrema thlamuanga kan khawsak theih nân.

³Chu chu min chhandamtu Pathian ngaihin a ṭhain, a lawm tlâk a ni;

⁴ani chuan mi zawng zawng chhandama awmah leh thutak hriaah a duh a ni.

⁵Pathian pakhat chauh a awm a, Pathian leh mihring inkâra Palai pakhat chauh a awm bawk a, amah chu mihring a ni, Krista Isua,

⁶mi zawng zawng tlan nâna inpea chu; chu chu a hun tak zêla hriattîrin a awm tûr a ni;

⁷chumi ti tûrin tlângaupuituah leh tirhkohva ruat ka ni (thu tak tak ka sawi a, ka daw lo ve); rinna leh thutaka Jentailte zirtîrtua ruat ka ni.

⁸Chutichuan, mipaho chu hmun tinah kut thianghlim pharin, thinrim lo leh inhnial lovin ṭawngṭai sela ka duh a ni.

⁹Chutiang bawkin hmeichheho pawh inthlahdah lo leh inbel lutuk lovin, thuam inchawih tâwkin inchei sela, sam phiarin emaw, rangkachakin emaw, tuikeplungin emaw, puan man tam tak taktein emaw inchei lovin;

¹⁰amaherawhchu, (hmeichhia, Pathian ngaihsak intite chu inphu tâwkin) thil tihṭhatin inchei sela ka duh.

¹¹Hmeichhia chuan thu awih tlatin ngawi rengin zir rawh se.

¹²Amaherawhchu, hmeichhiain zirtîr zawng ka phal lo, mipa chunga thuneih ka phal hek lo, ngawi rengin awm zâwk rawh se.

¹³Adama chu siam hmasak a ni a, chumi hnuah Evi chu siam a ni a.

¹⁴Tin, Adama chu bumin a awm lo va, hmeichhia erawh chu bumin a awm a, bawhchhiatnaah a tlu ta a.

¹⁵Nimahsela, rinna leh hmangaihna leh thianghlimna neiin, rilru fel tak nêna an awm fo chuan, fa hrin vângin chhandamin an awm ang.