Read Mizo_Old_version HNENA TIRHKOH PAULA LEHKHATHAWN PAKHATNA TIMOTHEA 4 Bible Online

HNENA TIRHKOH PAULA LEHKHATHAWN PAKHATNA TIMOTHEA 4 - Mizo_Old_version bible

HNENA TIRHKOH PAULA LEHKHATHAWN PAKHATNA TIMOTHEA 4

¹Nimahsela, hun lo la awm tûrah chuan mi ṭhenkhat chuan, mi dawtheite vervêkna avângin hruai bona thlaraute leh ramhuaite zirtîrna thu ngaihsakin, rinna chu an la bânsan ang tih Thlarau chuan chiang takin a sawi a. Chûng mi dawtheite chu anmahni chhia leh ṭha hriatna ngeia thîr linga deh ang an ni a,

³inneih an khap ṭhîn a, englo ei tûrte (thutak hriaa ringtuten lâwm thu sawia pawm tûra Pathianin a siamte) chu ei loh tûr an ti ṭhîn.

⁴Pathian thil siam tinrêng hi a ṭha si a, lâwm thu hrila pawm a nih tawh phawt chuan eng mah duh loh tûr a ni lo;

⁵Pathian thu leh ṭawngṭainain tihthianghlim a ni tawh si a.

⁶Chûngte chu unaute i hriattîr chuan, Krista Isua rawngbâwltu ṭha tak, rinna leh zirtîrna ṭha tûn thlenga i la zawm thua châwm i ni ang.

⁷Amaherawhchu, Pathian zah lohna leh pitarte thawnthu mai mai chu duh suh. Tin, Pathian ngaihsak tûrin insawizawi rawh:

⁸taksa insawizawina hi sâwt zawng a sâwt ve bawk a; Pathian ngaihsakna erawh hi chu, nunna tûna awm sa leh la awm leh tûr pêk tiamna a neih avângin kawng tinrêngah a sâwt a ni.

⁹He thu hi a rinawmin a pawm tlâk êm êm a ni.

¹⁰Chutichuan, Pathian nung chu kan rin avângin kan thawk rim a, kan bei hrâm hrâm a ni si a; ani chu mi zawng zawng Chhandamtu a ni a, a ringtute Chhandamtu a ni deuh ber mai.

¹¹Chûng thu chu pe la, zirtîr rawh.

¹²I naupanna tu mahin ngainêp suh se; thusawi kawngah te, chêtze kawngah te, hmangaihna kawngah te, rinna kawngah te, thianghlimna kawngah te ringtute tihhmuhtu ni zâwk ang che.

¹³Ka lo kal hma loh zawng chhiar te, thuhril te, zirtîr te bei uar rawh.

¹⁴Nangmaha awm thilpêk, hrilh lâwk anga upahote kut nghata Pathianin a neihtîr che kha thlahthlam suh.

¹⁵Mi zawng zawng hnêna i sâwtna a lan theih nân chûng thilahte chuan taima la, chûngah chuan inhmang zo rawh.

¹⁶Nangmah leh i zirtîrnaah chuan fîmkhur la; chûng thil tiin awm reng rawh; chutiang tiin nangmah leh i thu ngaithlatute chu i chhandam dâwn zuk nia.