Read Mizo_Old_version HNENA TIRHKOH PAULA LEHKHATHAWN PAKHATNA TIMOTHEA 5 Bible Online

HNENA TIRHKOH PAULA LEHKHATHAWN PAKHATNA TIMOTHEA 5 - Mizo_Old_version bible

HNENA TIRHKOH PAULA LEHKHATHAWN PAKHATNA TIMOTHEA 5

¹Putar deuhte chu hau suh la, pa angin thlêm zâwk rawh; rawlthar deuhte chu unau angin;

²pitar deuhte chu nu angin; nula deuhte chu thianghlim takin farnu angin.

³Hmeithai, hmeithai tak takte chu chawimawi rawh.

⁴Nimahsela, hmeithai tu pawhin fate emaw, tûte emaw nei sela, chûngte chuan anmahni in chhûng lamah Pathian ngaihsaka awm leh anmahni hringtute chungah ṭhat ve thung zir zet rawh se; chu chu Pathian lâwm zâwng a ni si a.

⁵Hmeithai tak tak, mahni chauhva awm chuan Pathian chungah beiseina a nei tlat a, a chhûn a zânin dîl leh ṭawngṭaiin a awm fo ṭhîn a.

⁶Amaherawhchu, hmeithai, mahni nawmna ngawta inpe chu a dam lai pawhin a thi a ni.

⁷Sawisêl bova an awm theih nân chûng thu pawh chu pe rawh.

⁸Tu pawh mahni chhûngkhat lainate ngaihsak lova, mahni chênpui chhûngte ngei pawh ngaihsak lo chuan rinna an phatsan a ni, ringlomi aiin an sual zâwk.

⁹Hmeithai chu kum sawmruk achin hnuai lam ni lo, mi pakhat nupui ni tawh, thil ṭha tih kawnga mi faka a awm chuan hmeithaia ziak theih a ni - fate lo châwm tlei tawha, mikhualte lo thleng tawha, mi thianghlimte ke lo sil tawha, mi mangangte lo chhawmdâwl tawha, thil ṭha tinrêng taima taka a lo tih tawh phawt chuan.

¹¹Hmeithai, la nula deuhte erawh chu ziak duh suh; an châkna avânga Krista lamah an lo ngheh lohvin pasal neih an duh leh mai ṭhîn.

¹²An thutiam an bawhchhia a, an thiam lo a ni.

¹³Tin, chu lo pawh chu in tinah an lêng lâwr a, thatchhiat pawh an chîng ṭhîn a; thatchhiat chang pawh ni lovin, thu sawi loh tûr sawiin kamtam leh mite thiltih rêlsak an chîng bawk ṭhîn a ni.

¹⁴Chutichuan, hmeithai, la nula deuhte chuan pasal nei sela, fate nei sela, in chhûng khawsak rêl sela, sawisêlna tûr remchâng rêng hmêlma chu hmuhtîr suh sela ka duh a ni.

¹⁵Tûnah pawh mi ṭhenkhat chuan Setana lam panin an pênsan ta si a.

¹⁶Ringtu hmeichhiain hmeithai awmpui nei sela, anni chu amah chuan chhawmdâwl mai rawh se, kohhran chu tihbuaiin awm suh se; hmeithai, belh tûr nei lote chu an chhawmdâwl theih nân.

¹⁷Kohhran upa rorêl ṭhate chu a leh hniha chawimawi tlâka ngaih ni rawh se, thuhril leh zirtîrnaa thawk rimte chu chawimawi tlâka ngaih lehzual ni rawh se.

¹⁸Pathian Lehkha Thu chuan, “Sebâwngpain buh a chîl laiin a hmui phuar suh ang che,” a ti a. “Hnathawktu chu a hlawh hmu tlâk a ni,” a ti bawk a.

¹⁹Kohhran upa an hêkna chu hretu pahnih emaw, pathum emaw kaa mi lo chu pawm suh.

²⁰Thil tisualtute chu mi zawng zawng hmaah zilhhau rawh, mi dangte pawhin an hlauh ve theih nân.

²¹Hêng thu hi hleihluak bîk nei lovin, thlei bîk neia eng mah ti lovin, Pathian leh Krista Isua leh vântirhkoh thlante mit hmuhin zâwm tûrin ṭhahnemngai takin ka hriattîr a che.

²²Tu ma chungah kut nghat thut suh la, mi dang sualnaahte chuan tel hek suh; intithianghlim reng rawh.

²³Tui chauh in mi ni tawh suh la, i pum avâng leh i damloh fo avângin uain tlêm tê hmang ṭhîn ang che.

²⁴Mi ṭhenkhat sual chu a langsâr a, an tuar nghâl bawk ṭhîn; ṭhenkhat erawh chu a lang lawk lêm lo va.

²⁵Chutiang bawkin thil ṭha tih lang nghâl a awm a; lang nghâl rih lo mah se, thup hlen theih a ni lo.