Read Mizo_Old_version HNENA TIRHKOH PAULA LEHKHATHAWN PAHNIHNA TIMOTHEA 2 Bible Online

HNENA TIRHKOH PAULA LEHKHATHAWN PAHNIHNA TIMOTHEA 2 - Mizo_Old_version bible

HNENA TIRHKOH PAULA LEHKHATHAWN PAHNIHNA TIMOTHEA 2

¹Chutichuan, nang ka fa, Krista Isuaa khawngaihna awmah hian thiltihtheihna neiin awm ang che.

²Tin, hretu tam takte zînga ka kaa thu i hriatte kha, chûng chu mi rinawm, mi dangte zirtîr chhâwng thei tûr angte hnênah chuan kawltîr rawh.

³Krista Isua sipai ṭha tak angin hrehawm mi tuarpui rawh.

⁴Sipaia awm tûra thlangtu chu a tihlâwm theih nân sipai tu mah, indo laiin tûn dam chhûng khawsaknate hian a intihnawk ngai lo va.

⁵Tin, intihsiaknaahte pawh chuan miin bei mah sela, dân angin a beih loh chuan khumtîrin a awm ngai lo va.

⁶Lo neitu thawk rim chu a rah chang hmasatu a ni tûr a ni.

⁷Ka thusawi hi ngaihtuah rawh; Lalpa chuan kawng engkimah hriat theihna a pe dâwn si chia.

⁸Isua Krista, Davida thlaha mi, ka Chanchin Ṭha sawi anga mitthi zîng ata tholeha kha hre reng rawh;

⁹chu Chanchin Ṭha avâng chuan thil tisualtu angin, phuar khawp hialin hrehawmte ka tuar ṭhîn a ni; nimahsela, Pathian thu chu phuarin a awm si lo.

¹⁰Chuvângin, Krista Isuaa awm chhandamna chu chatuana ropuina nên an hmuh ve theihna tûrin, Thlante avâng chuan engkim ka tuar ṭhîn.

¹¹He thu hi a rinawm a ni: “A thihnaah kan thih tawh si chuan, A nunnaah kan nung bawk ang.

¹²Kan tuar chuan, A rorêlnaah ro kan rêl ang; Amah kan phatsan chuan, Ani pawhin min phatsan ang.

¹³Keini rinawm lovin awm mah ila, Ani chu rinawmin a awm reng a ni; Amah leh amah a inphat thei si lo va,” tih hi.

¹⁴Chûng thu chu hriatpui la, thu mai mai chunga an inhnial loh nân Lalpa mit hmuhah ṭhahnemngai takin hriattîr rawh, chu chu engah mah a ṭangkai lo va, a ngaithlatute tân boralna a ni zâwk ṭhîn.

¹⁵Hnathawktu, thutak thu fel taka hmang chu zak tûr a ni lo angin, Pathian ngaiha ṭhaa inentîr tûrin ṭhahnem ngai rawh.

¹⁶Amaherawhchu, Pathian zah lo lam thu sawi mai mai chu hawisan ṭhîn ang che; chutiang mite chu Pathian ngaihsak lohna lamah an nasa lehzual ang a,

¹⁷an thu pawh chuan pân chhe ei angin a ei zêl ang; an zîngah chuan Humenaia leh Phileta an tel a ni;

¹⁸chûng mite chuan, “Thawhlehna chu tûnah pawh a ni tawh daih,” tiin, thutak kawng chu an kal kawisan a, mi ṭhenkhatte rinna an tibo ṭhîn a.

¹⁹Nimahsela, Pathian lungphûm nghet chu a la ding reng a, he chhinchhiahna hi a nei a: “Lalpa chuan ama tate chu a hria,” tih leh, “Lalpa hming lam apiang chuan sual kalsan rawh se,” tih hi.

²⁰Nimahsela, in ropuiah chuan bungbêl, rangkachak leh tangkaruaa siam chauh a awm lo va, thing leh belleia siamte pawh a awm ṭhîn a; ṭhenkhat ngaihhlut tûr a awm a, ṭhenkhat chu ngaihhlut loh tûr a awm bawk a.

²¹Chuvângin, chûng thil laka mi a inthiarfihlîm chuan bungbêl thianghlim, Lalpa hman tlâk, hnathawh ṭha tinrênga inpeih sa, ngaihhlut tûr mi a ni ang.

²²Nimahsela, tleirâwl châknate chu tlânsan la, thinlung thianghlima Lalpa lam apiangte zîngah chuan felna te, rinna te, hmangaihna te, remna te ûm ve rawh.

²³Amaherawhchu, indonate a hring ṭhîn tih hriain, inhnialna âtthlâk leh fing lovahte chuan tel duh suh.

²⁴Lalpa bawih chuan do tûr a ni si lo va, mi zawng zawng chungah zaidamin, zirtîr thiamin, sual chungah dawhtheiin,

²⁵do tûra insiamte chu thuhnuairawlh takin a zirtîr zâwk tûr a ni; chutichuan, Pathianin thutak chu an hriat famkim nân a simtîr hlauhvin,

²⁶Pathian duh zâwng ti atân Lalpa bawihin a manin, Diabola thang ata an chhuak thei mahna.