Read Mizo_Old_version HNENA TIRHKOH PAULA LEHKHATHAWN TITA 1 Bible Online

HNENA TIRHKOH PAULA LEHKHATHAWN TITA 1 - Mizo_Old_version bible

HNENA TIRHKOH PAULA LEHKHATHAWN TITA 1

¹Paula, Pathian bawih, chatuana nunna beiseia Pathian thlante rinna kawngah leh, Pathian ngaihsak lam thutak hriatna kawnga Isua Krista tirhkoh bawk chuan (Chu chatuana nunna chu Pathian, dâwt sawi thei lova chuan khawvêl awm hmain a tiam a;

³nimahsela, ama hun takahte chuan a thu chu thuchah chuan a tilang ta, chu thuchah chu Pathian kan Chhandamtu thupêk ang zêla kawltîr ka ni.)

⁴Tita, kan rin thuhmun vânga ka fa tak tak hnênah: Pa Pathian leh Krista Isua kan Chhandamtu hnên ata khawngaihna leh remna i hnênah awm rawh se.

⁵Hemi avâng hian Kret thliarkârah khân ka hnutchhiah che a ni, thil tihfel bâkte chu i tihfel zêlna tûr leh, thu ka pêk che ang khân khaw tinah upate i ruatna tûrin;

⁶tu pawh sawisêl bo, nupui pakhat nei, fate Pathian thu ring, nawmsak bâwl lutuk kawnga sawisêl hlawh lo, dân ang lova awm lo nei an nih tawh phawt chuan.

⁷Kohhran hotu chu Pathian sum enkawltu a nih avângin sawisêl bo a ni tûr a ni; mi tihmawh, thin ram, uain ruih hmang, mi velh hmang, hlêpna bawlhhlawha duhâm mi a ni tûr a ni lo va;

⁸mi lawm dân thiam, ṭha lam duh, rilru dik tak, mi fel, mi thianghlim, insûmthei mi a ni zâwk tûr a ni a;

⁹zirtîrna dik tak kawngah chuan mi a fuih theihna tûr leh, hnialtute chu thiam loh a chantîr theihna tûrin, zirtîrna ang zêl thu rinawm chu pawm tlat mi a ni bawk tûr a ni.

¹⁰Dân ang lova awm, thu sawi mai maite leh tihdertute mi tam tak an awm si a, serh tanho zînga mi an ni deuh ber;

¹¹chûngho kâ chu huhsak tûr a ni, hlêpna bawlhhlawh duh vânga thu zirtîr loh tûr zirtîrin, mite a chhûng chhûngin an chawk khawlo si ṭhîn a.

¹²Anmahni zînga mi, anmahni zâwlnei pakhat ngeiin, “Kret thliarkâra mite chu dawthei te, sakawlh sual te, thatchhe chaw heh te an ni fo mai,” tiin a sawi kha.

¹³Chu thu hriattîr chu a dik a ni. Chu vâng chuan Juda-ho thawnthute leh thutak hawisan ṭhînte thupêkte chu ngaihsak lovin, rinnaah chuan an dik theihna tûrin na takin zilhhau rawh.

¹⁵Mi thianghlimte tân chuan engkim a thianghlim ṭhîn; nimahsela, mi bawlhhlawh leh ringlote tân chuan eng mah thianghlim rêng a awm ṭhîn lo, an rilru leh an chhia leh ṭha hriatna rêng pawh a bawlhhlawh tawh a.

¹⁶Pathian hria an inti a, tenawm te, thu awih lo te, thil ṭha tinrêng tih kawnga Pathian duh loh zâwng te an ni a, an thiltihin an phatsan si ṭhîn.