Read Mizo_Old_version HNENA LEHKHATHAWN HEBRAITE 10 Bible Online

HNENA LEHKHATHAWN HEBRAITE 10 - Mizo_Old_version bible

HNENA LEHKHATHAWN HEBRAITE 10

¹Dân thu chuan thil ṭha, lo awm tûrte anpui tak nei lovin, a thla chauh a neih avângin, kum tina inthawina pângngai an hlan fote chuanin, a rawn hnaihte chu eng tikah mah an tifamkim thei dâwn si lo.

²Chuti ni suh sela, a betute chu vawi khata tihthianghlim nghâla awmin, sual inhriatnate an neih loh avângin hlan an bâng tawh daih dâwn lâwm ni?

³Nimahsela, chûng inthawinaah chuan kum tinin sualte hriat lehna a lo awm fo zâwk ṭhîn.

⁴Bâwngpate leh kêlte thisen chuan sualte tibo thei rual a ni si lo.

⁵Chutichuan, khawvêla a luh laiin, “Inthawina leh thilhlan i duh lo va, Ka tân taksa mi buatsaihsak zâwk a:

⁶Hâlrala pumpêknaahte leh, Sual tâna inthawinaahte chuan Lâwmna rêng i nei lo.

⁷Chu veleh chuan keiin, ‘Aw Pathian, ngai teh, (Lehkhabu zialah chuan ka thu ziak a ni a) I duh zâwng ti tûrin ka lo kal e,’ ka ti a,” a ti a.

⁸A chhakah hian, “Inthawina te, thilhlan te, hâlrala pumpêkna te, sual tâna inthawina te i duh lo va, chûngah chuan lâwmna i nei hek lo,” a ti a (chûngte chu Dân thu anga hlan a ni a),

⁹chu veleh chuan, “Ngai teh, i duh zâwng ti tûrin ka lo kal e,” a lo ti ta a. A pahnihna hi a tundin theihna tûrin a hmasa chu a la bo ta a ni.

¹⁰Chumi duh zâwng chuan, Isua Krista taksa vawi khata hlan nghâl vâng khân tihthianghlimin kan awm ta.

¹¹Tin, puithiam tinrêngin chu kâwla ni chhuak chhiara rawngbâwlin, sualte eng tik maha tibo thei lo inthawina pângngai hlân fovin an ding ṭhîn;

¹²ani erawh hi chu chatuan atân sualte tâna inthawina pakhat chauh a hlan hnuin, Pathian ding lamah a han ṭhu ta zâwk a;

¹³chuta chin chu a hmêlmate a kephah nghahchhana siam an nih hma loh zawng a nghâk reng a.

¹⁴Thilhlan pakhat chauhvin tihthianghlim tawhte chu chatuan atân a tifamkim tawh si a.

¹⁵Tin, Thlarau Thianghlim pawh chuan min hriattîr bawk a: “Chûng ni hnuah chuan An hnêna thu ka thlun tûr chu hêng hi a ni,” Lalpan a ti; “An thinlungah ka thupêkte ka dah ang a, An rilruah ka ziak bawk ang,” tia a sawi hnu khân,

¹⁷“An sualte leh an bawhchhiatnate, Ka hre reng tawh lo vang,” a ti si a.

¹⁸Tichuan, chutiangte ngaihdamna apiangah chuan sual tân thilhlan a awm tawh lo a ni.

¹⁹Chutichuan, unaute u, kawng min ruatsak, kawng thar leh nungah chuan, puanzâr chu (chu chu a taksa tihna a ni) kal tlangin, Isua thisen avâng chuan Hmun Thianghlimah khân luh kan huam avâng leh,

²¹Pathian chhûngte chunga Puithiam ropui tak kan neih avângin,

²²kan thinlunga chhia leh ṭha hriatna ṭha lo chu theh faisaka awma, kan taksa pawh tui fîma buala awmin, rinna famkim neia thinlung takzet puin i hnaih ang u.

²³Kan beisei thurin hi a nghîn lohna tûrin i pawm tlat ang u, thutiamtu chu a rinawm si a.

²⁴Tin, hmangaih leh thil ṭha tiha inchawk tho tûrin i inngaihtuah tawn ang u;

²⁵ṭhenkhat tih dân anga kan inkhâwm te bânsan lovin, i infuih tawn zâwk ang u; ni chu lo hnai telh telha in hriatin infuih tawn nasa lehzual sauh rawh u.

²⁶Thutak hriatna famkim chu kan chan hnua thil kan tihsual luih si chuan, sualte tâna inthawina a awm tawh hauh lo vang a,

²⁷rorêlna hlauhawm tak lo thleng tûr leh dotute kâng ral tûr thinurna mei kan hmabâk a ni mai.

²⁸Mosia Dân thu pawisa lo mi chu hretu pahnih pathum emaw thuin, lainatna tel lovin an thi ṭhîn.

²⁹Pathian Fapa rap beta, thuthlung thisen, amah tihthianghlimna chu thil narâna ruata, khawngaihna Thlarau tivuitu chu, chu mi ai chuan engtia hremna nasa zâwk nge tuar tlâka ruat tûr nia in ngaih?

³⁰“Phuba rêng rêng keima lâk tûr a ni, keimân ka thungrûl ang,” tih leh, “Lalpa chuan a mite a ngaihtuah ang,” ti lehtu chu kan hre si a.

³¹Pathian nung kuta tlûk chu thil râpthlâk tak a ni.

³²Nimahsela, hmâna tihêna in awm hnua, tuarna buai nasa tak in tuar lai nite kha hre leh rawh u;

³³kawng khatah chuan hmuhsit leh hrehawmte pawh tuarin ennawma siamin in awm a, kawng dangah chuan chutianga hmâna awmte chu tuarpuitute in lo ni a.

³⁴Kawl bunte chu in lainat a, sum ṭha zâwk, awm hlen bawk tûr chu mahniin in nei tih hriain, in sum an lâksakte pawh lâwm takin in lo tuar ta bawk si a.

³⁵Chutichuan, in rinna lâwmman chu paih bo suh u, lâwmman ropui tak a nei dâwn si a.

³⁶Pathian duh zâwng in tih hnuin thil tiam chu in hmuh theih nân chhelna in ngai asin.

³⁷Rei lo tê achinah Lo kal tûra chu a lo kal dâwn si a, Rei a rial tawh lo vang.

³⁸Nimahsela, ka mi fel chu Rinnain a nung ang; A hnungtawlh erawh chuan, Ka rilruin amahah chuan lâwmna rêng a nei lo vang.

³⁹Nimahsela, keini zawng boral tûra hnungtawlh pâwla mi kan ni lo va; nunna humhim tûra rinna nei pâwla mi kan ni zâwk.