Read Mizo_Old_version HNENA LEHKHATHAWN HEBRAITE 11 Bible Online

HNENA LEHKHATHAWN HEBRAITE 11 - Mizo_Old_version bible

HNENA LEHKHATHAWN HEBRAITE 11

¹Tin, rinna hi thil beiseite awm ngeia hriatna, thil hmuh lohte hriat fiahna a ni.

²Chumiah chuan upahote khân fak an hlawh si a.

³Rinnain khawvêlte hi Pathian thua siam fel diam a ni tawh tih kan hria; chutichuan, thil hmuh theihte hi thil lang theitea siam a ni lo.

⁴Rinnain Abela chuan Kaina ai chuan inthawina ṭha zâwk Pathian hnênah a hlân a, chumi avâng chuan mi fel a ni tih hriattîrna a hlawh a, Pathianin a thilpêkte kawngah chuan thu a hriattîr a; tin, chumi rinna avâng chuan ani chuan thi tawh hnuin thu a la sawi ta fo a ni.

⁵Rinnain Enoka kha thihna hre lo tûra lâk bovin a awm a; tin, Pathianin a lâk bo avângin hmuh theih a ni ta lo va; lâk bova a awm hmain Pathian lâwm zâwng mi a ni tih an hriattîr tawh rêng a.

⁶Nimahsela, rinna lovin ama lâwm zâwng mi nih rual a ni lo; Pathian hnêna lo kal chuan, ani chu a awm tih leh, zawngtute hnêna lâwmman pêk hmang a ni tih rin tûr a ni.

⁷Rinnain Nova chu thil lo la lang lote kawng thu-ah Pathian hrilha lo awmin, Pathian ṭih dêkin a chhûngte chhandam nân lawng a tu a; chu chuan khawvêl chu thiam loh a chantîr ta a, rinna avânga felna awm chu rochungtu a lo ni ta bawk a.

⁸Rinnain Abrahama chu kohva a awm lai khân, a rochun tûr hmuna lût tûrin kal chhuah thu a pawm ta a; tin, a kalna tûr lam pawh hre lovin a kal chhuak ta a.

⁹Rinnain ram tiamah khân mi rama châm ang maiin a châm ta reng a, thutiam hmun khat a rochunpui tûr Isaaka leh Jakoba-te nên chuan puan inahte an awm a;

¹⁰khua, lungphûmte nei mi, Pathian rêlbâwl leh siam chu a nghâk reng si a.

¹¹Rinnain Sari ngei pawhin, a tiamtu chu rinawma a ruat avângin, tar tawh hnuin chi pai theihna a hmu a.

¹²Chutichuan, mipa pakhat lakah (ani chu mitthi ang a ni si a) vâna arsite anga tam, tuifinriat kama ṭiauvaivut chhiar sên loh anga tam an lo chhuak ta a.

¹³Chûng zawng zawng chu rinna neiin an thi ta a, thil tiamte chu chang lovin; nimahsela, chûng chu hla tak aṭanga hmuin chibai an lo bûk tawh a, leiah hian mikhual leh khualzin mai an ni tih an inhriattîr tawh bawk a.

¹⁴Chutiang thu sawite chuan anmahni ram tûr an zawng tih an tilang si a.

¹⁵Tin, an chhuahna ram chu lungkham sela chuan hâwnna remchâng an hmu tawh ngei tûr a ni.

¹⁶Nimahsela, tûnah zawng ram ṭha lehzual châk an lo ni a, chu chu vâna mi a ni; chutichuan, Pathianin an Pathian tiha awm chu a zak lo ve; an tân khua lam a lo buatsaihsak tawh si a.

¹⁷Rinnain Abrahama chu fiaha a awm khân Isaaka chu a hlân a;

¹⁸“Isaaka-ah hian i thlahte chhui an ni ang,” tih Pathian thutiam dawngtu chuan a fapa mal neih chhun chu a hlân a ni;

¹⁹mitthi pawh Pathian chuan a kaitho thei ang tih a ring a, thi hnu nung leh ang maiin a hmu kîr leh ta rêng a ni.

²⁰Rinnain Isaaka chuan thil lo la thleng tûrte thu-ah pawh Jakoba leh Esauva chu mal a sâwmsak a.

²¹Rinnain Jakoba chuan a thih dâwn lai khân Josefa fate chu mal a sâwm ve ve a; a tiang hmâwr rinchhanin Pathian a be bawk a.

²²Rinnain Josefa chuan a thih a lo hnaih khân Israela thlahte chhuah tûr thu a sawi a; a ruhte kawng thu-ah thu a pe bawk a.

²³Rinnain Mosia a lo pian lai khân, nausên hmêlṭha tak a ni an tih avângin, thla thum chhûng a nu leh a pa thuhrukin a awm a; lal thupêk pawh an hlau lo.

²⁴Rinnain Mosia chuan, a lo puitlin hnu khân Pharaoa fanua fapaa vuah a duh lo va;

²⁵rei lo tê atân sual nawmna hlimpui ai chuan, Pathian mite nêna tihduhdah tuar a thlang ta zâwk a;

²⁶Krista an hmuhsitna chu Aigupta ram rote ai chuan sum ropui zâwkah a ruat a; lâwmman pêk tûr chu a thlîr ṭhin avângin.

²⁷Rinnain lal thinurna chu hlau lovin Aigupta ram a kalsan a, hmuh theih lohva chu a hmuh avângin a tuar ṭan ṭan a ni.

²⁸Rinnain kalhlên kût leh thisen theh kha a siam a, fa tîr tiboraltu chuan anmahni a tawh lohna tûrin.

²⁹Rinnain khawmuala kal angin Tuifinriat Senah khân an kal kai a; Aigupta-hovin chu chu tih an tum ve a, lem zawhin an awm ta a.

³⁰Rinnain Jeriko khaw kulh kha ni sarih an hual hnuin a chim ta a.

³¹Rinnain Rahabi nawhchizuar kha awih loho zîngah chuan a boral ve ta lo, enthlatute chu tlang taka a lawm avângin.

³²Tin, eng nge ka la sawi cheu vang? Gideona thu te, Baraka thu te, Samsona thu te, Jephtha thu te, Davida thu te, Samuela thu te, zâwlneiho thu te hril ila, hunin mi daih dâwn si lo va;

³³chûngte chuan rinnain ramte an la a, thil fel an ti a, thutiamte an chang a, sakeibaknei khate an tihchihsak a,

³⁴mei thiltihtheihna an timit a, khandaih hriam lam an pumpelh a, chak lohna ata chak taka siamin an awm a, indonaah chuan mi hrât khawkhêng an lo ni a, hnam dang indo pâwlte an tlânchhiattîr a.

³⁵Hmeichhiaten an mitthite tholeh an hmu a; mi dangte pawh sawisakin an awm a, thawhlehna ṭha lehzual an chan theihna tûrin chhanchhuah an duh lo va;

³⁶mi dangte pawhin tihnawmnah leh vuakte an tuar a, a ni, chu lo pawh chu, kawl bun leh tân ina khungte an tâwk bawk a;

³⁷lunga denin an awm a, thingzainaa zai bunin an awm a, thlêmna an tâwk a, khandaiha sah hlumin an awm a; berâm vun leh kêl vun sinin an vâkvai a; rethei takin, hrehawm takin, tihduhdahin an awm a

³⁸(chûngho tân chuan khawvêl hi awmna tlâk a ni lo); thlalêrah te, tlângah te, pûkah te, khuarkhurumah te an vâk an vâk ṭhîn a.

³⁹Tin, chûng zawng zawng chuan rinna avânga fak lo hlawh tawhin, thil tiam chu an chang lo va,

⁴⁰keini tel lova anni chu tihfamkima an awm loh nân, Pathianin keimahni kawng thu-ah thil eng emaw ṭha lehzual a buatsaih tawh avângin.