Read Mizo_Old_version HNENA LEHKHATHAWN HEBRAITE 13 Bible Online

HNENA LEHKHATHAWN HEBRAITE 13 - Mizo_Old_version bible

HNENA LEHKHATHAWN HEBRAITE 13

¹Unau inhmangaihna hi awm zêl rawh se.

²Mikhualte chungah hmangaih chhuah theihnghilh suh u; chutiang tiin ṭhenkhatten hre lovin vântirhkohte an thleng si a.

³Phuara awmte chu phuar ni ve angin hre reng ula; hrehawm tuarte chu taksaa awm ve bawk in nih avângin hre reng rawh u.

⁴Mi zawng zawng zîngah inneih hi chawimawiin awm sela, khum pawh tihbawlhhlawh lohvin awm rawh se; inngaite leh uirête chu Pathianin a ngaihtuah dâwn si a.

⁵In rilru putzia chu tangka ngainatna tel lo ni rawh se; in thil neih chhun chungahte chuan lungawi rawh u; amah ngeiin, “Eng tikah mah ka thlahthlam tawp lo vang chia, kal pawh ka kalsan tawp lo vang che,” a ti si a.

⁶Chutichuan, huai takin, “Lalpa chu mi ṭanpuitu a ni, Ka hlau lo vang; Mihringin eng nge mi tih theih ang?” kan ti ṭhîn a ni.

⁷In hotu, Pathian thu lo hrilhtute che u chu hre reng ula, an awm dâna thil chhuak chu ngaihtuahin an rin dân zir rawh u.

⁸Isua Krista chu niminah nên, vawiinah nên, kumkhua pawhin a pângngaiin a awm fo vang.

⁹Zirtîrna tinrêng leh zirtîrna mak tak len bovin awm suh u; thinlung hi khawngaihnaa tihngheha a awm chu a ṭha si a, ei tûrtea tihngheha awm lovin; chutiang kawng lungkhamte chuan chûngah chuan sâwtna an hmu chuang lo.

¹⁰Keini zawngin maichâm kan nei a, chumiah chuan biakbûk rawngbâwltute chuan an ei tûr a ni lo.

¹¹Ran, a thisen puithiam lalberin Hmun Thianghlima sual tâna hlana a luhpui ṭhina ruangte chu, dai pâwnah an hâl ṭhîn si a.

¹²Chutichuan, Isua pawhin, ama thisen ngeia mite chu a tihthianghlim theihna tûrin, kulh kawngkhâr pâwn lamah chuan a lo tuar ta a.

¹³Chutichuan, amah an hmuhsitna chu phurin dai pâwnah a hnên lamah i kal chhuak ang u.

¹⁴Hetah hian khaw hmun nghet kan nei si lo va, khaw lo la awm tûr chu kan zawng zâwk a ni.

¹⁵Tichuan, ama zârah chuan faka inthawina hi Pathian hnênah i hlân fo vang u, chu chu a hming ṭanna hmuite rah chu a ni.

¹⁶Nimahsela, thil tihṭhat leh thilphal hi theihnghilh suh u; chutiang inthawina chungah chuan Pathian a lungni êm êm si a.

¹⁷In hotute thu awih ula, an thu thuin awm rawh u; chanchin sawi tûr an nih avângin, lungngai chunga sawi lova, hlim taka an sawi theihna tûrin in thlarau an vênsak ṭhîn che u a ni; lungngai chunga sawi chu in tâna pawi tûr a ni si a.

¹⁸Min ṭawngṭaisak rawh u; engkimah fel taka awm tumin, chhia leh ṭha hriatna thiang tak kan nei tih dik takin kan inhre si a.

¹⁹Tin, rang deuhva in hnêna tirh lehin ka awm theih nân, chu chu ti tûrin ka ngên lehzual sauh che u a ni.

²⁰Tin, remna Pathian, berâm Vêngtu ropui tak, kan Lalpa Isua chatuana thuthlunna thisen zâra mitthi zîng ata hruai chhuak lehtu khân,

²¹a mit hmuha a lawm zâwng ang apiang Isua Krista zârah keimahniah thawkin, a duh zâwng ti tûrin thil ṭha tinrêng kawngah tifamkim che u rawh se; Isua Krista hnênah chuan ropuina chatuanin awm rawh se. Amen.

²²Nimahsela, unaute u, ka ngên a che u, fuihna thu hi ngaithei hrâm hrâm rawh u; in hnênah thu tlêm tê ka ziak si a.

²³Kan unaupa Timothea kha an chhuahtîr ta tih lo hre ve rawh u; a lo kal hma deuh chuan amah nên kan rawn hmu ang che u.

²⁴In hotu zawng zawng leh mi thianghlim zawng zawng kha chibai mi bûksak ang che u. Itali rama mite hian chibai an bûk a che u.

²⁵In zaa hnênah khawngaihna awm rawh se. Amen.