Read Mizo_Old_version HNENA LEHKHATHAWN HEBRAITE 2 Bible Online

HNENA LEHKHATHAWN HEBRAITE 2 - Mizo_Old_version bible

HNENA LEHKHATHAWN HEBRAITE 2

¹Chuvângin, benga kan hriatte kha ṭhahnemngai takin kan pawisa lehzual tûr a ni; chuti lo chuan, kan tawlh bo hlauh dah ang e.

²Vântirhkohte hmanga thusawi mah kha a lo ngheha, bawhchhiatna leh thu awih lohna tinrêngte chuan thungrulhna fel tak a hmuh zêl si chuan,

³heti kauva chhandamna ropui hi thlahthlam ila, engtin nge kan tlân chhuah theih tehlul ang? Chumi chhandamna thu chu a tîra Lalpa hmanga sawi a ni tawh a, a hretute chuan min tihnghehsak a;

⁴Pathian pawhin, chhinchhiahnate leh thil makte leh thiltihtheihna tinrêngte nên, ama duh ang zêla Thlarau Thianghlim thil semte nên chuan anni chu a hriatpui a.

⁵Khawvêl lo la awm tûr, a chanchin kan sawia chu vântirhkohte hnuaiah zawng a dah lo.

⁶Nimahsela, mi tu emaw chuan khawiah emaw hêng thu hi sawiin a hriattîr ta zâwk: “Mihring hi eng nge maw a niha, i hriat reng ṭhin ni? Mihring fapa pawh hi eng nge maw a niha, i kan ṭhin ni?

⁷Ani chu vântirhkohte aia hnuaiin i siam rih a; Ropuina leh chawimawina i khumtîr a, I kutchhuak chungahte chuan hotuah i siam bawk a;

⁸A ke hnuaiahte engkim i dah a,” tiin. Chutichuan, engkim a hnuaia a dah avângin, a hnuaia dah loh eng mah a nei lo. Amaherawhchu, tûnah zawng engkim a hnuaiah awmin kan la hmu rih lo ve.

⁹Nimahsela, Isua, vântirhkohte aia hnuaia siam riha chu, thihna tuar avânga ropuina leh chawimawina khumtîra awmin kan hmu ta zâwk a ni. Pathian khawngaihna zârah thihna chu mi tin a temsakna tûrin.

¹⁰A tân engkim awma, a zâra engkim awm bawka tân chuan, fa tam tak ropuinaa a hruai luh zawngin, an chhandamna siamtu kha tuarnate avânga tihfamkim chu a âwm rêng si a.

¹¹Tithianghlimtu leh tihthianghlimate chu an zain Mi Pakhata chhuak an ni si a; chuvângin, ani chuan anmahniho chu “unaute” tih a zak lo ve.

¹²“Ka unaute hnênah i hming ka hril ang a; Awm khâwm zîngahte chuan Hla sain ka fak ang che,” tiin.

¹³Tin, “Amahah ka rinna ka nghat ang,” a ti leh a. Tin, “En teh u, kei leh Pathian mi pêk naupangte hi,” a ti leh pek a.

¹⁴Tichuan, naupangte hi tisa leh thisen changte an nih hlawm avângin, amah ngei pawhin chûng bawk chu a chang ve ta a; thihnain thihna thuneitu (chu chu Diabola a ni) a tihboral theihna tûr leh,

¹⁵thih hlauh vânga dam chhûnga bawiha awm zawng zawngte chu a chhanchhuah theihna tûrin.

¹⁶A ṭanpui ṭhinte chu vântirhkohte an ni hauh si lo va, Abrahama thlahte an ni a ṭanpui zâwk ṭhin chu.

¹⁷Chutichuan, mite tân sual thupha chawina siamsak tûrin, Pathian lam thilahte chuan Puithiam Lalber, mi lainat thei leh rinawm tak a nih theih nân, engkima a unaute anga lo awm chu a tân a ṭûl rêng a ni.

¹⁸Amah ngei chuan thlêmna tâwkin a lo tuar tawh avângin, thlêmna tâwkte chu a ṭanpui thei a ni.