Read Mizo_Old_version HNENA LEHKHATHAWN HEBRAITE 3 Bible Online

HNENA LEHKHATHAWN HEBRAITE 3 - Mizo_Old_version bible

HNENA LEHKHATHAWN HEBRAITE 3

¹Chutichuan, unau thianghlim, vân kohna chang vete u, kan thurina Tirhkoh leh Puithiam Lalber, Isua chu ngaihtuah rawh u;

²Pathian chhûngte zawng zawng zîngah Mosia a rinawm ang bawk khân, ani chu ruattu lakah chuan a rinawm a ni.

³Chhûngkaw puipa chu a chhûngte aiin an chawimawi zâwk ang ngeiin, ani chu Mosia aiin ropui lehzualna hmu tlâka ruat a ni tawh si a.

⁴Chhûng tin hian puipa tu emaw tal an nei ṭheuh si a; engkim puipa erawh chu Pathian a ni.

⁵Tin, chumi hnua thu la sawi tûrte hriattîr nân, Mosia chu Pathian chhûngte zawng zawng zînga rawngbâwltuah zawng a rinawm ngei a;

⁶Krista erawh chu Pathian chhûngte chunga Fapaah a rinawm a ni. A chhûngte chu keimahni kan ni, a tâwp thlengin kan huaina leh kan beisei chhuanna hi nghet taka kan vawn tlat phawt chuan.

⁷Chutichuan, Thlarau Thianghlim sawi ang bawkin: “Vawiin hian a aw in hriat chuan,

⁸Thlalêra thlêmna nia An tihvui lai ang khân, In thinlung tikhauh suh u;

⁹Chutah chuan in thlahtute chuan Mi fiahin mi thlêm a, Kum sawmli chhûnga Ka thiltihte chu an hmu a;

¹⁰Chutichuan, chumi chhuanho chungah chuan ka lungni lo va, ‘An thinlungin an ngai sual fo ṭhîn a, Ka kawngte pawh an hre lo,’ ka ti a,

¹¹Ka thinura ka chhechham ang khân, Ka chawlhnaah chuan an lût lo vang,” tiin.

¹²Unaute u, fîmkhur rawh u; chuti lo chuan, Pathian nung chu bânsan tûrin, in zîngah tu chhûngah pawh rin lohna thinlung sual a lo awm dah ang e.

¹³“Vawiin” an tih chhûng hian ni tinin infuih tawn zâwk rawh u; chuti lo chuan, in zînga mi tu pawh hi sual bumnaa tihkhauhvin in awm dah ang e.

¹⁴Krista changtute kan lo ni ta si a, kan rin chhan ṭan tirhna kha a tâwp thlenga nghet taka kan vawn tlat phawt chuan,

¹⁵“Vawiin hian a aw in hriat chuan, An tihvui lai ang khân In thinlung tikhauh suh u,” an tih chhûng zawng hian.

¹⁶A nih leh tute nge ni hre reng sia tivui kha? Aigupta ram aṭanga Mosia hruaia chhuak zawng zawng kha an ni lo vem ni?

¹⁷Tin, tute chungah nge ni kum sawmli chhûnga a lungnih loh kha? Tisualtu, an ruang thlalêra tlu tate chungah khân a ni lo vem ni?

¹⁸Tin, thu awih lote hnênah chauh lo chuan, tu hnênah nge a chawlhnaa lût lo tûra chhechhama a tiam ni?

¹⁹Chutichuan, rin lohna avângin an lût thei ta lo tih kan hria a ni.