Read Mizo_Old_version HNENA LEHKHATHAWN HEBRAITE 6 Bible Online

HNENA LEHKHATHAWN HEBRAITE 6 - Mizo_Old_version bible

HNENA LEHKHATHAWN HEBRAITE 6

¹Chutichuan, Krista thu bul hril tawh lovin puitlin lam i pan ang u; thiltih thi simna te, Pathian lama rinna te, baptisma te leh, kut nghah leh, mitthi thawhlehna leh, chatuana rorêlna kawng lam zirtîrnate lungphûm chu phûm leh tawh lovin.

³Pathianin rem a tih chuan chu chu kan ti ngei ang.

⁴Tin, vawi khat rilru tihvâra, vân thilpêk tema, Thlarau Thianghlim chantîra,

⁵Pathian thu ṭha leh hun lo la awm tûra thiltihtheihna tem tawh zeta,

⁶tlûksante kawng thu zawng - chu mite chu an simna tûrin siam thar leh rual an ni lo, Pathian Fapa chu anmahni tân khêng bet nawn leha timualpho an nih avângin.

⁷Lei, a chunga ruahtui tla ṭhîn lo dawng tawha, a thawhsakate tâna thlai ei tlâk chhuahtu chu Pathianin mal a sâwm ṭhîn.

⁸Amaherawhchu, hnimhlîngnei leh buarte a chhuah chuan mâkin a lo awm a, ânchhe dawng thaw a lo ni ṭhîn a, a tâwpah chuan hâl a tâwk ṭhîn.

⁹Nimahsela, duh takte u, chutiang thu sawi mah ila, nangni zawngin chutiang thil aia thil ṭha zâwk, chhandamnaa tel thilte chu in tih kan ring a che u.

¹⁰In hnathawh leh a hming chunga hmangaihna in lantîr, mi thianghlimte rawng in lo bâwl, tûn thleng pawha in la bâwl cheu chu theihnghilh tûrin Pathian chu mi fel lo a ni si lo va.

¹¹Nimahsela, a tâwp thlenga beiseina famkim hmu tûrin, in taihmâk pângngai ang khân taihmâk chhuah ṭheuh fo ula kan ti êm êm mai;

¹²chutichuan, in inthlahdah lo vang a, rinna leh nghah peihna vânga thutiamte rochung tawhte zir ho in ni zâwk ang.

¹³Pathianin Abrahama hnêna thu a rawn tiam lai khân, amah aia ropui zâwk chhâla chhia a chham theih loh avângin amah leh amah inchhâlin,

¹⁴“Matheilovin mal ka sâwmsak ngei ngei ang chia, tih pawh ka tihpunsak ngei ngei ang che,” tiin chhia a chham ta a.

¹⁵Chutichuan, chhel taka a tuar chhuah hnuin thil tiam chu a hmu ta ngei a.

¹⁶Mihringte hian an aia ropui zâwk chhâlin chhia an chham ṭhîn a ni; an inhnialna tinrêngah pawh tihnghehna tûrin chhechham hi tihtâwpna a ni ṭhîn.

¹⁷Chutichuan, Pathian chuan a thutiam dawngtu tûrte hnênah a thu a thlâk mai mai dâwn lo tih chiang taka tihlan a duh a, chhechhamin a tinghet a.

¹⁸Pathian daw rual lo a nihna thil danglam thei lo pahnih avâng hian, keini inchhanhim nân kan hmaa beiseina dah chu chelh tûra tlânte hian fuihna nasa tak kan neih theihna tûrin.

¹⁹Chu beiseina chu nunna thîrchakaiah kan nei a, rinawm leh nghet tak a ni, puanzâr chhûnga miah pawh chuan a lût a;

²⁰chutah chuan Isua chu Melkisedeka awm dân anga chatuana Puithiam Lalber lo ni tawhin, kan tân hmahruaituah a lo lût ta a.