Read Mizo_Old_version HNENA LEHKHATHAWN HEBRAITE 8 Bible Online

HNENA LEHKHATHAWN HEBRAITE 8 - Mizo_Old_version bible

HNENA LEHKHATHAWN HEBRAITE 8

¹Tichuan, kan thusawite zîngah hian a pawimawh ber chu hei hi a ni: chutiang Puithiam Lalber, vânahte khian Ropuibera lalṭhutphah ding lama han ṭhua, Hmun Thianghlim leh biakbûk tak tak, mihring sak ni lo, Lalpa sak zâwka rawngbâwltu chu kan nei, tih hi.

³Puithiam lalber apiang chu thilpêk leh inthawinate hlân tûrin ruat an ni si a; chutichuan, he Puithiam Lalber pawh hian eng emaw tal hlan tûr a neih a ngai a ni.

⁴Leiah hian lo awm sela chuan puithiam rêng a ni lo vang, Dân thu ang zêla thilpêk hlântute lo awm sa an awm avângin.

⁵Chûngte chuan vân thilte chu a lem leh a hlim rawng an bâwl ṭhîn a, Mosian biakbûk a sak dâwn laia Pathian hrilha a awm ang khân: “Tlânga entawn tûr chu an entîr che ang khân engkim siam tûrin fîmkhur rawh,” a tih kha.

⁶Tûnah erawh chuan thuthlung ṭha lehzual palai a nih angzia zêlin, rawngbâwl hna ṭha zâwk a lo chang ta, chu thuthlung chu thutiam ṭha zâwk chungahte siam a ni.

⁷Thuthlung hmasa chu sawisêl bo ni se, thlun nawn a ngai lo tûr.

⁸Anmahni demin hêng hi a sawi si a: “Ngai teh, nite a lo thleng dâwn e, Lalpan a ti, Chûng niahte chuan Israela chhûngte leh, Juda chhûngte hnênah chuan thuthlung thar ka siam ang;

⁹An thlahtute Aigupta ram aṭanga hruai chhuak tûra, An kuta ka chelh nia An hnêna ka thlun ang kha ni lovin; Ka thuthlungah chuan an awm reng si lo va, Tichuan, anni chu ka ngaihsak ta lo a ni, Lalpan a ti.

¹⁰Chûng ni hnuah chuan Israela chhûngte hnêna Thu ka thlun tûr chu hêng hi a ni, Lalpan a ti: An rilruah ka thupêkte ka dah ang a, An thinlungah ka ziak bawk ang a; Tin, an tân Pathian ka ni ang a, Keia tân anni chu ka mite an ni bawk ang;

¹¹Tin, mi tinin, ‘Lalpa chu hre rawh,’ tiin, Mahni tualkhatpui leh, Mahni unau an zirtîr dâwn tawh lo va; A tê ber aṭangin a lian ber thlengin, An zain mi hre ṭheuh tawh dâwn a ni.

¹²An bawhchhiatnaahte zah ka ngai ang a, An sualte pawh ka hre reng dâwn tawh si lo,” tiin.

¹³“Thuthlung thar” tiin a sawi avâng khân a hmasa chu a tihlui ta a ni. Tichuan, lo hluia lo upa tawh chu a ral dâwn dâwn a ni.