Read Mizo_Old_version LEHKHATHAWN JAKOBA 1 Bible Online

LEHKHATHAWN JAKOBA 1 - Mizo_Old_version bible

LEHKHATHAWN JAKOBA 1

¹Jakoba, Pathian leh Lalpa Isua Krista bawih chuan Hnam Sâwm leh Hnam Hnih Darhte chu chibai a bûk e.

²Ka unaute u, in rinna fiahna chuan chhelna a siam tih hriain, thlêmna tinrêng in tawh hunin lâwmna hlîrah ngai rawh u.

⁴Tin, eng mah tlachham lova in famkima, in puma in him theih nân chhelna chuan thawk famkim rawh se.

⁵In zîngah tu pawhin finna a tlâkchham chuan, mi zawng zawng hnêna hau lo leh ui lova pe ṭhîntu Pathian chu dîl rawh se; chutichuan, a hnênah pêk a ni ang.

⁶Nimahsela, ringhlel hauh lovin, rinna neiin dîl rawh se; ringhleltu chu tuifinriat fâwn, thli chhêm lên leh vawrh ang a ni si a.

⁷Chutiang mi, rilru bulbâl nei lo, a thiltih zawng zawnga nghet lo mi chuan Lalpa hnênah eng mah hmuh inring suh se.

⁹Unau daikil kâra mi chu chawimawia a awm avângin lâwm rawh se;

¹⁰hausa erawh chu tihtlâwma a awm avângin lâwm rawh se; hlobet pâr angin a la ral mai dâwn si a.

¹¹Ni a lo chhuaha, thli lum tak a lo tlehin hlobet a tivuai a; tin, a pâr chu a rêm a, a awm dân mawizia chu a boral ṭhîn; chutiang bawkin mi hausa chu a kalnaah chuan a lo vuai dâwn si a.

¹²Thlêmna tuar hrâm hrâmtu chu a eng a thâwl e; fiaha a awm hnuin nunna lallukhum, Lalpan amah hmangaihtute hnêna a tiam chu a hmu dâwn si a.

¹³Tu mân thlêmna an tawh laiin, “Pathian thlêm ka ni,” ti suh se; Pathian chu sual thlêm rual a ni lo, amah pawhin tu mah a thlêm ngai lo.

¹⁴Mi tin mahni châknaa hruai bo leh hîpa an awm chuan thlêmna an tâwk a ni zâwk e.

¹⁵Tin, châkna chuan no a pai a, sual a hring ṭhîn a; tin, sual chuan a lo puitlinin thihna a hring ṭhîn.

¹⁶Ka unau duh takte u, bumin awm suh u.

¹⁷Thilpêk ṭha leh thilpêk famkim zawng zawng chu, chung lam aṭangin êngte Pa hnên ata a lo chhuk ṭhîn a ni, amahah chuan danglamna leh herna hlim rêng rêng a awm thei lo.

¹⁸A thil siamte hmahruaitu ang kan lo nih theih nân, ama duh zâwngin thutak lakah chuan min hring a ni.

¹⁹Unau duh takte u, chûng chu in hria e; nimahsela, mi tinin ngaihthlâk chuh sela, thusawi chuh lo sela, thin tinel rawh se;

²⁰mihring thinurnain Pathian felna chu a siam si lo.

²¹Chuvângin, bawlhhlawh zawng zawng leh sual khat liam chu dah bo ula, thu tuh, in thlarau chhandam thei chu, thuhnuairawlh takin pawm rawh u.

²²Nimahsela, thu ngaithlatute mai ni lovin, zâwmtute lo ni zâwk rawh u; chuti lo chu, mahni inbum in lo ni dah ang e.

²³Tu pawh thu ngaithlatu nia zâwmtu ni si lo chu, mi, dârthlalanga a pianpui hmai ngun taka inen ang chu a ni:

²⁴ngun takin a inen a, a kal bo va, mi eng ang nge a nih a intheihnghilh nghâl si ṭhîn.

²⁵Amaherawhchu, tu pawh dân famkim, zalênna dân hi biha, chutianga awm renga, ngaithlaa, theihnghilh leh mai ṭhîntu ni lova, zâwma, hna thawk fo ṭhîntu ni zâwk chu, chu mi chu a thiltihah malsâwmin a awm ang.

²⁶Tu pawh sakhaw ngaihsak nia inringa, a lei vêng ṭha si lova, mahni thinlung inbum zâwk chu, chu mi sakhaw biak dân chu eng mah a ni lo ve.

²⁷Kan Pathian leh Pa mit hmuha sakhaw biak dân thianghlim leh sual tel lo chu hei hi a ni, fahrah leh hmeithaite an hrehawm laia kan leh, khawvêl bawlhhlawh kai lova insiam ṭhin hi.