Read Mizo_Old_version LEHKHATHAWN JAKOBA 2 Bible Online

LEHKHATHAWN JAKOBA 2 - Mizo_Old_version bible

LEHKHATHAWN JAKOBA 2

¹Ka unaute u, kan Lalpa Isua Krista, Ropuina Lalpa chu ring chungin, mi thlei bîk nei suh u.

²In inkhâwmna inah mi, rangkachak zungbun bun, puan mawi tak sin lo lût sela, mi rethei puan chhe tak sin lo lût bawk sela;

³tin, puan mawi tak sin chu in ngaihsaka, a hnênah chuan, “Nang he hmun ṭhaah hian ṭhu rawh,” in tiha, mi rethei hnênah chuan, “Nang chu sawtah sâwn ding la, a nih loh leh ka ke nghahchhan hrûlah hian ṭhu rawh,” in tih chuan,

⁴in rilruah thlei bîk neiin ngaihtuahna sual pua sawisêltute in lo ni dâwn lâwm ni?

⁵Ka unau duh takte u, ngai teh u, Pathianin he khawvêl thila retheite hi rinnaa hausa tûr leh, amah hmangaihtute hnêna a tiam ram chu luahtu tûrahte a ruat lo vem ni?

⁶Nangni zawngin mi rethei chu in timualpho ta zâwk a ni. Mi hausate chu a tiduhdahtu che u leh rorêlna ina hnûk lût ṭhîntu che u chu an ni lâwm ni?

⁷Hming zahawm tak in put hi sawichhetute chu an ni lâwm ni?

⁸Nimahsela Pathian Lehkha Thu, “Nangmah i inhmangaih angin i vêngte i hmangaih tûr a ni,” tih lal dân hi in zawm chuan in tiṭha e;

⁹amaherawhchu, mi thlei bîk in neih chuan in tisual a ni, Dânin bawhchhetuah a chantîr si che u a.

¹⁰Tu pawhin Dân zâwm kim mah sela, kawng khata a tihsual si chuan, a zaah chuan thiam loh changin a awm tawh a ni.

¹¹“Uire suh,” titu chuan, “Tualthat suh,” a ti bawk si a. Chutichuan, uire lo mah la, tual i thah si chuan Dân bawhchhetu i ni rêng rêng tawh a ni.

¹²Chuvângin, zalênna dâna rorêlsak tûrte angin thu sawi ula, thil ti bawk rawh u.

¹³Mi chunga khawngaihna nei lo chu khawngaihna tel lovin rorêlsakin a awm ang; khawngaihna hi rorêlna aiin a chungnung zâwk a ni.

¹⁴Ka unaute u, miin, “Rinna ka nei,” ti mah sela, thiltih a neih si loh chuan eng nge sâwt ang? Chutiang rinna chuan amah a chhandam thei ang em ni?

¹⁵Unaupa emaw, unaunu emaw, saruaka awmin an ni tin chaw tlachham sela;

¹⁶tin, in zînga tuin emaw, an hnênah, “Thlamuang takin kal ula, lum tak leh puar takin awm rawh u,” ti ula, taksa tâna thil châkkhai chu in pêk si loh chuan eng nge sâwt ang?

¹⁷Chutiang bawkin rinna chu thiltih nei lovin amah chauhvin a awm chuan thi a ni.

¹⁸A ni, mi tuin emaw, “Nangin rinna i nei a, keiin thiltih ka nei a ni; i rinna chu i thiltih tel lovin mi entîr rawh; tin, keiin ka thiltihin ka rinna ka entîr ang che.

¹⁹Pathian chu pakhat a ni tih i ring a ni maw? I tiṭha e; ramhuaite pawhin an ring a, an khûr ṭhîn asin,” a ti ang.

²⁰Aw mi lawilopa, thiltih tel lova rinna mai chu eng mah a ni lo tih i hre duh em le?

²¹Min thlahtu Abrahama chuan a fapa Isaaka maichâm chunga a hlan lai khân, thiltih avângin thiam a chang a ni lâwm ni?

²²Rinna chuan a thiltih nên a thawk dûn a; tin, thiltih avângin a rinna chu a famkim ta tih i hria e.

²³Pathian Lehkha Thu, “Abrahama chuan Pathian a ring a, chu rinna chu a felnaah ruat a ni,” tih thu kha a lo hlawhtling a; tichuan, Pathian ṭhianah vuahin a awm ta a.

²⁴Rinna avâng ngawt ni lovin, thiltih avâng zâwkin miin thiam a chang ṭhîn tih in hre ta.

²⁵Chutiang bawkin Rahabi nawhchizuar pawh khân enthlatute kha a lo lâwm a, kawng danga a hâwntîr lai khân thiltih avângin thiam a chang a ni lâwm ni?

²⁶Thlarau tel lovin taksa chu thi a ni a, chutiang bawkin thiltih tel lovin rinna pawh chu thi a ni.