Read Mizo_Old_version LEHKHATHAWN JAKOBA 4 Bible Online

LEHKHATHAWN JAKOBA 4 - Mizo_Old_version bible

LEHKHATHAWN JAKOBA 4

¹In zînga indona leh inhnialnate hi khawi aṭanga lo chhuak nge ni? In taksa pêngahte indona siam ṭhîntu, in duh zâwng aṭangte chuan lo chhuak a ni lo vem ni?

²In châk a, in nei si lo va; tual in that a, in awt a, in nei thei si lo va: in inhnial a, in indo va; in dîl loh avângin in nei lo va.

³In dîl a, in dîl dik loh avângin in hmu lo, in nawmsak nân hman in tum si a.

⁴Nangni uirete u, khawvêl ṭhian nihna hi Pathian hmêlma nihna a ni tih in hre lo vem ni? Chutichuan, tu pawh khawvêl ṭhian nih duh apiang Pathian hmêlmaah a insiam ṭhîn a ni.

⁵A nih loh leh, “Thlarau keimahnia a chêntîr chuan thîk khawp hialin min duh a ni,” tih hi, Pathian Lehkha Thuin engmahlovin sawiin in ring em ni?

⁶Nimahsela, khawngaihna tam lehzual a pe ṭhîn; chuvângin, Pathian Lehkha Thuin, “Pathianin mi chapote a dodâl a, inngaitlâwmte erawh chu khawngaihna a pe ṭhîn,” a ti a ni.

⁷Chutichuan, Pathian thu thuin awm rawh u; amaherawhchu, Diabola dodâl rawh u; tichuan, a tlân bosan ang che u.

⁸Pathian hnaih rawh u; tichuan, anin a hnaih ang che u. Mi sualte u, in kutte sil fai rawh u; rilru bulbâl nei lote u, in thinlung tithianghlim rawh u.

⁹Hrehawm ula, lungngai ula, ṭap rawh u; in nuih lungngaihah chang sela, in hlim nguiah chang rawh se.

¹⁰Lalpa mit hmuhin inngaitlâwm rawh u; tichuan, a chawimawi ang che u.

¹¹Unaute u, insawichhe tawn suh u. Tu pawhin a unau a sawichhiatin emaw, a unau a sawisêlin emaw, Dân a sawichhiain Dân a sawisêl a ni; nimahsela, Dân i sawisêl chuan Dân zâwmtu i ni lo va, rorêltu i ni zâwk e.

¹²Dân petu leh rorêltu pakhat chauh a awm, chhandam theia tiboral theia chu. Nang ṭhenawmte sawisêltu chu tu nge maw i nih le?

¹³Tûnah ngai teh u khai, nangni, “Vawiinah emaw, naktûkah emaw, chumi khawpuiah chuan kan kal ang a, chutah chuan kum khat kan va thang ang a, kan sumdâwng ang a, hlâwkna kan hmu ang,” titute u,

¹⁴naktûkah chuan eng nge lo awm dâwn in hre si lo. In nunna chu eng nge ni? Chhûm rei lo tê lo langa, ral leh ta mai ṭhîn ang hi in ni si a.

¹⁵Chutichuan, “Lalpan rem a tih chuan kan dam ang a, chumi khami kan ti ang,” in ti tûr hi a ni.

¹⁶Nimahsela, in uannate hi in chhuang zâwk si a, chutiang chhuanna zawng zawng chu sual a ni.

¹⁷Chutichuan, tu pawh thil ṭha tih tûr hriaa ti si lo chu a tân sual a ni.