Read Mizo_Old_version LEHKHATHAWN JAKOBA 5 Bible Online

LEHKHATHAWN JAKOBA 5 - Mizo_Old_version bible

LEHKHATHAWN JAKOBA 5

¹Mi hausate u, ngai teh u khai! In chunga hrehawm lo thleng dâwn mêk avâng chuan ṭap ula, chiau vak vak rawh u.

²In rote a chhe ta a, in puante sûlrûlin a ei zo ta.

³In rangkachak leh in tangkaruate a tuiêk zo ta; a tuiêk chu in thiam lohzia hriattîrna a ni ang a, in tisa chu mei kan angin a ei ang. Ni hnuhnûngah chuan ro in khâwl khâwm a nih hi.

⁴Ngai teh u, in lova buh âta inhlawhfate hlawh, tihdera in pêk loh kha a au va, a âttute mangang au thâwm pawh chu Mipuite Lalpa bengah a lo lût ta a.

⁵Khawvêlah hian nuamsa takin in awm a, in inkhawhral mai mai a; inthah niin in thinlung in titlai a.

⁶Mi fel chu thiam loh in chantîr a, in that a; ani chuan a dodâl lo a che u.

⁷Chutichuan, unaute u, Lalpa lo kal hma loh zawng chhel takin awm rawh u. Ngai teh u, lo neitu chuan ruah tui tla hmasa leh hnuhnûng chu a hmuh hma loh chuan chhel takin lei rah hlu tak chu a nghâk ṭhîn.

⁸Nangni pawh chhel takin awm rawh u; in thinlung tinghet rawh u; Lalpa lo kalna chu a hnai tawh si a.

⁹Unaute u, thiam loh changa in awm loh nân inphun suh u; ngai teh u, Rorêltu chu kawngka bulah a ding reng a ni.

¹⁰Unaute u, Lalpa hminga thu sawitu zâwlneite chu, tuar dân leh chhel dân kawngah chuan entawn atân hmang rawh u.

¹¹Ngai teh u, tuartute chu engthâwl kan ti a; Joba chhelzia chu in hria a, Lalpan a tâwpa a tihzia pawh kha in hmu bawk a, Lalpa chu khawngaihnain a khahzia leh zah a ngaih theihzia pawh kha.

¹²Nimahsela, ka unaute u, eng pawh ti mah ula, chhia chham suh u; vân chhâlin emaw, lei chhâlin emaw, thil dang rêng rêng chhâlin emaw chhia chham suh u; “Ni” in tih chu “Ni” ni sela, “Ni lo” in tih chu “Ni lo” ni rawh se; chuti lo chuan, thiam loh changin in awm ang.

¹³In zîngah thil ṭha lo tuar an awm em? Ṭawngṭai rawh se. Hlim an awm em? Fakna hla sa rawh se.

¹⁴In zîngah damlo an awm em? Kohhran upa kohtîr sela, anin Lalpa hminga hriak hnawihin a chungah ṭawngṭai rawh se;

¹⁵tin, rinnaa ṭawngṭaina chuan damlo chu a chhandam ang a, Lalpa chuan ani chu a kaitho vang; tin, thil a lo tihsual tawh chuan ngaihdamsak a ni ang.

¹⁶Chutichuan, tihdama in awm theih nân in sualte thupha chawi tawn ula, inṭawngṭaisak tawn ṭhîn rawh u. Mi fel ṭawngṭaina chuan thil nasa tak a ti ṭhîn.

¹⁷Elija chu keimahni nungchang ang pu mihring bawk a ni a, ani chu ruah sûr loh nân ṭhahnemngai takin a ṭawngṭai a; tin, kum thum leh thla ruk chhûng zawng lei chungah ruah a sûr ta lo va.

¹⁸Tin, a ṭawngṭai leh a, vânin ruah a sûrtîr a, leiin a rahte a rawn chhuahtîr ta a.

¹⁹Ka unaute u, in zînga mi tu pawh thutak aṭang chuan bo sela; tin, tuin emaw hawi kîrtîr sela,

²⁰mi sual a kawng bona ata hawi kîrtîrtu chuan thihna ata a thlarau a chhandam ang a, sual tam tak a khuhsak bawk ang tih inhre rawh se.