Read Mizo_Old_version LEHKHATHAWN PAKHATNA PETERA 2 Bible Online

LEHKHATHAWN PAKHATNA PETERA 2 - Mizo_Old_version bible

LEHKHATHAWN PAKHATNA PETERA 2

¹Chutichuan, sualna zawng zawng te, ngamthlêmna zawng zawng te, vervêkna te, îtsîkna te, sawichhiatna zawng zawng te bânsan ula,

²nausên piang hlimte angin thlarau lam hnutê, eng mah pawlh loh chu châk rawh u, chumiah chuan chhandamna tling khawpa in ṭhan len theih nân;

³Lalpa chu mi khawngaih thei tak a ni tih in hriat tawh phawt chuan.

⁴Amah chu lung nung, mihringte duh loh ngei, Pathian ngaihah erawh chuan thlan leh hlu tak a ni, ama hnênah chuan lo kalin,

⁵nangni pawh lung nungte angin thlarau lam ina rem chhohvin in awm, Isua Krista zâra Pathian lâwm zâwng thlarau lam inthawina hlân tûrin puithiam thianghlimho in lo nih nân.

⁶Chuvângin, Pathian Lehkha Thuah chuan, “Ngai teh u, Zion-ah chuan a kila lung pawimawh ber, thlan, hlu tak ka rem a ni; Amah ringtu chu a mualpho lo vang,” tih a chuang a ni.

⁷Chutichuan, nangni a awihte tân chuan hlu tak a ni, a awih lote tân erawh chuan, “In satuten lung an duh loh kha, Chu ngei chu a kila lung ṭangkai ber a lo ni ta,

⁸Tlûkna lung leh dâlna lungpui,” nên. An awih lo va, thu-ah chuan an tlu si ṭhîn a; chutianga ti tûr chuan ruat an ni rêng bawk a.

⁹Nimahsela, thim ata chhuaka, a êng mak taka lût tûra kotu che u ṭhatna chu in entîr theih nân, nangni zawng chi thlan, lal puithiamho, hnam thianghlim, Pathian mite ngei in ni si a;

¹⁰hmânlai khân mi rêng in ni lo va, tûnah erawh chuan Pathian mi in ni ta a; hmânlai khân zahngaihna in hmu lo va, tûnah erawh chuan zahngaihna in hmu ta.

¹¹Duh takte u, mikhual leh khualzin in nih avângin, thlarau do ṭhîntu tisa châknate bânsan tûrin ka ngên a che u;

¹²Jentailte zînga in chêtzia chu mawi tak ni rawh se; chutichuan, thil tisualtute anga an sawichhiat che u kawngah chuan, in thil tihṭhat an hmuhte avângin fanin an awm hunah chuan Pathian an chawimawi thei ang.

¹³Lalpa avâng chuan mihring ruat apiangte hnênah intulût rawh u, chungnunga awm lalber hnênah emaw,

¹⁴thil tisualtute chunga phuba la tûr leh, thil ṭha titute fak tûra a tirh chhâwn ram awptu hnênah pawh.

¹⁵Hei hi Pathian duh zâwng a ni si, mi âte thusawi fing lo chu thil ṭha tia in tih dân hi;

¹⁶zalên in ni a; nimahsela, in zalênna chu sual khuh nân hmang lovin, Pathian bawiha awm nân hmang zâwk rawh u.

¹⁷Mi zawng zawng chawimawi rawh u. Unaute chu hmangaih rawh u. Pathian ṭih dêk rawh u. Lalber chu chawimawi rawh u.

¹⁸Chhiahhlawhte u, ṭih dêk hlîrin in hotute thu thuin awm rawh u; mi ṭha leh mi nunnêmte lakah chauh ni lovin, mi nunrâwngte lakah pawh.

¹⁹Miin Pathian hriatna avângin tuar loh tûr tuarin, lungngaihna a tuar hrâm hrâm chuan, chu chu Pathian lâwm zâwng a ni si.

²⁰In suala, kut thlâk in tuarin chhel takin tuar mah ula, fak eng nge in hlawh ṭhin? Amaherawhchu, thil in tihṭhata, in tuarin chhel taka in tuar chuan, chu chu Pathian lâwm zâwng a ni.

²¹Krista pawh khân a tuarsak che u avângin hetiang ti tûrin koh in ni asin; a hniaka in zuina tûrin entawn tûr a hnutchhiah che u kha.

²²Ani chuan thil rêng a tisual lo va, a kaah ngamthlêmna a awm hek lo;

²³mi hauva a awm laiin a hau ve thung lo va, a tuar laiin a vau lo va; fel taka ngaihtuah ṭhîntua hnênah chuan a inpe zâwk a.

²⁴Sual lamahte thi tawhin felna lamah kan nun theih nân, amah ngeiin thingah khân a taksain kan sualte a phur a; amah vuakna vualte chuan tihdamin in awm ta a.

²⁵Berâm bo anga in bo kha; tûnah erawh chuan in thlarau Vêngtu leh Hotu hnênah chuan in kîr leh tâk hi.