Read Mizo_Old_version LEHKHATHAWN PAKHATNA PETERA 4 Bible Online

LEHKHATHAWN PAKHATNA PETERA 4 - Mizo_Old_version bible

LEHKHATHAWN PAKHATNA PETERA 4

¹Chutichuan, Kristan tisaa a tuar avângin nangni pawh chutiang rilrûknain inthuam ve rawh u; tisaa tuar tawh chuan sual a bânsan tawh si a;

²chutichuan, tûn hnuah tisaa in la awm chhûng zawngin mihring châkna lamahte awm tawh lovin, Pathian duh zâwng lamah in awm tawh ang.

³Jentailte duh zâwng tih nân leh hurnaah te, taksa châknaah te, uain hehnaah te, zu hmun hlimnaah te, zu in honaah te, milem biakna tenawm takah te awm nân tûn hma kha a tâwk tawh ang;

⁴chûngah chuan anmahni nawmsak bâwl luattuk anga in bâwl ve tâk loh hi mak an ti a, an sawichhe ṭhîn che u a ni;

⁵anni chuan mi nung leh mitthite ngaihtuah tûra inpeih sa hnênah chuan an chanchin an la sawi ang.

⁶Hemi avâng hian a ni mitthite hnênah pawh chuan Chanchin Ṭha hrilh a nih ni, tisaa awm mihringte anga ngaihtuahin an awm a, thlarau erawha Pathian anga an nun theih nân.

⁷Nimahsela, thil zawng zawng tâwpna chu a hnai tawh a; chuvângin, in ṭawngṭai theih nân rilru fel tak puin fîmkhur rawh u.

⁸Eng dang zawng aiin inhmangaih tawn uar rawh u; hmangaihnain sual tam tak a khuh si ṭhîn a.

⁹Phunnawi lovin inmikhual tawn ula;

¹⁰mi tinin thilpêk in hmuh ang zêlin Pathian khawngaihna tinrêng enkawltu ṭhate angin, chûng chuan rawng inbâwl tawn ṭheuh rawh u.

¹¹Mi tu pawhin thu a sawi chuan, Pathian thute angin sawi rawh se; mi tu pawhin rawng a bâwl chuan, Pathianin chakna a pêk ang zêlin bâwl rawh se; chutichuan, Isua Krista avângin Pathian chu thil engkimah chawimawiin a awm thei ang, ropuina leh rorêlna chu chatuana ama ta a ni si a. Amen.

¹²Duh takte u, in zînga fiahna nasa tak lo awm, nangmahni fiahna tûra in chunga lo thleng hi, thil mak in chunga lo thleng angin mak ti suh u.

¹³Krista tuarnaahte tuarpuitute in nih avângin lâwm zâwk rawh u; chutichuan, a ropuina a lo lan hunah chuan nangni pawh hlim takin in lâwm thei ang.

¹⁴Krista hming avânga hau in nih chuan in eng a thâwl e; Thlarau ropui tak, Pathian Thlarau chu in chungah a awm si a.

¹⁵Nimahsela, in zîngah tu mân tualthattu a nih vângin emaw, rûkru a nih vângin emaw, thil tisualtu a nih vângin emaw, mi dangte thiltih rêlsaktu a nih vângin emaw tuar suh se.

¹⁶Amaherawhchu, Kristian a nih vângin tuar sela, zak suh se.

¹⁷Rorêlna chu Pathian chhûngteah hian ṭan a hun tawh si a; tin, keimahni maha a ṭan hmasak chuan, Pathian Chanchin Ṭha thu zâwm lote tâwpna chu engtin tak ni ang maw?

¹⁸Tin, mi fel mah chhandam hrâm hrâm a nih chuan, Pathian ngaihsak lo leh mi sual chu engtin tak ni ang maw?

¹⁹Chuvângin, Pathian remtih zâwng anga tuarte chuan, thil ṭha tiin an thlaraute chu Siamtu rinawm tak hnênah kawltîr rawh se.