Read Mizo_Old_version LEHKHATHAWN PAKHATNA PETERA 5 Bible Online

LEHKHATHAWN PAKHATNA PETERA 5 - Mizo_Old_version bible

LEHKHATHAWN PAKHATNA PETERA 5

¹Chutichuan, in zînga kohhran upate chu, kei, in upatpui, Krista tuarnate hretu, ropuina lo lang tûr chang vetu tûr hian ka fuih a che u:

²in zînga Pathian pâwlho awm chu enkawl rawh u; tih tûr a nih vâng ni lovin, Pathian thu anga châk chung zâwkin; hlêpna bawlhhlawh duh vâng ni hek lovin, rilrua duh tak zâwkin,

³in chante chungah intilal hek lovin, pâwlho entawnan insiam zâwkin ho rawh u.

⁴Tin, Berâm Vêngtu Lalber chu a lo lan hunin, ropuina lallukhum vuai thei lo chu in hmu ang.

⁵Chutiang bawkin nangni tleirâwl deuhte u, upate hnênah intulût rawh u. A ni, in zain rawng inbâwl tâwn ṭheuh tûrin thuhnuairawlhnain inthuam rawh u; Pathianin chapote a dodâl a, inngaitlâwmte erawh chu khawngaihna a pe si ṭhîn.

⁶Chuvângin, a hun têah chuan a chawimawi theihna tûr che uin, Pathian kut chak tak hnuaiah chuan intihnuai ula,

⁷anin a ngaihsak ṭhin che u avângin, in manganna zawng zawng ama chungah nghat vek rawh u.

⁸Ngaihven ula, fimkhur rawh u; in khingpui Diabola chu sakeibaknei rûm ṭhîn angin, a ei theih tûr zawngin a phi ruai ṭhîn;

⁹in unau khawvêla awmhote chungah chuan chutiang tuarna chu a thleng ve a ni tih hriain, ring nghet taka awmin amah chu do rawh u.

¹⁰Tin, khawngaihna zawng zawng Pathian, a chatuan ropuina chang tûra Kristaa kotu che u ngei chuan rei lo tê in tuar hnuan a siam ṭha famkimin, a tinghetin, a tichak ang che u.

¹¹Ama hnênah chuan rorêlna chu chatuanin awm rawh se. Amen.

¹²Ka unaupa rinawm taka ka ruat Silvana kutah hian nangmahni fuih leh, chu chu Pathian khawngaihna tak tak a ni tih hriattîrin tawi têin in hnênah ka ziak a ni; chûngah chuan ding nghet rawh u.

¹³Babulon khuaa awm, nangmahni anga thlan nu hian chibai a bûk a che u; chutiang bawkin ka fapa Marka pawhin chibai a bûk a che u.

¹⁴Hmangaihna fawha fâwpin chibai inbûk rawh u. In zînga Kristaa awm apiangte hnênah chuan remna awm rawh se.