Read Mizo_Old_version LEHKHATHAWN PAHNIHNA PETERA 1 Bible Online

LEHKHATHAWN PAHNIHNA PETERA 1 - Mizo_Old_version bible

LEHKHATHAWN PAHNIHNA PETERA 1

¹Simon Petera, Isua Krista bawih leh tirhkoh chuan, Isua Krista kan Pathian leh Chhandamtu felna avânga rinna hlu tak kan chan ang chang vete hnênah:

²Pathian leh kan Lalpa Isua hriatnaah chuan, in chungah khawngaihna leh remna tihpunin awm rawh se.

³Ama ropuina leh ṭhatna zâra min kotu, a chanchin hriat avângin a Pathian thiltihtheihnain nunna leh Pathian ngaihsakna lam kawngah chuan thil zawng zawng min pe si a.

⁴Chûng zârah chuan a thutiam hlu tak leh ropui nasa takte chu min pe a ni; chutichuan, châkna avânga khawvêla chhiatna lo awm hi tlân chhuahsan tawhin, chûng thutiam hlu tak leh ropui nasa takte avâng chuan, Pathian nungchang in ṭâwmpui ve thei ang.

⁵A ni, chumi avâng tak chuan taihmâk tinrêng chhuahin, in rinnaah chuan ṭhatna telh ula, in ṭhatnaah chuan hriatna telh ula,

⁶in hriatnaah chuan insûmna telh ula, in insûmnaah chuan chhelna telh ula, in chhelnaah chuan Pathian ngaihsakna telh ula;

⁷in Pathian ngaihsaknaah chuan unaute hmangaihna telh ula, in unaute hmangaihnaah chuan hmangaihna telh rawh u.

⁸Chûng chu in ta a niha, a pun zêl si chuan, kan Lalpa Isua Krista hriatna kawngah hian thatchhe lo leh rah lo lovin a siam ṭhîn che u a ni.

⁹Tu pawh chûng thil nei lo chu mitdel a ni a, hnai têa mi chauh a hmu thei a, a hmânlai sualte tlen faisakna chu a theihnghilh ta si a.

¹⁰Chuvângin, unaute u, a kohna leh a thlanna che u chu tinghet tûrin taihmâk chhuah lehzual rawh u; chûng chu in tih zawngin eng tikah mah in tlu lo vang;

¹¹chutichuan, Isua Krista kan Lalpa leh Chhandamtu chatuan rama luh theihna chu an pe ngei dâwn si che u a.

¹²Chuvângin, chûng thil chu hriain thutak in hnêna awmah chuan in nghet na a, chûng thil chu hriattîr che u ka inpeih fo vang.

¹³Tin, he bâwktêa ka awm chhûng zawng hian, nangmahni hriatpuiin chawh harh fo che u hi ṭha ka ti a ni;

¹⁴kan Lalpa Isua Kristan mi hriattîr ang khân, ka bâwktê dah bo hun chu a thleng thuai ang tih ka hre si a.

¹⁵A ni, ka kal chhuah hnuin chûng thil chu in hriat reng theih nân ka bei ang.

¹⁶Kan Lalpa Isua Krista thiltihtheihzia leh a lo kal lehna thu ka hriattîr lai che u khân, thawnthu, fing taka ngaihtuah chhuah maite zâwm kan ni lo va, a ropuina hmutute kan ni zâwk asin.

¹⁷Ani chuan Pa Pathian hnên ata chawimawina leh ropuina a hmu a, chumi lai chuan ropuina nasa tak aṭang chuan hetiang aw hi a hnênah a lo thleng a: “Hei hi ka Fapa duh tak, ka lawm êm êma chu a ni,” tiin.

¹⁸Tin, tlâng thianghlimah chuan a hnêna kan awm lai khân, chu aw chu vân aṭangin a lo chhuak keimahni ngeiin kan hria a ni.

¹⁹Tin, hril lâwkna thu nghet lehzual chu kan nei a ni, khua a lo vâr a, vârparh arsi chu in thinlunga a lo chhuah hma loh zawng, chu chu khâwnvâr, hmun thima êng an ngaihsak anga in ngaihsak chuan in tiṭha ang.

²⁰Pathian Lehkhaa thu hril lâwk rêng rêng hi mahniin hrilhfiah tûr a ni lo tih hre hmasa phawt ula.

²¹Thu hril lâwk rêng rêng hi mihring thua chhuak a ni ngai si lo va, miten Thlarau Thianghlim tirhin Pathian hnên ata an sawi zâwk ṭhîn a ni.