Read Mizo_Old_version LEHKHATHAWN PAHNIHNA PETERA 2 Bible Online

LEHKHATHAWN PAHNIHNA PETERA 2 - Mizo_Old_version bible

LEHKHATHAWN PAHNIHNA PETERA 2

¹Nimahsela, mite zîngah chuan zâwlnei derte pawh an lo chhuah kha, chutiangin in zîngah pawh zirtîrtu derte an la awm ang, anni chuan anmahni leitu Lalpa meuh chu phatsanin, mi tichhe thei rin hrannate a rûkin an rawn luhpui ang a, mahni chungah chawplehchilha boralna an thlentîr ang.

²Tin, mi tam takin an hurna lam thiltihte chu an chîng ve ang a, anmahni avângin kawng dik tak chu sawichhiat a ni ang.

³Tin, sum awh avângin dâwt thuin sumdâwn nân an hmang ang che u; nimahsela, hmâna an chunga thurêl tawh chu a la ding reng a, anmahni tiboraltu tûra pawh a muhîl lo ve.

⁴Vântirhkohten thil an tihsual lai khân Pathianin a zuah lo va, hremhmunah a paih a, rorêlsaka khêk tûrin khuarkhurum thimah a khung zâwk si a;

⁵tin, amah ngaihsak lote awmna khawvêlah khân tui tilêtin, hmânlai khawvêl chu a zuah lo va; nimahsela, Nova, felna thu hriltu chu, mi dang pasarih nên a chhandam ta a.

⁶Tin, Sodom leh Gomorra khuate chu amah ngaihsak lo, la awm tûrte entîrnaah a hmang a, vuta chantîrin, tiboralin thiam loh a chantîr ta a;

⁷tin, Lota, mi fel, mi sualte awm dân hur tak avânga lungngai êm êma chu a chhandam ta a

⁸(chu mi fel chu an zînga a awmin, a mitin a hmu a, a bengin a hria a, dân lo anga an thiltihte chuan a rilru fel chu ni tin a intina êm êm si ṭhîn a);

⁹Lalpa chuan amah ngaihsaktute chu thlêmna ata chhanchhuah dân leh, fel lote chu rorêl ni atân hrem chunga khêk dân a hria;

¹⁰châkna bawlhhlawh kawnga tisa anga awm leh, rorêlsakna hmusittute lek phei chu rorêl ni atân hrem chunga khêk dân a hre lehzual a ni. Âthuai leh tihmawh an ni a, ropuinate an sawichhiat pawhin an khûr ngai lo;

¹¹vântirhkoh, chakna leh thiltihtheihna nei zâwkte mahin Lalpa hmaah chuan an chungthu rêlsakin an sawichhiat si loh kha.

¹²Nimahsela, hêng nungcha, ngaihtuahna nei lo, mana tihboral tûra sa chauhva piangte ang hian, thil an hriat lohte chu sawichhiain, anmahni chhiatnain an chhe ngei ang,

¹³thil tihsual mana thil sual tuarin. Chhûna ruaiṭheh buai nuam ti mi an ni a. In hnêna ruai an ṭhehin, anmahni inbumna ruai ṭheh an nih avângin bawlhhlawh kaite leh tihkhawlohnate an ni a;

¹⁴mit uirêa khat, sual bân thei lote an ni a; mi nghet lote an thlêm thlu a; awh hmang thinlung an pu a; ânchhe dawng fate an ni a;

¹⁵Bosora fapa Balaama, thil tihsual hlawh ngainatu kawng chu an zawh tawh avângin kawng dik chu an kalsan a, an vâk bo ta a;

¹⁶nimahsela, ani chu a bawhchhiatna avângin zilhhauvin a awm ta a; sabengtung ṭawng thei lo chu mihring ṭawngin a lo ṭawng a, zâwlnei âtna chu a khap a ni.

¹⁷Chûng chu tuikhur tui awm lo leh chhûm thlipui chhêm lên an ni; chûngte tân chuan thim chhah mup chu ruat a ni tawh.

¹⁸Thu lawilo pâwr tak taka sawiin, suala awmte zîng ata tlân chhuak mêkte chu tisa châknaah hurnain an thlêm thlu si ṭhîn.

¹⁹Anmahni chu chhiatna bawih ni chung rengin, mite chu bawih chhuah thu an tiam ṭhîn a; mi ngamtu apiangin chu mi ngei chuan bawihah a siam ṭhîn a ni.

²⁰Lalpa leh Chhandamtu Isua Krista an hriat avânga khawvêl bawlhhlawhnate an tlân chhuahsan hnuin, chumi vêkah chuan an tân leha, ngama an awm leh si chuan, an awmze hnuhnûng chu a tîr ai chuan a lo chhe ta zâwk a ni ang.

²¹Kawng fel chu hriat hnua thupêk thianghlim an hnêna kawltîr chu hawisan ai chuan, kawng fel chu hre lo sela an tân a ṭha zâwk tûr a ni si a.

²²“Ui ama luak lamah a kîr leh a, vawkpui inbual fai tawh pawh chirhdiakah inbual tûrin a kîr leh a,” tih thufing tawi dik tak ang thu chu an chungah a lo awm ta a ni.