Read Mizo_Old_version LEHKHATHAWN PAHNIHNA PETERA 3 Bible Online

LEHKHATHAWN PAHNIHNA PETERA 3 - Mizo_Old_version bible

LEHKHATHAWN PAHNIHNA PETERA 3

¹Duh takte u, tûna in hnêna ka ziak hi ka lehkhathawn pahnihna a ni a, a pahnih hian in rilruah ngaihtuahna thianghlim chawk tho tûrin, hêng thilte hi hriat nawntîrna tûr che uin ka ziak a ni.

²Zâwlnei thianghlimte thu sawi lâwk leh, in tirhkohte kaa Lalpa leh Chhandamtu thupêk chu in hriat rengna tûrin;

³hei hi hre hmasa ula, ni hnuhnûngahte chuan nuihsantute chu anmahni châkna anga awmin, nuihsan chungin an lo kal ang a,

⁴“A lo kal lehna thutiam chu khawiah nge? Siam tirh aṭangin engkim a awm pângngai angin, chi thlahtute muthilh ni ata tawh kha a la awm zêl alâwm,” an la ti ang.

⁵Hêng hi an hai der lui si ṭhîn: Pathian thuin hmânlaiin vânte a lo awm a, lei pawh tui ata leh tui zîngah awm khâwmin a lo awm a;

⁶chûngah chuan chumi laia khawvêl awm chu tuiin a chîm a, a boral ta, tih hi;

⁷nimahsela, tûnah vânte leh leia awmte hi chumi thu avâng vêk chuan, Pathian ngaihsak lo mite rorêl leh boral ni atana dahin hâl tûra khêk a ni.

⁸Nimahsela, duh takte u, he thu kam khat hi theihnghilh suh u, Lalpa ngaih chuan ni khat hi kum sângkhat ang a ni a, kum sângkhat pawh ni khat ang a ni, tih hi.

⁹Mi ṭhenkhatin muanga an ruat angin Lalpa chu a thutiam kawngah chuan a muang lo ve; tu ma boral duh lova, mi zawng zawng lo sim duhin, nangmahni lamah a dawhthei a ni zâwk e.

¹⁰Nimahsela, Lalpa ni chu rûkru angin a lo thleng ngei ang; chumi niah chuan vânte chu nasa taka riin a boral ang a, thil bulte chu meia em ralin a awm tawh ang a, lei leh a chhûnga hnathawh awmte hi a kâng ral ang.

¹¹Chûng thilte chu chutianga boral vek tûr a ni tih in hriat avângin, Pathian ni lo thlen hun tûr chu beisei leh ṭhahnemngai taka duhin, awm dân thianghlim leh Pathian ngaihsak kawngah chuan mi eng ang nge in nih ang le? Chumi ni a thlen avângin vânte lo kângin a boral ang a, thil bulte pawh chu meia em tuiin a awm tawh ang.

¹³Nimahsela, a thutiam ang chuan vân tharte leh lei thar, a chhûnga felna awmte chu kan beisei a ni.

¹⁴Chuvângin, duh takte u, chutiang thilte chu in beisei avângin bawlhhlawh kai lo leh sawisêl bovin, thlamuang taka in awm a hmuh theih nân che u, taihmâk chhuah rawh u.

¹⁵Tin, kan Lalpa dawhtheihzia chu chhandamnaah ruat rawh u; kan unaupa duh tak Paula pawhin a hnêna finna pêk ang zêla in hnêna a ziak ang khân;

¹⁶a lehkhathawn zawng zawngah chuan chûng thu chu sawiin, chutiang bawkin a ziak a ni; chûngah chuan thu hriat har takte a awm a, chûng chu mi fing lo leh mi nghet loten Pathian Lehkha Thu dang an ngai kawi angin an ngai kawi a, mahni leh mahni an intihboral phah ṭhîn.

¹⁷Chutichuan, duh takte u, nangnin chûng thu chu in lo hriat lâwk avângin fîmkhur rawh u; chuti lo chuan, mi sualte dik lohnaa hruai bova awmin, in nghet ṭha lai in tlu dah ang e.

¹⁸Amaherawhchu, kan Lalpa leh Chhandamtu Isua Krista khawngaihna leh hriatnaah chuan lo ṭhang lian rawh u. Tûnah leh chatuan thlengin ama hnênah chuan ropuina awm rawh se. Amen.