Read Mizo_Old_version LEHKHATHAWN PAKHATNA JOHANA 1 Bible Online

LEHKHATHAWN PAKHATNA JOHANA 1 - Mizo_Old_version bible

LEHKHATHAWN PAKHATNA JOHANA 1

¹Nunna Thu, a tîr ata awm kha, kan bengin kan hriat kha, kan mitin kan hmuh kha, kan en reng a, kan kuta kan dap kha, chumi chanchin chu;

²(chu mi Nunna chu a lo lang ta a, kan lo hmu a, kan hriattîr bawk a, chu chatuan Nunna, Pa hnêna awm kan hnêna lo lang chu kan hrilh che u a nih hi;)

³chumi kan hmuh leh kan hriata chu in hnênah kan hrilh ve che u a nih hi, nangni pawhin min pâwl ve theih nân; keini min pâwlna chu Pa leh a Fapa Isua Krista pâwlna a ni tawh reng si a.

⁴Tichuan, kan lâwm a famkim theih nân hêng thute hi kan ziak a nih hi.

⁵Tin, thuchah a hnên ata kan hriata in hnêna kan hrilh chhâwn tûr che u chu hei hi a ni: Pathian chu êng a ni a, amahah chuan thim rêng rêng a awm lo.

⁶Thima awm siin, “Amah ka pâwl,” kan tih chuan dâwt kan sawi a ni, thutak pawh chu kan zâwm lo;

⁷amaherawhchu, amah chu êngah a awm angin keini pawh ênga awm kan nih chuan, kan inpâwl tlâng a; tin, a Fapa Isua thisenin kan sual zawng zawng min tlen faisak ṭhîn a ni.

⁸“Sual ka nei lo,” kan tih chuan mahni leh mahni kan inbum a, thutak chu keimahniah a awm lo a ni.

⁹Kan sualte thupha kan chawi chuan, kan sualte ngaidam tûr leh kan fel lohna zawng zawng tlêng fai tûrin, amah chu a rinawmin a fel a ni.

¹⁰“Thil ka tisual lo,” kan tih chuan amah chu dawtheiah kan siam a, a thu pawh keimahniah a awm lo a ni.