Read Mizo_Old_version LEHKHATHAWN PAKHATNA JOHANA 2 Bible Online

LEHKHATHAWN PAKHATNA JOHANA 2 - Mizo_Old_version bible

LEHKHATHAWN PAKHATNA JOHANA 2

¹Ka naute u, thil in tihsual loh nân hêng thu hi in hnênah ka ziak a nih hi. Tin, tu pawhin thil a tihsual chuan, Pa hnêna min sawipuitu Isua Krista, mi fel chu kan nei e;

²ani chu kan sualte thupha chawina a ni; keimahni sual chauh ni lovin, khawvêl zawng zawng sual thupha chawina pawh a ni.

³Tin, a thupêkte pawm kan nih chuan, chumiah chuan amah kan hria tih kan inhria e.

⁴A thupêkte pawm si lova, “Amah ka hria,” titu chu mi dawthei a ni, thutak amahah a awm lo.

⁵Tu pawh a thu pawm erawh chu amahah chuan Pathian a hmangaihna a famkim takzet tawh a ni. Amahah kan awm tih hemiah hian kan inhria a ni.

⁶“Amahah ka awm reng,” titu chu ama awm ang bawk khân a awm ve tûr a ni.

⁷Duh takte u, thupêk thar zawng in hnênah ka han ziak lo va; thupêk hlui, a tîr ata in neih kha ka ziak zâwk a ni. Chu thupêk hlui chu in thu hriat tawh hnu kha a ni.

⁸Nimahsela, thupêk thar ziak ka ni bawk ang chu (chu chu amahah leh nangmahniah a lang a ni), thim chu a bo mêk avâng leh, êng tak tak chu tûnah a lo ên tâk avâng hian.

⁹Mahni unau haw sia, “Êngah ka awm,” titu chu tûn thleng pawhin thimah a la awm reng a ni.

¹⁰Mahni unau hmangaihtu chu êngah chuan a awm reng a, amahah chuan tlûkna rêng a awm lo.

¹¹Mahni unau hawtu erawh chu thimah a awm a, thimah a vâk bawk a ni; thimin a mit a tihdel tawh avângin a kalna pawh a hre ṭhîn lo.

¹²Naute u, ama hming avânga in sualte ngaihdam a nih tâk avângin in hnênah ka ziak a nih hi.

¹³Pate u, amah, a tîr ata awm renga chu in hriat avângin in hnênah ka ziak a nih hi. Râwltharte u, mi sual chu in ngam tâk avângin in hnênah ka ziak a nih hi. Naute u, Pa chu in hriat avângin in hnênah ka ziak a nih kha.

¹⁴Pate u, amah, a tîr ata awm renga chu in hriat avangin in hnênah ka ziak a nih kha. Râwltharte u, in chaka, Pathian thu nangmahniah a awm renga, mi sual chu in ngam tâk avângin in hnênah ka ziak a nih kha.

¹⁵Khawvêl hi hmangaih suh ula, khawvêla thil awmte pawh hi hmangaih hek suh u. Mi tu pawhin khawvêl hi a hmangaih chuan, Paa hmangaihna amahah a awm lo.

¹⁶Khawvêla thil awm zawng zawng - tisa châkna te, mit châkna te, dam chhûng ropuina lem te hi Paa chhuak a ni lo va, khawvêla chhuak a ni zâwk si a.

¹⁷Khawvêl hi a châknate chawpin a boral mêk a ni; Pathian duh zâwng titu erawh chu kumkhuain a awm reng ang.

¹⁸Naute u, hun hnuhnûng ber chu a ni ta e, Krista dodâltu a lo kal ang tih in hriat ang khân, tûnah pawh Krista dodâltu tam tak an lo chhuak ta; chu vâng chuan hun hnuhnûng ber a ni ta tih kan hria e.

¹⁹Anni chu kan zîng aṭangin an chhuak a; nimahsela, keimahni mi tak an ni lo ve; keimahni mi tak ni sela kan hnênah an awm ve zêl tûr a ni si a; nimahsela, an zain keimahni mi tak an ni lo vek tih a lan fiah theih nân min chhuahsan ta a ni.

²⁰Mi Thianghlima hnên ata hriak thihna in dawng a, chu chu in zain in hria e.

²¹Thutak chu in hriat loh avângin ka ziak a ni lo, in hriat avâng leh thutakah dâwt eng mah a chhuah ngai loh avângin ka ziak zâwk a ni.

²²Isua chu Krista a ni tih awih lotu aliama dawthei tu nge awm? Krista dodâltu chu Pa leh Fapa awih lotu hi a ni.

²³Tu pawh Fapa awih lo chuan Pa pawh a pawm chuang lo; Fapa awihtu erawh chuan Pa pawh a pawm a ni.

²⁴Nangni zawngin a tîr ata in hriata kha nangmahniah awmtîr reng rawh u. Chumi a tîr ata in hriata chu nangmahnia a awm reng chuan, nangni pawh Fapaah leh Paah chuan in awm reng ang.

²⁵Tin, hei hi a ni amah ngeiin thil min tiama kha, chatuana nunna hi.

²⁶Chûng nangmahni hruai bo tumtute thu chu in hnênah ka ziak a ni.

²⁷Nangni zawng ama hnên ata hriak thihna in hmuh kha nangmahniah a awm reng a, tu ma zirtîr in ngai lo ve; ama hriak thihna chuan thil zawng zawng thu a zirtîr zâwk che u avâng leh, dik tak a ni a, dâwt pawh a nih loh avângin, chu mi chuan a zirtîr che u ang khân amahah awm reng rawh u.

²⁸Chutichuan, naute u, amahah awm reng rawh u; tichuan, amah chu lo inlâr mah sela, a lo kalin a hmaah zak lovin, huai takin kan awm thei ang.

²⁹Amah chu mi fel a ni tih in hriat chuan, mi tu pawh felna ti chu ama hrin a ni tih in hria e.