Read Mizo_Old_version LEHKHATHAWN PAKHATNA JOHANA 4 Bible Online

LEHKHATHAWN PAKHATNA JOHANA 4 - Mizo_Old_version bible

LEHKHATHAWN PAKHATNA JOHANA 4

¹Duh takte u, thlarau nazawng ring suh u; amaherawhchu, thlaraute chu Pathian laka mi an ni nge ni lo fiah rawh u; thuhriltu der tam tak khawvêlah an lo chhuah tâk avângin.

²Hemiah hian Pathian Thlarau chu in hria ang: thlarau eng pawh Isua Krista tisaah a lo chang tih ṭan chu Pathian laka mi a ni;

³thlarau eng pawh Isua ṭan lo chu Pathian laka mi a ni lo ve; chu chu Krista dodâltu thlarau, lo kal tûr in hriata kha a ni e; tûnah pawh khawvêlah a awm tawh reng a ni.

⁴Naute u, Pathian ta in ni a, chûng chu in ngam tawh e; nangmahnia awma chu khawvêla awma ai chuan a ropui zâwk avângin.

⁵Anni chu khawvêla mi an ni a; chuvangin, khawvêla mi angin an ṭawng a, khawvêlin an thu an ngaithla ṭhîn a ni.

⁶Keini chu Pathian laka mi kan ni a, Pathian hretu chuan kan thu a ngaithla ṭhîn a; Pathian laka mi ni lo chuan kan thu a ngaithla ṭhîn lo. Chûngah chuan thlarau dik tak leh thlarau dik lo kan hria a ni.

⁷Duh takte u, i inhmangaih tawn ṭheuh vang u; hmangaihna hi Pathian laka chhuak a ni si a; mi tin hmangaihna nei apiang Pathian hrin an ni tawh a, Pathian an hre bawk a.

⁸Hmangaihna nei lo chuan Pathian a hre lo; Pathian chu hmangaihna a ni si a.

⁹Hemiah hian Pathian hmangaihna kan chungah a lo lang ta, amah avânga kan nun theihna tûrin Pathianin a Fapa neih chhun khawvêla a rawn tirhah hian.

¹⁰Hemiah hian hmangaihna a awm, keimahnin Pathian kan hmangaih ka ti a ni lo va, amahin min hmangaih a, kan sualte thupha chawina ni tûrin a Fapa a rawn tîr ka ti a ni zâwk e.

¹¹Duh takte u, Pathianin chuti kauva min hmangaih chuan, keini pawh kan inhmangaih tawn ṭheuh tûr a ni.

¹²Tu mân eng lai mahin Pathian an hmu ngai lo. Kan inhmangaih tawn chuan Pathian keimahniah a awm reng ang a, a hmangaihna pawh keimahniah a famkim bawk ang.

¹³Amahah kan awm reng tih leh amah chu keimahniah a awm reng tih hemiah hian kan hria, a Thlarau min pêk tawh avâng hian.

¹⁴Tin, Pain Fapa chu khawvêl Chhandamtua awm tûrin a rawn tîr tih kan hmu tawh a, kan hriattîr a ni.

¹⁵Tu pawh, “Isua hi Pathian Fapa a ni,” tia ṭan apiang chu, amahah chuan Pathian a awm reng a, ani pawh chu Pathianah a awm reng bawk a ni.

¹⁶Pathianin keimahnia hmangaihna a neih chu kan hria a, kan ring bawk a ni. Pathian chu hmangaihna a ni; hmangaihnaa awm reng chu Pathianah a awm reng a, Pathian pawh amahah a awm reng a ni.

¹⁷Hemiah hian kan chungah hmangaihna a famkim tawh, rorêl nia hlau lova kan awm theihah hian; ama awm anga khawvêlah hian kan awm avângin.

¹⁸Hmangaihnaah chuan hlauhna rêng a awm lo: hmangaihna famkimin hlauhna a hnawt chhuak zâwk ṭhîn a ni, hlauhnaah chuan hremna a awm si a; a hlautu chu hmangaihnaah a la famkim lo a ni.

¹⁹Aman min hmangaih hmasak avângin kan hmangaih a ni.

²⁰Miin, “Pathian ka hmangaih e,” tiin a unau haw si sela, amah chu dawthei a ni; a unau a hmuh tawh renga mah a hmangaih loh chuan, Pathian a hmuh ngai lohva chu engtin nge a hmangaih theih ang?

²¹Ama hnên ata hemi thupêk hi kan nei, “Tu pawhin Pathian a hmangaih chuan a unau pawh a hmangaih bawk tûr a ni,” tih hi.