Read Mizo_Old_version LEHKHATHAWN PAKHATNA JOHANA 5 Bible Online

LEHKHATHAWN PAKHATNA JOHANA 5 - Mizo_Old_version bible

LEHKHATHAWN PAKHATNA JOHANA 5

¹Tu pawh Isua hi Krista a ni tih ring chu Pathian hrin a ni; tu pawh a hringtu hmangaih chuan a hrina pawh a hmangaih thîn.

²Hemiah hian Pathian fate kan hmangaih tih kan hria, Pathian kan hmangaiha, a thupêkte kan zawm hian.

³Pathian kan hmangaihna chu hei hi a ni, a thupêkte kan zawm hi; a thupêkte chu a khirh si lo va.

⁴Pathian hrin tawh phawt chuan khawvêl a ngam zêl si a; hei hi a ni khawvêl hneha ngamna chu, kan rinna hi.

⁵Isua hi Pathian Fapa a ni tih ringtu chauh lo chuan tuin nge khawvêl ngam ṭhîn le?

⁶He mi hi a ni tui leh thisena lo kala chu, Isua Krista hi; tui chauhvah ni lovin, tuiah leh thisenah a ni zâwk e.

⁷Hriattîrtu chu Thlarau hi a ni, Thlarau chu thutak a nih avângin.

⁸Hriattîrtu chu pathum an awm, Thlarau leh tui leh thisente chu; chûng pathum chu an inthurual a ni.

⁹Mihring hriattîrna mah kan pawm chuan, Pathian hriattîrna chu a ropui zâwk si a; Pathian hriattîrna chu hei hi a ni, “Ka Fapa chanchin ka hriattîr tawh,” tih hi.

¹⁰Pathian Fapa ringtu chuan mahniah hriatna a nei a ni; Pathian ring lotu chuan amah chu dawtheiah a insiam a ni, Pathianin a Fapa chanchin a hriattîr a rin loh avângin.

¹¹Hriattîrna chu hei hi a ni, Pathianin chatuana nunna min pe a, chumi nunna chu a Fapaah a awm a ni.

¹²Fapa neitu chuan nunna chu a nei; Pathian Fapa nei lotu chuan nunna chu a nei lo.

¹³Chatuana nunna in nei tih in inhriat theih nân, nangni Pathian Fapa hming ringtute hnênah hêng thu hi ka ziak a ni.

¹⁴Hei hi ama chunga kan huaina chu a ni, eng pawh a duh zâwng anga kan dîl chuan anin min ngaihthlâksak ṭhin hi;

¹⁵tichuan, eng pawh kan dîl apiang min ngaihthlâksak tih kan hriat chuan, a hnêna kan thil dîl chu kan hmu tawh tih kan hria a ni.

¹⁶Tu pawhin a unau thihna khawp ni lo sual tiin hmu sela, a dîlsak ang a; tichuan, Pathianin a dîltu hnênah chuan thihna khawp ni lo sual titute tân chuan nunna a pe ang. Thihna khawp sual a awm a; chutiang lamah chuan a dîlsak tûr ka ti a ni lo ve.

¹⁷Fel lohna zawng zawng hi sual a ni; thihna khawp ni lo sual pawh a awm bawk a ni.

¹⁸Tu pawh Pathian hrin chuan thil a tisual lo tih kan hria e; Pathian Hrina khân amah chu a hum reng a, mi sual chuan tawh pawh a tawk thei lo rêng a ni.

¹⁹Tin, Pathian laka mi kan nih leh khawvêl pumhlûm hi mi sual thu thuin a awm tih kan hria e.

²⁰Tin, Pathian Fapa chu a lo kal a, Mi Diktak chu hre thei tûrin hriat theihna min pe tih kan hre bawk a; tin, keini, a Fapa Isua Kristaa kan awm hian, Mi Diktakah chuan kan awm a ni. Ani chu Pathian dik tak a ni a, chatuana nunna pawh a ni.

²¹Naute u, milem lakah inthiarfihlîm rawh u.