Read Mizo_Old_version RORELTUTE 1 Bible Online

RORELTUTE 1 - Mizo_Old_version bible

RORELTUTE 1

¹Tin, Josua thih hnu chuan heti hi a ni a, Israela thlahte chuan, “Kanaan-hote chu dova kan tâna bei tûrin tu nge han kal hmasa phawt ang le?” tiin, LALPA chu an râwn a.

²Tin, LALPA chuan, “Juda han kal rawh se. Ngai teh u, a kutah ram chu ka pe tawh e,” a ti a.

³Tin, Judan a unau Simeona hnênah, “Kanaan-hote bei tûrin ka ram chanpualah hian lo chho ve rawh; kei pawh i ram chanpualah ka lo kal ve dâwn nia,” a ti a. Chutichuan, Simeona chu a hnênah a kal ve ta a.

⁴Tin, Juda chu a han kal a; tichuan, Kanaan-hote leh Periz-hote chu LALPAN an kutah a pe ta a; tin, Bezek khuaah mi sîngkhat an that a.

⁵Tin, Bezek khuaah chuan Adoni-bezeka an han hmu a; tin, an bei a, Kanaan-hote leh Periz-hote chu an that chiam a.

⁶Adoni-bezeka erawh chu a tlân a; tichuan, an ûm a, an man a, a kutzungpuite leh kezungpuite an tansak a.

⁷Tin, Adoni-bezeka chuan, “Lal sawmsarih kutzungpui leh kezungpui tan chhumte chuan ka dawhkân hnuaia buh mal an chhar ṭhîn a; ka tih ang chiahin Pathianin mi thungrûl ve ta a nih hi le,” a ti a. Tin, Jerusalem khuaah an hruai a, chutah chuan a thi ta a.

⁸Tin, Juda thlahte chuan Jerusalem khua an han do va, an la a, khandaihin an bei a, khawpui chu an hâl a.

⁹Tin, chumi hnuah chuan Juda thlahte chu Kanaan-ho, tlâng rama awm te, Chhim lama awm te, phaia awm te chu do tûrin an zuk kal a.

¹⁰Tin, Juda chuan Kanaan-ho Hebron khuaa awmte chu a va bei a (a hma chuan Hebron khaw hming chu Kiriath-arba a ni). Tichuan, Sesaia te, Ahimana te, Talmaia te an that a.

¹¹Tin, chuta ṭang chuan Debir khuaa awmte chu a bei a (A hma chuan Debir khaw hming chu Kiriath-sepher a ni).

¹²Tin, Kaleban, “Tu pawh Kiriath-sepher khua chu beia, la apiang chu ka fanu Aksi nupuiah ka neihtîr ang,” a ti a.

¹³Tin, Kaleba nau Kenaza fapa Othnielan a la a; tichuan, a fanu Aksi chu nupuiah a neihtîr ta a.

¹⁴Tin, a pasal hnên a va thlen chuan a pa ram dîl tûrin a lo fuih a. Tin, sabengtung ata a chhuk a; Kaleba chuan a hnênah, “Eng nge i duh le?” a lo ti a.

¹⁵Ani chuan, “Eng emaw dîl che ka duh a ni. Chhim lam ram ro takah mi awmtîr ta si a, tuikhur mi pe tel bawk tûrin ka ngên a che,” a ti a. Tichuan, Kaleba chuan tuikhur chhakta leh thlangta chu a pe ta a.

¹⁶Tin, Mosia puzawn Ken-ho thlahte chu Arad chhim lama Judai thlalêrah chuan Juda thlahte nên tûm khawpui ata chu an han chho va; an zîngah chuan an han chêng ve ta a.

¹⁷Tin, Juda chu a unau Simeona nên an thawk a, Zephath khuaa awm Kanaan-ho chu an that a, an tichimit vek a. Chu khawpui hming chu Horma an ti.

¹⁸Tin, Juda chuan Gaza khua a ram chin nên, Askelon khua a ram chin nên, Ekron khua a ram chin nên a la bawk a.

¹⁹Tin, LALPA chu Juda hnênah a awm a; tichuan, tlâng rama chêngte chu a hnawt bo vek a; ruama chênghote erawh chu thîr tawlailîrte an neih avângin a hnawt chhuak thei lo a ni.

²⁰Tin, Mosian a lo sawi tawh angin Hebron khua chu Kaleba an pe a. Chuta mi Anaka fapate pathum chu a hnawt chhuak a.

²¹Tin, Benjamina thlahte chuan Jebus-ho, Jerusalem khuaa awmte chu an hnawt chhuak lo; Jebus-hote chu Benjamina thlahte nên tûn thleng hian Jerusalem-ah an la chêng za ta reng a ni.

²²Tin, Josefa chhûngte pawh chu Bethel khaw bei tûrin an thawk ve bawk a; tin, an hnênah LALPA a awm a.

²³Tin, Josefa chhûngte chuan Bethel khuaah chuan enthlatute an tîr a (A hma chuan chu khaw hming chu Luz a ni).

²⁴Tin, enthlatute chuan mi pakhat, khaw chhûng ata lo chhuak hi an han hmu a, a hnênah, “Khawngaih takin khawpui chhûng luhna min entîr teh khai; tichuan, ṭha takin kan ti dâwn che nia,” an ti a.

²⁵Tin, khawpui chhûng luhna chu a entîr a; tichuan, khandaihin chu khua chu an bei a; chu mi leh a chhûngte zawng zawng erawh chu an zuah a.

²⁶Tin, chu mi chu Hit-ho ramah a lût a, khua a siam a, chumi khaw hmingah chuan Luz a vuah a, tûn thlengin chumi hming chu a la pu a ni.

²⁷Tin, Manasea chuan Beth-san khua leh a khawpera awm te, Taanak khua leh a khawpera awm te, Dor khua leh a khawpera awm te, Ibleam khua leh a khawpera awm te, Megido khua leh a khawpera awmte chu a hnawt chhuak lo; chu ramah chuan Kanaan-hote erawh chu an awm ta reng a.

²⁸Tin, heti hi a ni a, Israela thlahte chu an lo chak tâk tial tial chinah chuan Kanaan-hote chu hnathawka rawih atân an awmtîr a, an hnawt chhuak fai vek ta lo.

²⁹Tin, Ephraima chuan Gezer khuaa Kanaan-ho awmte chu a hnawt chhuak lo; Kanaan-ho chu Gezer khuaah chuan an zîngah an chêng ve ta zâwk a ni.

³⁰Zebuluna chuan Kitron khuaa awmte leh Nahalol khuaa awmte chu a hnawt chhuak lo; Kanaan-ho chu an zîngah an chêng ve a, hnathawka rawih atân an awm ta zâwk a ni.

³¹Asera chuan Ako khuaa awm te, Zidon khuaa awm te, Ahlab khuaa awm te, Akzib khuaa awm te, Helba khuaa awm te, Aphik khuaa awm te, Rehob khuaa awmte chu a hnawt chhuak lo.

³²Asera thlahte chu chumi rama awm Kanaan-hote zîngah chuan an chêng ve ta zâwk a ni; anni chuan an hnawt chhuak lo a ni.

³³Naphtalia chuan Beth-semes khuaa awm te, Beth-anath khuaa awmte chu a hnawt chhuak lo; chumi rama awm Kanaan-hote zîngah chuan a chêng ve ta zâwk a ni. Amaherawhchu, Beth-semes khuaa awmte leh Beth-anath khuaa awmte chu an hnathawka rawih atân an awm ta a ni.

³⁴Tin, Amor-ho chuan Dana thlahte chu tlâng ramah an hnawt chho va, ruama an chhuk an phal si lo va;

³⁵Amor-ho erawh chu Heres tlângah te, Aijalon khuaah te, Saalbim khuaah te an awm ta reng a; nimahsela, Josefa chhûngte kut chu a chak a, an hnathawka rawih atân an lo awm ta a ni.

³⁶Tin, Amor-ho ram chin chu Akrabim chhohna leh Sela aṭangin a chho ta zêl a ni.