Read Mizo_Old_version RORELTUTE 10 Bible Online

RORELTUTE 10 - Mizo_Old_version bible

RORELTUTE 10

¹Tin, Abimeleka hnuah chuan Israel-hote chhanchhuak tûrin Isakar mi Dodova fa Pua fapa Tola a lo chhuak a, Ephraim tlâng ram Samir khuaah a awm a.

²Tin, kum sawmhnih leh kum thum Israel-te ro a rêl a; tin, a thi a, Samir khuaah an phûm a.

³Chumi hnuah chuan Gilead mi Jaira a lo chhuak a, kum sawmhnih leh kum hnih Israel-te ro a rêl a.

⁴Tin, chu mi chuan fapa sawmthum, sabengtungno sawmthum chunga chuang ṭhîn mi a nei a; tin, Gilead ramah khaw sawmthum an nei a, chûng chu tûn thleng hian Havoth-jair an ti a.

⁵Tin, Jaira chu a thi a, Kamon khuaah an phûm a.

⁶Tin, Israela thlahte chuan LALPA mit hmuhin thil sual an lo ti leh ta a, Baala-te leh Astorethi-te, Suria-ho pathiante, Zidon-ho pathiante, Moab-ho pathiante, Amona thlah pathiante, Philistia-ho pathiante rawng an lo bâwl ta a; tichuan, LALPA chu an hawisan a, a rawng an bâwl ta lo va.

⁷Chutichuan, LALPA chu Israel-te chungah chuan a thinrim ta hle mai a, Philistia-hote hnênah leh Amona thlahte hnênah a hralh ta a.

⁸Tin, chumi kum chuan Israela thlahte chu an timangangin, an hnehchhiah êm êm mai a - Jordan râl Gilead rama Amor-ho rama Israela thlah awm zawng zawngte chu kum sâwm leh kum riat chhûng zet an hnehchhiah a.

⁹Tin, Amona thlahte chu Juda-hote, Benjamin-hote leh Ephraima thlahte bei tûrin Jordan râl an kai a; chutichuan, Israel-hote chu mangan namênin an mangang ta lo va.

¹⁰Tin, Israela thlahte chuan, “Kan Pathian chu kan lo hawisan tâk ngeia, Baala-te rawng chu kan lo bâwl tâk avângin i chungah thil kan lo tisual ta a ni,” tiin LALPA an au va.

¹¹Tin, LALPAN Israela thlahte hnênah, “Aigupta-ho lak ata te, Amor-ho lak ata te, Amona thlahte lak ata te, Philistia-ho lak ata te ka chhanchhuak che u a ni lo vem ni?

¹²Zidon-hote, Amalek-hote, Maon-hote pawhin an hnehchhiah che u a; tin, mi au va; tichuan, an kut ata chu ka chhanchhuak che u a.

¹³Nimahsela, nangnin mi hawisan a, pathian dangte rawng chu in bâwl ta zâwk a. Chuvângin, ka chhanchhuak tawh lo vang che u.

¹⁴In thlan pathiante chu au ta che u; anni chuan in mangan hunah chuan chhanchhuak che u ang hmiang,” a ti a.

¹⁵Tin, Israela thlahte chuan LALPA hnênah, “Thil kan lo tisual ta a ni! Nangin ṭha i tih ang angin kan chungah rawn ti langin; a chhan erawh chu vawiinah hian khawngaih takin min rawn chhanchhuak hrâm rawh khai,” an ti a.

¹⁶Tichuan, an zînga hnam dang pathiante chu an dah bo vek a, LALPA rawng chu an bâwl ta a. Tin, Israel-hote manganna chu a tihtâwpsak ta a ni.

¹⁷Tin, Amona thlahte chu an pung khâwm a, Gilead ramah chuan an va inkulh a. Tin, Israela thlahte chu an inkhâwm ve chiam a, Mizpe khuaah an inkulh a.

¹⁸Tin, mipuiho, Gilead rama mi lianhote chu an inbia a, “Amona thlahte bei ṭan tûr hi tu nge awm le? Gilead rama awm zawng zawngte chunga hotuah a awm ang,” an ti a.