Read Mizo_Old_version RORELTUTE 11 Bible Online

RORELTUTE 11 - Mizo_Old_version bible

RORELTUTE 11

¹Tin, Gilead mi Jephtha chu mi chak huaisen a ni a, nawhchizuar fapa a ni; tin, Gileada chuan Jephtha chu a hring a.

²Tin, Gileada chu a nupui chuan fapate a hrinsak bawk a; tin, a nupuia fapate chu an lo puitlin chuan Jephtha chu an hnawt chhuak a, a hnênah, “Nang zawngin kan pa in ro i luah thei lo vang, hmeichhe dang laka fa i ni si a,” an ti a.

³Chutichuan, Jephtha chu a unauteho hnên ata chu a tlân bo va, Tob ramah a awm ta a; tin, Jephtha hnênah chuan mi ho tak takte an chêng khâwm a, an zui ṭhîn a.

⁴Tin, heti hi a ni a, nakin deuhvah chuan Amona thlahte chuan Israel-hote chu an do ta a.

⁵Tin, heti hi a ni a. Amona thlahte chuan Israel-hote chu an han do chuan, Gilead-ho upate chu Tob rama mi Jephtha hruai tûrin an kal chhuak ta a.

⁶Jephtha hnênah chuan, “Amona thlahte kan beih theihna tûrin kan hotu berah lo awm ta che,” an ti a.

⁷Tin, Jephtha chuan Gilead-ho upate hnênah, “Mi hua a, ka pa in ata chu mi hnawt chhuak a ni lâwm ni? Engati nge in mangan veleh ka hnêna in lo kal hi?” a ti a.

⁸Tin, Gilead-ho upate chuan Jephtha hnênah, “Chu vâng tak chuan alâwm tûnah hian i lam kan lo hawi leh, Amona thlahte va bei tûra kan hnêna i kal theihna tûrin; tin, Gilead rama awm zawng zawngte chungah kan hotuah i awm ang,” an ti a.

⁹Tin, Jephtha chuan Gilead-ho upate hnênah chuan, “Amona thlahte bei tûra mi hruai hâwn leha, tin, LALPAN anni chu mi pêk chuan in hotuah ka awm takmeuh ang maw?” a ti a.

¹⁰Tin, Gilead-ho upate chuan Jephtha hnênah, “LALPA chu kan kârah hretu a ni ang; i thu ang angin kan ti ngei ngei ang,” an ti a.

¹¹Chutichuan, Jephtha chu Gilead-ho upate hnênah chuan a kal ta a, mite chuan hotu atân leh a puipa ber atân an lo siam ta a; tin, Jephtha chuan Mizpe khuaah LALPA hmaah thu engkim a sawi ta a.

¹²Tin, Jephtha chuan Amona thlahte lal hnênah chuan, “Engtiziaa hetia ka ram rawn bei tûra ka hnêna lo kal mai nge maw i nih le?” tiin palai a tîr a.

¹³Tin, Amona thlahte lal chuan, “Israel-ho Aigupta ram ata an lo chhuah lai khân ka ram an lâk vâng alâwm, Arnon aṭanga Jabok leh Jordan thlengin. Chuvângin, chûng ramte chu tlang takin mi rawn pe leh mai rawh,” tiin Jephtha palaite chu a lo chhâng a.

¹⁴Tichuan, Jephtha chuan Amona thlahte lal hnênah palai a tîr leh a,

¹⁵a hnênah, “Jephthan heti hian a ti e: ‘Israel-hoten Moab ram an lâksak lo va, Amona thlahte ram pawh an lâksak hek lo;

¹⁶Aigupta ram ata an lo chhuahna Tuifinriat Sen thlenga thlalêr kha Israel-ten an kal tlanga, Kadesh kha an thlen khân,

¹⁷Israel-hovin Edom lal hnênah, “Khawngaih takin i ram kan kal tlang ang e,” tiin palai an tîr a; nimahsela, Edom lal chuan a lo ngaithla duh lo va. Tin, chutiang bawkin Moab lal hnênah a tîr leh a; nimahsela, a lo remti lo va. Tichuan, Israel-hote chu Kadesh-ah an awm ta a.

¹⁸Tichuan, thlalêr chu an kal tlang a, Edom ram leh Moab ram chu an kal hual a, Moab ram chhak lampangah an kal a. Arnon lehlam pangah awmhmun an khuar a; Moab ram chhûngah zawng an lût hauh lo a ni, Arnon chu Moab ramri chin a ni si a.

¹⁹Tin, Israel-hovin Amor-ho lal Sihona, Hesbon lal hnênah palai an tîr a; Israel-ho chuan a hnênah, “Kan hmun lama kal nân khawngaih takin i ram kan kal tlang ang e,” an ti a.

²⁰Nimahsela, Sihona chuan Israel-ho chu a ram kal tlang atân chuan a ring zo lo va. Sihona chuan a mite zawng zawng chu a khâwm a, Jahaz khuaah a inkulh a, Israel-ho chu a bei ta a.

²¹Tin, LALPA, Israel-te Pathianin Sihona leh a hote zawng zawng chu Israel-hote kutah a pe a, an that ta a. Chutichuan, Israel-hote chuan chumi ram Amor-hote awmna ram zawng zawng chu an nei ta vek a.

²²Tichuan, Amor-ho ramri chin zawng zawng Arnon aṭanga Jabok thleng rakin, thlalêr aṭanga Jordan thleng rakin an nei ta vek a ni.

²³Chutichuan, LALPA, Israel-te Pathianin a mi Israel-hote hmaah Amor-ho chu a chhuhsak a ni a, nangin i neihsak theih thu em ni?

²⁴I pathian Kemosan i puala a lo ruatsak che chu i nei dâwn a ni lâwm ni? Chutichuan, LALPA kan Pathianin kan hmaa a chhuhsakte chu kan nei ang.

²⁵Moab lal Zipora fapa Balaka aiin i chak zâwk em ni? Ani chuan Israel-hote kha a chawk buaiin, a do ngai em ni?

²⁶Israel-ho, Hesbon-ah leh a khawperah te, Aroer leh a khawperah te, Arnon ramri dep khawpui zawng zawngah te chuan kum zathum zet an awm lai khân, eng vânga la lova lo la awm reng nge i nih?

²⁷Chuvângin, i chungah hian thil eng mah ka tisual lo ve; nangmah zâwk hian mi beih i tum avângin ka chungah hian thil i tisual a ni e. LALPA, Rorêltu chuan tûnah hian Israela thlahte leh Amona thlahte kâra thu chu ngaihtuah rawh se,’ a ti,” tiin.

²⁸Nimahsela, Amona thlahte lal chuan Jephtha thuchah chu a lo ngaithla duh lo va.

²⁹Chutichuan, LALPA Thlarau chu Jephtha chungah a lo thleng a; tichuan, Gilead leh Manasea ram a kal tlang a, Gilead rama Mizpe aṭang chuan Amona thlahte hnênah chuan a kal zêl a.

³⁰Tin, Jephthan LALPA hnênah chhia a chham a, “Amona thlahte hi ka kuta mi pêk takmeuh chuan,

³¹heti hi a ni ang a, Amona thlahteho hnên aṭanga râlmuanga ka hâwn leh hun chuan eng pawh ka kawngka aṭanga mi rawn hmuak hmasa ber apiang chu LALPA ta tûr a ni ang a, hâlral thilhlan atân ka hmang ngei ngei ang,” a ti a.

³²Chutichuan, Jephtha chu Amona thlahte bei tûr chuan a kal ta a; tin, LALPAN a kutah a pe ta a.

³³Tin, Aroer aṭanga Minith thlengin a bei zêl a, khaw sawmhnih zet; tin, Abel-keramim thlengin a that chiam a. Chutichuan, Amona thlahte chu Israela thlahte hmaah chuan an lo tlâwm ta a.

³⁴Tin, Jephtha chuan a awmna Mizpe khuaa a in chu a thleng ta a; tin, ngai teh, a fanu chuan khuangtête nên lâmin a lo hmuak a; a fa neih chhun a ni a, amah lo chu fapa leh fanu dang rêng rêng a nei lo.

³⁵Tin, heti hi a ni a, amah a han hmuh veleh chuan a puante a pawt thlêr a, “E khai, ka fanu! Mi titlâwm ta hle mai a! Mi timangangtu zînga mi i ni ta! LALPA lamah ka kâ ka lo âng ta si a, chu chu zûk leh thei ka ni si lo,” a ti a.

³⁶Tin, ani chuan a hnênah, “Ka pa, LALPA lamah i kâ zu lo âng ta chia, i kâa i thuchhuak ang ngeiin ka chungah i ti tûr alâwm; LALPAN i hmêlma Amona thlahte chung ngeiah chuan i phuba zuk la ta si a,” a ti a.

³⁷Tin, a pa hnênah chuan, “Hetiang hian ka ti ang e: thla hnih chhûng chu keimahin ka han tâl hrang ang a, tlângahte ka han rawl ang a, ka nulâtna hi ka han sûn ang e, kei leh ka ṭhianteho nên hian,” a ti a.

³⁸Tin, ani chuan, “Kal ta che,” a ti a. Tichuan, thla hnih thang tûrin a tîr a; tin, a chhuak ta a, amah leh a ṭhianteho nên chuan; tin, tlângahte chuan a nulâtna chu a han sûn a.

³⁹Tin, heti hi a ni a, thla hnih hnuah chuan a pa hnênah a haw leh ta a, ani chuan chhia a lo chham tawh ang khân a chungah a ti ta a. Mipa tu mahin an pâwl lo.

⁴⁰Chutichuan, Israel-hote zîngah chuan Israela fanuten Gilead mi Jephtha fanu chu kum tin ni li sûn dânah an lo nei ta a.