Read Mizo_Old_version RORELTUTE 12 Bible Online

RORELTUTE 12 - Mizo_Old_version bible

RORELTUTE 12

¹Tin, Ephraim-hote chu an pung khâwm chiam a, hmâr lam panin an kal a; tin, Jephtha hnênah, “Engati nge Amona thlahte bei tûra i hnêna kal tûra min rawn sâwm ve loh ni? I inah kan hâl khung dâwn che a ni,” an ti a.

²Tin, Jephtha chuan an hnênah, “Amona thlahteho hi ka mite nên theihtâwp chhuahin kan bei a ni a; ka chah lai che u khân an kut ata mi chhanchhuak si lo.

³Tichuan, nangnin mi chhanchhuak duh lo tih ka hriat veleh thih dâwn miah lovin ka ṭang a, Amona thlahte bei tûrin ka va thawk a; tichuan, LALPAN anniho chu ka kutah mi pe ta a. Chuvângin, eng atan nge mi bei tûra vawiinah hian in lo thawh ni?” a ti a.

⁴Chutichuan, Jephtha chuan Gilead mi zawng zawng chu a khâwm chiam a, Ephraim-ho chu a bei ta a. Tin, Gilead-hote chuan Ephraim-ho chu an that ta chiam a, “Nangni Ephraim hnam tlân bo Gilead-ho, Ephraim-ho zîngah leh Manase-ho zînga tel ve mai maiho,” an tih ṭhin avângin.

⁵Tin, Gilead-hote chuan Ephraim-ho dep Jordan lui kaite chu an lo man a. Tin, heti hi a ni a, Ephraim-ho tlân bote chuan, “Ka lo kai ang e,” an tih apiangin Gilead-hote chuan an hnênah, “Ephraim mi i ni em?” an lo ti zêl a. Annin, “Ni lo ve,” an lo tih chuan,

⁶an hnênah, “ ‘Shiboleth’ han ti teh,” an lo ti a; tin, anni chuan, “Siboleth,” an lo ti zâwk ṭhîn a, an lam fiah ve thiam si ṭhîn lo va; tichuan, an man a, Jordan lui kaiahte chuan an lo that zêl a. Chumi ṭum chuan Ephraim-ho chu sîngli leh sânghnih an that a.

⁷Tin, Jephtha chuan Israel-ho chungah kum ruk ro a rêl a. Tichuan, Gilead mi Jephtha chu a thi a, Gilead rama khaw pakhatah an phûm ta a.

⁸Tin, a hnuah chuan Bethlehem khuaa mi Ibzanan Israel-ho chungah ro a rêl a.

⁹Chu mi chuan fapa sawmthum a nei a, fanu sawmthum ram dangah a kaltîr a; tin, a fapate tân chuan ram dang mi fanu sawmthum a hruaisak bawk a. Tin, Israel-ho chungah kum sarih ro a rêl a.

¹⁰Tin, Ibzana chu a thi a, Bethlehem khuaah an phûm a.

¹¹Tin, a hnuah chuan Zebulun mi Elonan Israel-ho chungah ro a rêl a; Israel-ho chungah kum sâwm ro a rêl a.

¹²Tin, Zebulun mi Elona chu a thi a, Zebulun rama Aijalon khuaah an phûm a.

¹³Tin, chumi hnuah chuan Pirathon mi, Hilela fapa Abdonan Israel-ho chungah ro a rêl a.

¹⁴Chu mi chuan fapa sawmli leh tupa sawmthum, sabengtungno sawmsarih chunga chuang ṭhîn mi a nei a. Ani chuan Israel-ho chungah kum riat ro a rêl a.

¹⁵Tin, Pirathon mi, Hilela fapa Abdona chu a thi a, Ephraim ram, Amalek mite tlâng ramah Pirathon khuaah an phûm ta a.