Read Mizo_Old_version RORELTUTE 13 Bible Online

RORELTUTE 13 - Mizo_Old_version bible

RORELTUTE 13

¹Tin, Israela thlahte chuan LALPA mit hmuhin thil sual an lo ti leh ta a; tichuan, LALPAN Philistia-ho kutah kum sawmli a awmtîr a.

²Tin, Zora khuaah Dan hnam mi pakhat a awm a, a hming chu Manoa a ni a; a nupui chu a ching a, nau rêng rêng a pai ngai lo va.

³Tin, chu hmeichhe hnênah chuan LALPA vântirhkoh a rawn inlâr a, a hnênah chuan, “Ngai teh khai, i ching a, nau rêng rêng i la pai ngai lo va; nimahsela, i rai ang a, fapa i hring ang.

⁴Chutichuan, fîmkhur rawh khai, uain leh zû rêng rêng in suh la, ei thiang lo thil rêng rêng pawh ei hauh suh ang che.

⁵Ngai teh, i rai ang a, fapa i hring dâwn si a. A luah chuan bakmehna rêng rêng rawih a ni lo vang, naupang chu chhûla a awm lai aṭangin Pathian tâna Nazarit mi a ni dâwn si a; ani chuan Israel-hote hi Philistia mite kut ata chu a chhanchhuak ṭan ang,” a ti a.

⁶Chutichuan, hmeichhia chuan a pasal hnênah, “Pathian mi mi pakhat ka hnênah a lo kal a, a hmêl chu vântirhkoh hmêl ang, ṭihbaiawm tak a ni; khawi lam mi nge a nih ka zâwt hlei lo va, ani chuan a hming mi hrilh bawk lo va.

⁷Amaherawhchu, ka hnênah, ‘Ngai teh, i rai ang a, fapa i hring ang; chutichuan, uain leh zû rêng rêng in suh la, ei thiang lo thil rêng rêng pawh ei hauh suh ang che; naupang chu chhûla a awm lai aṭanga a thih thlengin Pathian tâna Nazarit mi a ni dâwn si a,’ a ti a,” tiin a sawi a.

⁸Chutichuan, Manoa chuan LALPA hnênah a ngên chiam a, a hnênah, “Aw LALPA, khawngaih takin Pathian mi i rawn tirha kha kan hnênah lo kal leh sela, naupang lo piang tûr chu engtin nge kan tih ang min han zirtîr rawh se,” a ti a.

⁹Tin, Pathianin Manoa thusawi chu a lo ngaithla a; tin, hmeichhia chu phûla a ṭhut laiin a hnênah Pathian vântirhkoh chu a lo kal leh a; a pasal Manoa erawh chu a hnênah a awm ve lo va.

¹⁰Tin, hmeichhia chu hmanhmawh takin a tlân ta thuai a, a pasal chu a va hrilh a, a hnênah, “Ngai teh, hmannia ka hnêna lo kala kha ka hnênah a rawn inlâr leh ta e,” a ti a.

¹¹Tichuan, Manoa chu a tho va, a nupui chu a zui a, chu mi hnên chu a va thleng a, a hnênah, “Nangmah hi em ni hmeichhe hnêna thu sawitu chu?” a ti a. Tin, ani chuan, “Ni e,” a ti a.

¹²Tin, Manoa chuan, “I thu ang zêl chuan lo thleng rawh se! Naupang awm dân tûr chu engtin nge ni ang a, eng nge ni a thawh tûr chu ni ang le?” a ti a.

¹³Tin, LALPA vântirhkoh chuan Manoa hnênah, “Hmeichhe hnêna ka sawi zawng zawng kha ngaihtuah ṭha mai rawh se.

¹⁴Grêp hruia mi rêng rêng chu ei tûr a ni lo va, uain leh zû rêng rêng a in tûr a ni lo, ei thiang lo thil rêng rêng pawh a ei tûr a ni lo; thu ka pêk tâk zawng zawng kha vawng ṭha rawh se,” a ti a.

¹⁵Tin, Manoan LALPA vântirhkoh hnênah chuan, “Khawngaih takin kan chelh ang chia, kêlno kan han buatsaihsak rih ang che,” a ti a.

¹⁶Tin, LALPA vântirhkoh chuan Manoa hnênah, “Mi chelh mah la, i chaw zawng ka ei lo vang. Hâlral thilhlan tûra buatsaih i nih erawh chuan LALPA hnênah i hlân tûr a ni,” a ti a. Manoa chuan ani chu LALPA vântirhkoh a ni tih a hre si lo va.

¹⁷Tin, Manoan LALPA vântirhkoh hnênah chuan, “Tu nge i hming, i thusawi ang ngeia a lo thlen huna kan chawimawi theihna tûr chein?” a ti a.

¹⁸Tin, LALPA vântirhkoh chuan a hnênah, “Engati nge ka hming mi zawh? Sawi mi a ni hlei nêm,” a ti a.

¹⁹Chutichuan, Manoa chuan kêlno chu ei tûr thilhlan nên a va la a, lungpui chungah chuan LALPA hnênah a hlân a. Tin, vântirhkoh chuan Manoa leh a nupuiin an thlîr reng lai chuan thil mak tak a ti ta a -

²⁰maichâm aṭanga meialh chu vân lama a chhoh lai chuan, LALPA vântirhkoh chu maichâma meialhah chuan a chho ta mai a! Manoa leh a nupuiin chu thil an hmuh chuan leiah an bawkkhup ta dêr a.

²¹Amaherawhchu, LALPA vântirhkoh chu Manoa leh a nupui hnênah chuan a rawn inlâr leh ta lo. Tichuan, Manoa chuan LALPA vântirhkoh a ni tih a hre ta a.

²²Tin, Manoa chuan a hnênah, “Pathian kan hmuh tâk avâng hian kan thi ngei ang,” a ti a.

²³Nimahsela, a nupui chuan a hnênah, “LALPAN min tihhlum a tum te chuan hâlral thilhlan leh ei tûr thilhlan kan hlante kha a chhâng duh hlei nâng, hêng ang zawng zawngte pawh hi min entîr lo vang a, hêng ang thilte pawh hi tûn ṭumah min hrilh hek lo vang,” a ti a.

²⁴Tin, hmeichhia chuan fapa chu a hring ta a, a hmingah Samsona an sa a; tin, nausên chu a lo sei lian a, LALPAN mal a sâwm a.

²⁵Tin, Zora leh Estaol inkâra Mahane-dan hmunah chuan LALPA thlarauvin a rawn khawih harh ṭan ta a.