Read Mizo_Old_version RORELTUTE 14 Bible Online

RORELTUTE 14 - Mizo_Old_version bible

RORELTUTE 14

¹Tin, Samsona chu Timna khuaah chuan a zuk kal a, Timna khuaah chuan Philistia-ho fanute zînga mi hmeichhe pakhat hi a zuk hmu a.

²Tin, a lo hâwn chhoh leh chuan a nu leh a pa chu a hrilh a, “Timna khuaah, Philistia-ho fanute zînga mi hmeichhe pakhat ka hmu a; ka nupuiah mi neihsak rawh u,” a ti a.

³Tichuan, a nu leh a pa chuan a hnênah, “I unaute fanute zîngah emaw, kan chite zawng zawng zîngah hian emaw hmeichhia an awm hauh lo vem ni le, Philistia-ho serh tan lohte zînga nupui tûr i zuk zawn tâk mai?” an ti a. Tin, Samsona chuan a pa hnênah, “Mi neihsak mai rawh; ka duh êm asin maw le,” a ti a.

⁴Nimahsela, a nu leh a pa chuan chu chu LALPA tih a ni tih an hre lo va - Philistia-ho chungah remchâng a zawng a ni si a. Chutih lai chuan Philistia-hote chuan Israel-hote chungah ro an rêl a.

⁵Chutichuan, Samsona chu a nu leh a pa nên Timna khuaah chuan an zuk kal a, Timna khuaa grêp hmun hi an zu thleng a. Tin, ngai teh, sakeibaknei vânglai hian a lo rûm khum a.

⁶Tin, LALPA thlarau chu a chungah nasa takin a lo thleng a; tichuan, kêlno pawh sawm ang maiin a pawt sawm ta mai a, eng mah a keng si lo va. Nimahsela, a thiltih chu a nu leh a pa a hrilh lo.

⁷Tin, a zuk kal a, hmeichhia chu a kâwm a; Samsona chuan a duh hle mai a.

⁸Tin, nakin deuhvah chuan zuk neih tumin a kal leh a, sakeibaknei ruang chu en tumin a va pêng a; tin, ngai teh, sakeibaknei taksaah chuan khuai hi a lo awm mur mur a, a zû pawh a lo awm a.

⁹Chu chu a la a, a kal leh ta a, a kal pahin a ei zêl a. Tin, a nu leh a pa hnên chu a han thleng a, a pe ve a, anni pawh chuan an ei a; amaherawhchu, khawizu chu sakeibaknei taksaa mi a lâk a ni tih eng mah a hrilh lo va.

¹⁰Tin, a pa chu hmeichhe hnênah chuan a zuk kal a. Tin, chutah chuan Samsonan ruai a ṭheh a; chu chu tlangvâlte tih dân a ni rêng a.

¹¹Tin, heti hi a ni a, amah an hmuh veleh a hnêna awm ve tûrin ṭhian sawmthum an hruai a.

¹²Tin, Samsona chuan an hnênah, “Tûnah hian thu khirh ka zâwt teh ang che u le. Ruaiṭheh ni, ni sarih chhûnga mi hrilhfiah theiha, in hriat chhuah theih chuan puanzaisîn silh sawmthum leh inthlâkna puan sawmthum ka pe ang che u.

¹³Amaherawhchu, mi hrilhfiah theih loh chuan, puanzaisîn silh sawmthum leh inthlâkna puan sawmthum mi pe tûr a ni,” a ti a. Tin, anni chuan a hnênah, “I thu khirh chu han sawi teh le, kan lo ngaithla ang e,” an ti a.

¹⁴Tin, ani chuan an hnênah, “Eitu ata ei tûr lo chhuaka, Chak tak ata thil thlum tak lo chhuak, tih hi,” a ti a. Tin, ni thum chhûngin chu thu khirh chu an hrilhfiah thei ta lo va.

¹⁵Tichuan, heti hi a ni a, a ni sarih ni chuan Samsona nupui hnênah, “I pasal hi he thu khirh hi min hrilhfiah tûrin thlêm rawh; chuti lo chuan, nang leh i pa chhûngte hi kan hâl dâwn a ni. Min tikawnkaw tûrin a ni maw min sâwm? A ni lâwm ni?” an ti a.

¹⁶Tichuan, Samsona nupui chu a hmaah a ṭap a, “Mi lo hmangaih lovin, mi hua a lo nih zâwk hi le! Ka chiteho lêm thu khirh i zâwt a, kei zawng mi hrilhfiah ve si lo va,” a ti a. Tin, ani chuan a hnênah, “Ngai teh, ka nu leh ka pa pawh ka hrilh lo va, nang ka hrilh ang che maw?” a ti a.

¹⁷Tin, an ruaiṭheh, ni sarih chhûng zawng chuan a hmaah a ṭap a ṭap mai a. Tin, heti hi a ni a, a ni sarih ni chuan a ngen tlut tlut avângin a hrilh ta nge nge a. Tichuan, ani chuan a thu khirh chu a chiteho a hrilh ve ta a.

¹⁸Tin, a ni sarih ni, ni tlâk hmain chumi khuaa mite chuan a hnênah, “Khawizû aia thlum zâwk eng nge ni le? Tin, sakeibaknei aia chak zâwk eng nge ni le?” an ti a. Tin, ani chuan an hnênah, “Ka bâwnglâ hian lei let suh ula chuan, Ka thu khirh hi in hre chhuak hauh lo vang le,” a ti a.

¹⁹Tin, LALPA thlarau chu a chungah nasa takin a lo thleng a; tin, Askelon khuaah a zuk kal a, mi sawmthum a that a, an thuam a hlihsak a, inthlâkna puante chu thu khirh hrilhfiahtute chu a pe ta a. Tichuan, a thin a rim ta êm êm mai a, a pa in lamah a chho ta a.

²⁰Nimahsela, Samsona nupui chu ṭhian atâna a hman, a ṭhiana kha an lo pe ta mai a.