Read Mizo_Old_version RORELTUTE 17 Bible Online

RORELTUTE 17 - Mizo_Old_version bible

RORELTUTE 17

¹Tin, Ephraim tlâng ramah mi pakhat a awm a, a hming chu Mika a ni.

²Tin, ani chuan a nu hnênah, “Tangkarua sângkhat leh za an rûksak chia, nang pawhin ânchhia i lawha, ka beng hriat ngeia i sawi kha, ngai teh, kha tangkarua kha ka hnênah a awm asin, keima lâk a ni e,” a ti a. Tin, a nu chuan, “Ka fapa chu LALPA malsâwmin awm rawh se,” a ti a.

³Tin, tangkarua sângkhat leh za chu a nu a pe leh a; tin, a nu chuan, “He tangkarua hi keima kut ngeiin ka fapa puala milem siam nân leh milema chhûn atân LALPA hnênah ka hlân e; chuvângin, tûnah hian ka pe leh dâwn che a ni,” a ti a.

⁴Tin, tangkarua chu a nu a han pêk chuan, a nu chuan tangkarua zahnih chu a la a, tangkaraw chhertu a pe a, ani chuan milemah a lo siam a, milemah a lo chhûng a; chu chu Mika inah chuan a awm a.

⁵Tin, chu Mika chuan pathiante in a nei a, ephod leh milemte a siam a, a fapa pakhat chu a puithiam atân a tihrang ta a.

⁶Chûng lai chuan Israel ramah lal an awm lo va; mi tinin mahni ṭha tih zâwng zâwngin an ti mai a.

⁷Tin, Bethlehem-juda-a mi Juda hnam, Levi chi tlangvâl pakhat a awm a, chutah chuan a va awm ve lawk a.

⁸Chu mi chu Bethlehem-juda khawpui ata a chhuak a, awmna zawngin a vâk a ni a. Chutia a vahna lamah chuan Ephraim tlâng rama Mika in chu a va thleng a.

⁹Tin, Mika chuan a hnênah, “Khawi aṭanga lo kal nge i nih le?” a ti a. Tin, ani chuan a hnênah, “Bethlehem-juda-a mi Levi chi ka ni a, awmna hmun zawngin ka vâk a ni,” a ti a.

¹⁰Tin, Mika chuan a hnênah, “Ka hnênah hian awm ta che, ka paah leh puithiamah awm langin, kum tin tangkarua tlang sâwm ka pe ang chia, silhfên silh khat leh i ei tûrte pawh,” a ti a. Chutichuan, Levi chi chu a lût ta a.

¹¹Tin, Levi chi chuan chu mi hnêna awm chu a remti ta a; tichuan, chu tlangvâl chu a fapa pakhatah a awm ta a.

¹²Tin, Mika chuan Levi chi chu a tihrang ta a; tichuan, tlangvâl chu a puithiamah a lo awm a, Mika inah chuan a awm ta a.

¹³Chutichuan, Mika chuan, “Tûnah zet chuan Levi chi ka puithiam atân ka nei tawh si a, LALPAN mi tihmuingîl ngei ang tih ka hria e,” a ti a.